1 Korinto 11:1-34
11 Mudditagihe miyo, dhahene ninga munimutagihela miyo Kristu.
2 Abalaga, mudhidhi wotene munoddubuwela mwa dhilobo dhotedhene vina munokosa dhilobo dhotedhene ninga mùsunzihileni miyo, nona ddinoutamalelani.
3 Vano ddinfuna muziwe wila musogoreli* wa mulobwana ddi Kristu, musogorheli* wa muyana ddi mulobwana, musogoreli* wa Kristu ddi Mulugu.
4 Mulobwana wotene onlobela obe onlaleya muselu wa Mulugu bakunelile musorho, onomutota manyazo musogorheli* waye;
5 mbwenyi muyana wotene onlobela obe onlaleya muselu wa Mulugu ahikunelile musorho, onomutota manyazo musogorheli waye, vowi onligana na muyana wigile musorho waye.
6 Sabwani akala muyana kankunela musorho waye, agwadde nttitti notene; mbwenyi mwa iyene akala jamanyazo ogwadda nttitti notene obe wiga, onofwanyela okunela musorho waye.
7 Mulobwana kanfwanyela okunela musorho, vowi opaddutxiwe woladdana na Mulugu vina nttittimiho na Mulugu, mbwenyi muyana nttittimiho na mulobwana.
8 Mulugu kamuttanddile mulobwana mwa maningo a muyana mbwenyi omuttanddile muyana mwa maningo a mulobwana.
9 Ottiya ejo, mulobwana kattanddeliwe muyana, mbwenyi muyana ddittanddeliwe mulobwana.
10 Jijene enfuneliwana muyana okaana mmusorhoni mwaye ezinddiyelo enoniha oriha onddimuwa vina mwaha wa anju.
11 Ottiya ejo, mmulogoni mwa Nabuya muyana kankalawo s’emulobwana nne mulobwana kankalawo s’emuyana.
12 Dhahene ninga muyana ottanddiwe mwa maningo a mulobwana, mulobwana obaliwe na muyana, mbwenyi dhotedhene ottanddile ddi Mulugu.
13 Mpime nyuwene mwanya: Jorumeliwa muyana omulobelela Mulugu ahikunelile musorho waye?
14 Ekalelo ettanddiwe attu enowoniha wi jamanyazo mulobwana okaana nttitti nolapa,
15 mbwenyi akala muyana okaana nttitti nolapa, ejo enomuttittimiha sabwani ovahiwa nttitti, ottiya yokunelana musorho.
16 Mbwenyi akala muttu onologa wi muyana kanfwanyela okunela musorho waye, aziwe wi obu kahiyo mweddelo wehu nne kahiyo wa milogo dha Mulugu.
17 Vano kaddinoutamalelani na malago aba anuvahani miyo, sabwani kamuntugumanela olibihana mbwenyi muntugumanela oputtulana.
18 Vamaromo-vene, ddinowiwaga wi mugatugumana ninga mulogo, vari venyu vanokalaga ogawana; miyo ddinorumela esodhá.
19 Txibarene vanele witeya makuru ogawana vari venyu, wila aziweye abale anrumeliwa na Mulugu.
20 Mudhidhi ontugumaninyu mumodhani, kamuntugumanela oja Siyari ya Nabuya.
21 Ogafiya mudhidhi w’otugumanela oja siyari ya Nabuya, muttu-muttu arome oja vatakulu vaye sabwani ena anokana dala mbwenyi ena ankala olezelene.
22 Koddi nyuwo kamunna mmatakulu mwenyu munfwanyelinyu oja na omwa? Obe munopwaza mulogo wa Mulugu mwatotaga manyazo abale ahinna elo? Ddulogenina eni? Ddutamaleleni na ejoyá? Kaddinutamalelanina.
23 Ddakelile wa Nabuya esile dhuwaddelileni miyo wi Nabuya Yezu omattiyu wafuniye ogulihiwa ottukula pawu,
24 vina mmaleliye olobelela, omenya vina ohiloga: “Eji entapulela maningo aga anaperhekeliwe nyuwo. Ejiyá mukosegevi muddubuwelaga miyo.”
25 Iyene okosana yakakene na kalisiyá mmalelani oja, alogaga: “Kalisi eji entapulela nipagano niswa ninawodheye na nikami naga. Ejiyá mukosegevi mudhidhi wotene ommwenyu, muddubuwelaga miyo.”
26 Vowi mudhidhi wotene onajenyu pawu eji vina onamwenyu kalisi eji, munavuwihege okwa wa Nabuya, ofiyedha siku ninadhiye.
27 Nona ole onja pawu vina ommwa kalisi ya Nabuya mohifwanyelela-mwene onele okaana muladdu mwaha w’ohiriha maningo na nikami na Nabuya.
28 Muttu-muttu arome opima murima waye wi aviziwe, agamala aje pawu vina amwe kalisi.
29 Akala muttu onoja vina onomwa ahiziwaga wi esidhá dhintapulela maningo a Nabuya, onovitotela ottongiwa mwaha wa oja vina omwa.
30 Nona, enjiyá mwa nyuwo ali owobanene vina aredda, ena ahikwa.*
31 Mbwenyi iyo kononelamo pama ejile elihu, kanigattongiwe.
32 Vano nigattongiwaga ninosunzihiwa na Yehova wi nihikoniwe na elabo.
33 Nona abali, mugatugumanela siyari ejo, mujedhegena muttu na mukwaye.
34 Akala muttu onokana dala arome oja vatakulu vaye wila mudhidhi ontugumaninyu muhittongiwe. Mbwenyi mwaha wa dhilobo dhina dhohikala miyo ddinele osasanyedha ddigafiya wenewo.
Manota
^ Na egregu, “musorho.”
^ Na egregu, “musorho.”
^ Na egregu, “musorho.”
^ Na egregu, “musorho.”
^ Kavanaddiwana okwa wa maningo, mbwenyi enaddiwana muttu wobanihile mandano aye na Mulugu.
