1 Korinto 12:1-31
12 Abali miyo ddinfuna wila nyuwo munonelemo pama mwaha wa mivaho dha muya wokoddela.
2 Munoziwa wila vaharoromelinyu* mwannafwara amulugu a ottambi vina mwandhowa wego ku wego wauttukulelani awene.
3 Ovano ddinfuna wi muziwe yawi kawo muttu onkamihedhiwa na guru ya muya wokoddela onloga: “Yezu ddwantowa!” vina kawo muttu onloga wi: “Yezu Nabuya!” ahikamihedhiwaga na muya wokoddela.
4 Dhikalawo mivaho dhottiyana-ttiyana, mbwenyi dhotedhene esi dhindha wa muya wokoddela mmodhene,
5 akalawo mabasa ottiyana-ttiyana mbwenyi Nabuyayá oli mmodha;
6 vina akalawo mabasa ottiyana-ttiyana mbwenyi oli Mulugu mmodha onakamihedha otene okosa mabasayá abo.
7 Mbwenyi nikamihedho na muya wokoddela ninowoneya mwa muttu ddi muttu vina Mulugu ononvaha nikamihedho ntto wi àpurihena attu ena.
8 Muya wokoddela ononvaha mmodha ewodhelo ya ologa na zelu, muya wakakene ononvaha mwina ewodhelo ya ologa na eziwelo,
9 muya wakakene onomukamihedha mmodha okaana nroromelo, mwina ewodhelo ya ovulumutxa,
10 ena anovahiwa ewodhelo ya wira matikiniho, ena ewodhelo ya ovuhulela, ena ewodhelo ya ononelamo akala museluyá ondha wa Mulugu, ena ewodhelo ya ologa dhilogelo dhottiyana-ttiyana; oku ena ewodhelo ya otapulela dhilogelo.
11 Mabasa aba otene ankosiwa na muya wakakene vina mmodhene onimukamihedha muttu ddi muttu bari munfunela Mulugu.
12 Sabwani dhahene ninga nningo nili nimodha, mbwenyi ninna vyano dhinjidhene, vyano eso dhotene masiki dhinjivilevi, nningo nimodha, yakakene vina jili Kristu.
13 Notene nibatiziwe na muya mmodha wila nikale nningo nimodha masiki nikale Ayuda peno Agregu, adhari obe afuru, notene nakelile muya mmodha.
14 Txibarene maningo kanna yano modha, mbwenyi vyano dhinjidhene.
15 Nyalo kologa: “Ninga kaddili nlada kaddinkosa epaddi ya maningo”, masiki dhahene kanigattiyile okala epaddi ya maningo.
16 Vina niyaru kologa: “Ninga kaddili ninto, kaddinkosa epaddi ya maningo,” masiki dhawene kanigattiyile okala epaddi ya maningo.
17 Maningo otene kokala ninto nigewana eni? Maningo otene kokala niyaru, newege onukela na eni?
18 Mbwenyi Mulugu, ohika yano ji yano ya maningo vamburoni vawa dhahene ninga mwafuneliye.
19 Vyano dhotedhene kokala modha, maningo agakalile wuvi?
20 Vyano dha maningo dhihinjiva, mbwenyi nningona nili nimodha.
21 Ninto kaninfwanyela ologa dhahi na nlada: “Miyo kaddinufuna,” nne vina musorho kunfwanyela ologa dhahi na manyalo: “Miyo kaddinufunani.”
22 Ottiya ejo, vyano dha maningo dhinoneya ninga dhobaniletxe sofuneya.
23 Dhipaddi dha maningo dhinonihu ninga kadhikoddeliletxe ninokoya vopita, vina dhipaddi dha maningo ehu dhinonihu ninga dhintota manyazo ninokoddeliha vopitta,
24 mbwenyi dhipaddi dha maningo ehu dhokoddela kadhintamela okoddelihiwa. Mulugu okosa maningo dhahene, nona dhinfuneya ottittimihiwetxa si dhipaddi dha maningo dhihikoddeliletxe,
25 wila mmaningoni muhikale ogawana, mbwenyi dhipaddi dhotene dhiwananege.
26 Akala yano modha ya maningo enotabuwa, vyano dhina dhotedhene dhinotabuwa vamodha; obe akala yano modha ya maningo enottittimihiwa, dhina dhotedhene dhinottaba vamodha.
27 Nyuwo muli maningo a Kristu, vina muttu ddi muttu wa nyuwo onokosa epaddi ya maningo aba.
28 Mulugu ohasakula attu mmulogoni, ohinvaha muttu ddi muttu mabasa aye: Voroma, arumiwi; vanawili, anamavuhulela; vanoraru, anamasunziha; nomala abale anna ewodhelo ya wira matikiniho; vasogorova abale anna ewodhelo ya ovulumutxa; ena ewodhelo ya wakamihedha attu; ena ewodhelo ya osogorhela; ena ewodhelo ya ologa dhilogelo dhottiyana-ttiyana.
29 Kito otene arumiwi? Kito otene anamavuhulela? Kito otene anamasunziha? Kito otene anowodha wira matikiniho?
30 Kito otene akaana ewodhelo ya ovulumutxa? Kito otene anologa dhilogelo dhottiyana-ttiyana? Kito otene akaana ewodhelo ya otapulela?
31 Mbwenyi mutamelege na ntidi wakela mivaho dhinddimuwa, vano ddinele outonyihedhani elobo yokoddeletxa opitta dhina.
Manota
^ Obe, “valinyu attu a malogo meena.”
