1 Korinto 10:1-33
10 Abali, ddinfuna muziwe wila azamani ehu otene, ahedda mutxiddo mwa murabo vina ahabuwa mwinje.
2 Otene abatiziwa na murabo vina na mwinje mwaha wa onfwara Mizé.
3 Otene aja yoja yavahiwani na Mulugu.
4 Otene amwa manje avahiwani na Mulugu. Awene amwa manje abudduwa va mwarhani vina mwarha obo wavahiwani na Mulugu, wamutonya Kristu.
5 Vano Mulugu kaziveliwe na enjiyá mwa awene, nona akwa mwiddeddereni.
6 Dhilobo esi dhipadduwile, dhinonikalela yotagiha iyo, wi nihifune ofwara dhabure dhakakene dhikosilani.
7 Kamukale attu anawebedha amulugu a ottambi, ninga mukoseli ena mwa awene; dhahene ninga enloga malebo: “Nlogo nigilatela oja na omwa. Mmalelani nivenya wila nittabe.”
8 Kanire dha ogonihana wonyakuwa, * ninga mwireli ena mwa awene ofiyedha okwa attu 23.000 siku nimodha.
9 Kanimwehe Yehova ninga mwamweheli enaya ofiyedha okwa n’olumiwa nowa.
10 Vina kanikale anamaba ninga yali enayámo adhile opiwa na anju wa Mulugu.
11 Dhilobo esi dhapadduwele ninga yotagiha wila dhinisunzihe iyo, vina olebeliwe ddi iyo, onkalawo omagomo wa masaka abano.
12 Nona ole onubuwela wi oli owimelene, avyang’anele wi anadhe ogwa.
13 Dhoweha dhotedhene dhingumanana nyuwo, attu ena agumanana. Mbwenyi Mulugu ddororomeleya, iyene kanauttiyeni ofwanyiwa dhoweha dhihinawodhinyu ovilela. Vano mugafwanyiwa yawehayá, Mulugu onele outonyihedhani mukalelo wa owodha ovilela.
14 Nona abali okweleya, kattawani webedha dhingamuttu.
15 Ddinuloganina ninga attu anna ononelamo, pimaní mwanya dhinlogimi.
16 Koddi kalisi ya vinyu enimutamalelihuna Mulugu kintonyihedha nikami na Kristu? Kito pawu engawelihuna kintonya maningo a Kristu?
17 Oli pawu modha bahi, masiki iyo ninjivanilevi nili nningo nimodha, sabwani notene iyo ningawelana pawu yakakene.
18 Mwawubuwele ana Izrayel mudhidhi wajani mikutto dhimperhekiwa vebuwani: Kiyaligana na oja vamodha na Mulugu?
19 Ddinfuna ddiloge eni na ejiya? Koddi ejile emperhekeliwa engamuttu elobwene, obe engamuttuyá elobwene?
20 Nne. Mbwenyi mikutto dhinkutta attu a malogo meena, anakuttela adomonyo kanimukuttela Mulugu. Miyo kaddinfuna wi nyuwo mwandane na adomonyo.
21 Nyuwo kamunfwanyela omwa eli mukalisini mwa Yehova na omwa eli mukalisini mwa adomonyo vina kamunfwanyela oja “vameza va Yehova” na va meza va adomonyo.
22 Obe ‘ninfuna nimusilidhihe Yehova’? Ddi iyo onlibetxa ompitta iyene?
23 Dhotedhene dhinorumelihiwa, mbwenyi kahiyo dhotedhene dhimpuriha. Dhotedhene dhinorumelihiwa, mbwenyi kahiyo dhetedhene dhinlibiha.
24 Muttu ddi muttu ahitamelege ozuzumela yayevi, azuzumelege vina dha attu ena.
25 Muje dhotedhene dhingulihiwa omusika, muhikosaga mavuzo mwaha wa mubuwelo* wenyu,
26 sabwani “Yehova ddi mwinya wa elabo na dhotedhene dhilimo.”
27 Akala muttu ohinimuroromela Kristu, onoukuwelelani vatakulu vaye wi mwaje, nanda nyuwo mugafuna odhowa, muje dhotedhene dhinuvahani iyene, muhivuzaga mwaha wa mubuwelo* wenyu.
28 Mbwenyi akala muttu onouwaddelani dhahi: “Enama eji eperhekeliwa amulugu a ottambi,” kamuje mwaha wa ole ouwaddeleni esodhá vina mwaha wa mubuwelo wa attu ena.
29 Kaddinloga na mubuwelo* wenyu, mbwenyi wa muttu mwina. Ofuru waga wosakula ogattongeliwe eni na muttu mwina?
30 Akala ddinomutamalela Mulugu ddigajaga, kito ddinsumuleliwani mwaha wa yoja etamalelimi?
31 Nona, peno mujaga, mumwaga, mukosaga elobo-elobovi, mukosege dhotedhene wi mmuttittimihena Mulugu.
32 Kamukale nlugu nokwakwattutxa nne wa Agregu, nne wa Ayuda, nne wa mulogo wa Mulugu.
33 Dhahene ninga munivilibihedha miyo waziveliha otene mwa dhotedhene, ddihitamelaga enddipuriha miyo, mbwenyi dditamelaga enapuriha attu enjene wi awodhe ovuneya.
Manota
^ Na egregu, porneya. Kang’ana Mazu Atapuleliwe.
^ Kang’ana Mazu Atapuleliwe.
^ Kang’ana Mazu Atapuleliwe.
^ Kang’ana Mazu Atapuleliwe.
