1 Korinto 13:1-13
-
Okwela—mukalelo munddimuwa (1-13)
13 Akala ddinologa dhilogelo dhottiyana-ttiyana dha attu na dha anju, mbwenyi ddihikana okwela, ddinkala ninga lanta ninruma, obe oruma wa mujila onvadiwa na mujila mwina.
2 Vina ddigakana owodha wa ovuhulela, wa ononelamo dhoviteya dhotene dha Mulugu, vina ddigakana eziwelo yotene na nroromelo notene ninwodha obwanyula myango, mbwenyi ddihikana okwela, kaddili elo.
3 Ddigavaha dhokana dhaga dhotedhene wila ddajihena ena, obe ddigaperheka maningo aga wila ddivittittimihe, mbwenyi ddihikana okwela, kaddinpura elo.
4 Ole onkwela onovilela vina ddwapama. Ole onkwela kankaana ntxiga. Kanvittittimiha, kanvittukulela,
5 kanruwana, kanzuzumela dhayevi, kammaguvela osilidhiwa. Kanubuwela dhabure dhikoseliwiye.
6 Ole onkwela kanziveliwa na obure, mbwenyi onottaba na ebaribari.
7 Ole onkwela onokunela dhotedhene, onorumela dhotedhene, onojedhela dhotedhene vina onovilela dhotedhene.
8 Okwela txipo kummala. Vano owodha wa ovuhulela, owodha wa ologa dhilogelo dhottiyana-ttiyana, owodha wa okaana eziwelo, dhotedhene esi dhinele omala.
9 Eziwelo yehu kiyakwanile vina ovuhulela wehu kuwakwanile.
10 Mbwenyi ejile eli yowakwana egafiya, ehili yowakwana enele ogomihiwa.
11 Vàli miyo mwana ddaloga ninga mwana, ddobuwela ninga mwana, dhotedhene dhakosimi, ddera ninga mwana. Vano vonuwilemi ddihittiya mikalelo dhotene dhohima.
12 Ovano ninona eddima nigavyang’ana vasupeyoni, mbwenyi ninelege wona mowakwana-mwene. Ovanene eziwelo yaga joyeva, musogorho ddinele okaana eziwelo yowakwana, dhahene ninga muddiziweli Mulugu mowakwana-mwene.
13 Mbwenyi dhinhala sisi ttaru: Nroromelo, njedhelo na okwela, enddimuwa mwa dhotedhene esi okwela.