1 Korinto 14:1-40
14 Mudidele wunuwiha okwela, mbwenyi mvilibihedhe venjene* wila mwakele mivaho dhindha wa Mulugu makamaka mvaho wa ovuhulela.
2 Sabwani onloga na elogelo yina kanloga na attu mbwenyi na Mulugu, vowi kawo onnonelamo masiki alogaga dhoviteya dha Mulugu na muya wokoddela.
3 Vano onvuhulela onowawaraliha, onowapangarhaza vina onowalibiha attu ena na mazu aye.
4 Onloga na elogelo yina onivilibiha mwinya, mbwenyi ole onvuhulela onolibiha mulogo.
5 Miyo ddafuna wi nyuwo motene mulogege dhilogelo dhottiyana-ttiyana, mbwenyi ddinona wi japama ovuhulelaga. Txibarene muttu onvuhulela munddimuwa ompitta muttu onloga dhilogelo dhottiyana-ttiyana, ehili agatapulela dhilogiliye wi mulogoyá olibihiwe.
6 Abali, miyo ddigaukamihedhileni dhavi kodha ouwonaniwo ddilogaga dhilogelo dhihinziwa nyuwo? Ddinona wi ddigaukamihedhileni kodha ddilogaga mazu addeliwemi na Mulugu, na eziwelo, na ovuhulela obe masunziho.
7 Yakakene jimpadduwa na esile dhihinna egumi mbwenyi dhinruma, ninga flauta na arpa,* akala muttu onobayá kanttiyaniha wobawa, enaziweye dhavi akala enobiwaya flauta obe arpa?
8 Akala oruma wa parhaza kuniweya deretu, bani onadhowe oraba koddo?
9 N’ekalelo yakakene, akala nyuwo munologa dhilogelo dhottiyana-ttiyana, vano kamunloga na mazu ohirutxa ononelamowa, attu anaziwe dhavi esile dhinfunenyu ologa?
10 Mwilaboni munologiwa dhilogelo dhinjidhene, mbwenyi dhotedhene dhinoziwiwa.
11 Miyo ddigahinonelemo elogelo ya muttu onloga na miyo ddinomukalela mwana-wedda, ole onlogayá onoddikalela vina mwana-wedda.
12 Dhahene ninga nyuwo vina munozuzumela mivaho dha muya wokoddela, tamelaní wakela mivaho dhinlibiha mulogo.
13 Egali dhawene ole onloga na elogelo yina alobele wila awodhe otapulela mazu aye.
14 Ddigalobelaga na elogelo yina, kahiyo miyo onloga, mbwenyi mvaho wakelilemi na muya wokoddela, masiki dhawene miyo kaddinnonelamo enlogimi.
15 Txini enfwanyela okosiwa? Ddinele olobela na mvaho wakelilemi na muya wokoddela vina ddinele olobela wila attu anonelemo esile dhinlogimi. Ddinele wiba jibo na mvaho wakelelemi na muya wokoddela vina ddinele wiba jibo wila attu anonelemo esile dhinlogimi.
16 Akala munomutamalela Mulugu mwaha wa mvaho wakelilenyu na muya wokoddela, muttu ohisunzihiwe oli vari venyu onawodhe dhavi ologa “Amen” mwaha wa nlobelo nenyu na otamalela, muttuyá ahinonelagamo dhinloginyu?
17 Ebaribari wi weyo onomutamalela Mulugu n’ekalelo yapama, mbwenyi muttu mwina kanlibiheya.
18 Ddinomutamalela Mulugu mwaha wa miyo ologaga dhilogelo dhinjidhene wupittani nyuwo motene.
19 Vano, mmulogoni japama ologamo mazu matanu annonelamo attu ena wila ddasunzihe, ottiya ologa mazu matxikwi kumi na elogelo ehinnonelamo attuyá.
20 Abali, kamubuwelege ninga aima mbwenyi, mukale ninga aima mwa esile dhili dhabure, vina mubuwelege ninga attu owarala.
21 Elebiwa dhahi Munlamuloni na Mizé: “‘Ddinele warumela attu anloga dhilogelo dhottiyana-ttiyana na a dhilabo dhina, wila aloge na nlogo ntti. Masiki dhawene kanaddivuruwane,’ onloga ddi Yehova.”
22 Nona, ologa dhilogelo ezinddiyelo enimuttukulela muttu ohinrumela orumela, ottiya omusunziha ole onrumela; oku ovuhulela kahiyo wa abale ahinroromela, mbwenyi ezinddiyelo ya wasunzihana aroromeli.
23 Dhahene mulogo wotene ogagumana vina motene mugalogaga dhilogelo dhottiyana-ttiyana, agavolowamo attu ahisunzile obe ahinroromela, kanaloge wila nyuwoyá mutaduwa?
24 Mbwenyi akala nyuwo motene munovuhulela vano avolowamo muttu ohinroromela obe muttu ohisunzile, iyene onele ottongiwa vina onele opimiwa na otene.
25 Dhoviteya dha mmurimani mwaye dhinele woneya, venevo iyene onele okokora, onoworamihedha kove vati, onomwebedha Mulugu, alogaga: “Txibarene, Mulugu oli vari venyu.”
26 Abali, txini enfwanyela okosiwaga? Mugatugumana mumodhani, mwina okaana masalmo, mwina okaana masunziho, mwinagu ohakela muselu wa Mulugu, oku mwina onologa elogelo yina vina mwina onowodha otapulela. Dhotedhene esi dhikosiwege wila mulibihane.
27 Agakalavo muttu onloga elogelo yina, akale eli obe araru bahi, aromege ologa muttu mmodha-mmodha vina akalevo mwina atapulelege.
28 Vano agahikalevo muttu wotapulela, iyeneyá agakala mmulogoni akale omalene, aloge mmurimani mwaye vina na Mulugu.
29 Vagakala anamavuhulela aloge eli obe araru bahi, attu ena avuruwanege wi aziwe enlogiwayá.
30 Mwina ogilatile, agakela muselu wa Mulugu, ole waloga amaale.
31 Muvuhulelege mmodha-mmodha, dhawene motene munele osunzihiwa vina munele olibiheya.
32 Anamavuhulela anofwanyela wang’anela mulabihedho onlabanina mvaho wa ovuhulela wakelilani na muya.
33 Mulugu, Mulugu wa murenddele kantota ohiwanana.
Dhahene ninga mumpadduwelani mmilogoni dhotedhene dha akoddeli,
34 ayana akalege omalene mmilogoni, vowi kanrumelihiwa ologa. Ottiya ejo, ewelelege ahipambihaga dhahene vina ninga munlogela Nlamulo.
35 Awene agafuna osunza elobo, àvuze amamunawa agakala vatakulu, sabwani jamanyazo muyana ologaga mmulogoni.
36 Ddi nyuwo bahi oromilena nzu na Mulugu, obe ddi nyuwo bahi alaleyeliwe nzuná?
37 Akala muttu onoziwa wi namavuhulela, obe ohakela mvaho wa muya, onofwanyela ononelamo wi dhinulebelani miyo dhoruma dha Nabuya.
38 Akala muttu onokodda dhoruma eso, mmuttiye dhawene.*
39 Nona abalaga, mutamelevi okala anamavuhulela, kammukoddihe muttu ologa dhilogelo dhottiyana-ttiyana.
40 Mbwenyi dhotedhene dhiriwege na oriheya vina na mukalelo wotadeya.
Manota
^ Obe, “mutamelege na ntidi.”
^ Arpa, yali epano yobiwa enladdana na viyola wa masaka abano.
^ Obe txino, “akala muttu kanziwa onakalevi dhawene s’ohiziwa.”
