1 Korinto 15:1-58
15 Abali, ovano ddinfuna dduwubutxedheni mwaha wa miselu dhapama dhulaleyeleni miyo, dhirumelilenyu vina dhiroromelilenyu.
2 Mugahittiye weddana miselu dhapama dhulaleyileni miyo munele ovuneya, mbwenyi mugattiya, nroromelo nenyu ninakale nebewene.
3 Dhilobo dhoroma dhulaleyileni miyo, sisile dhiwalemi dhahene ninga munlogela malebo wi Kristu okwela dhottega dhehu.
4 Iyene ohekiwa vina ovenyihiwa mukwani siku nanoraru, dhahene ninga munlogela Malebo.
5 Omuttanyuwela Sefa,* mmaleliye wahattanyuwela arumiwi Kumi na Eli.
6 Vasogorhova iyene ohattanyuwela abali 500 dila modhene, enjiyá mwa aboyá akalawo, oku ena amala okwa.*
7 Nomala omuttanyuwela Tiago vina ohattanyuwela arumiwi otene.
8 Mbwenyi omamalelowá oddittanyuwela miyo vina, ninga mwana obaliwe ohinatti ofiya mudhidhiya.
9 Nona, mwa arumiwi otene, miyo ddili mung’onoyávo vina kaddinfwanyelela okuweliwa murumiwi, sabwani ddifwara-fwara mulogo wa Mulugu.
10 Mbwenyi mwaha wa mahala a Mulugu, miyo ddili ejile elimi. Vina mahalayá kaddakelile ebewene, ottiya ejo ddilaba wapitta arumiwi ena. Vano olabile kahiyo miyo, mbwenyi ba mahala a Mulugu ali na miyo.
11 Nona, kintanala akala ddi miyo obe bawene, notene nilaleya muselu wakakene oukalihileni nyuwo aroromeli.
12 Akala ninlaleya wi Kristu ovenyihiwa mukwani, kito ena mwa nyuwo anlogelani wi abale akwile kanavenyihiwe mukwani?
13 Akala txibarene abale akwile kanavenyihiwe mukwani, bahito Kristu kavenyihiwe mukwani.
14 Mbwenyi akala Kristu kavenyihiwe mukwani, ninlaleyela ebewene vina nroromelo nenyu ttebewene.
15 Mbwenyi akala txibarene abale akwile kanavenyihiwe mukwani, Mulugu kanvenyihile Kristu, vina eji enoniha wi ninomuzivalela Mulugu, mwa ologa wi ohinvenyiha Kristu mukwani.
16 Vano akala akwile kanavenyihiwe mukwani, Kristu vina kavenyihiwe mukwani.
17 Vina akala Kristu kavenyihiwe mukwani, nroromelo nenyu kaninna mabasa. Nyuwo mulivi na dhottega dhenyu.
18 Akala eli dhawene, abale akwile* anfwaraga Kristu arimela.
19 Akala omujedha wehu Kristu kwa nsaka nttino bahi, ninofwanyela okubanyedhiwa opitta attu otene.
20 Mbwenyi iyo ninoziwa wi Kristu ovenyihiwa mukwani, ninga muttaji mwa abale akwile.
21 Vowi okwa odhile mwa muttu mmodha bahi, ovenyihiwa mukwani vina odhile mwa muttu mmodha.
22 Dhahene ninga otene ankwa mwaha wa Adamu, otene vina anele wakela egumi mwaha wa Kristu.
23 Mbwenyi muttu-muttu onavenyihiwe mudhidhi waye: Woroma ddi Kristu, ngamalá abale ali mumodhani na Kristu, nsaka n’odha waye.
24 Vina omagomo ogafiya, iyene onele omperhekela Omwene Mulugu, odduwene oli Mulugu waye vina Babi. Ejiya enapadduwe agamala wagomiha, aguverno otene, onddimuwa wotene na owodha wotene.
25 Vowi enofuneya wi iyene alamulele ofiyedha Mulugu wawika amwiddani aye otene, mutxiddo mwa manyalo aye.
26 Okwa ddi mwiddani womariha, onatolotxiwe.
27 Mulugu “ohika dhilobo dhotedhene mutxiddo mwa manyalo a Kristu.” Mbwenyi mazu awi ‘dhilobo dhotedhene dhihikiwa mutxiddo mwa manyalo a Kristu,’ kintapulela wi Mulugu onomwiwelela Kristu. Mbwenyi anfuna aloge wi Mulugu, onokosiha wi dhilobo dhotedhene dhimwiwelele Kristu.
28 Vano dhilobo dhotedhene dhigaperhekeliwa iyene, Mwana onele oviperheka mmadani mwa Mulugu, omperhekeli dhotedhene, dhawene Mulugu onele okala mwinya wa dhilobo dhotedhene.
29 Akala eli dhawene, txini enakose abale ambatizeliwa okwa? Akala txibarene abale akwile kanavenyihiwe, kito ambatizeliwa eni oku afunaga okwa?
30 Iyo ninkalela eni vangovini mudhidhi wotene?
31 Masiku otene, ddinogumanana okwa. Abali, miyo ddinogaya mwaha wenyu, nyuwo muli anamafwara a Kristu, Nabuya wehu.
32 Akala abale akwile kanavenyihiwe, ddiwaneleni dhahene ninga attu ena na dhinama dhowopiha o Éfezo? Bahito, “ndhoweni nijeni, nimweni, sabwani mangwana ninele okwa.”
33 Kamurumele onyengettiwa.* Wandana na attu abure onononga mweddelo wapama.
34 Mukane yubuwelo yapama, mukosaga dhili dhapama, kamwire yottega, vowi ena kanimuziwa Mulugu. Ddinlogela dhawene wi ddutoteleni manyazo.
35 Txino muttu onodha ovuza dhahi: “Aliba okwa, anavenyihiwe dhavi? Anavenyihiwe na ekalelo gani ya maningo?”
36 Tolo-wé! Ejile enaliwa kimmela ehiromile okwa.
37 Muttu kanala muri wawunuwene, vano onala ttaga, peno ya tirigu obe yina.
38 Mbwenyi Mulugu onokosiha ttaga ejo wunuwa dhahene ninga munfuneliye, vina ttaga ji ttaga enunuwa, enokana maningo awa.
39 Maningo otene kanligana, akalawo maningo a attu, maningo a dhinama, maningo a balame na maningo a oba.
40 Dhikalawo dhottanddiwa dha wirimu na dhottanddiwa dha velaboni ya vati; okoddela wa dhottanddiwa dha wirimu onottiyana na okoddela wa dhottanddiwa dha velaboni ya vati.
41 Okoddela wa nzuwa onottiyana na okoddela wa mweri, vina okoddela wa vineneri kottiyana, okoddela wa neneri ji neneri onottiyana na yina.
42 Yakene jimpadduwa na ovenyihiwa mukwani wa abale akwile. Aninteriwa maningo anvudda, anvenyihiwa na maningo ahinvudda.
43 Aninteriwa ahinna nttittimiho, anvenyihiwa odhalene nttittimiho. Aninteriwa awobana, anvenyihiwa a guru.
44 Aninteriwa maningo omuttu, anvenyihiwa maningo omuyani. Akala akalawo maningo a omuttu, akalawo vina maningo a omuyani.
45 Dhahene ninga mulebeliwani: “Mulobwana woroma Adamu odha okala muttu oliwo.” Adamu womariha okala muya omvaha egumi.
46 Vano maningo a omuyani kadhile vamaromo. Adhile vamaromo maningo a omuttu, omamalelowa odha a omuyani.
47 Mulobwana woroma obudduwile vati vina wubiwe na mattaka, mulobwana wanawili ondha wirimu.
48 Attu obiwe na mattaka, anligana na ole wubiwe na mattaka, vina attu a wirimu anligana na ole wa wirimu.
49 Vina dhahene ninga muladdanilehu na ole wubiwe na mattaka, ninele oladdana vina na ole wa wirimu.
50 Ddinouwaddelani eji, abali, kinwodheya maningo na nikami, ovolowa Mumweneni mwa Mulugu vina kinwodheya ejile envudda okala ehinvudda.
51 Kavuruwanani! Ovano ddinfuna dduwaddeleni yoviteya ya Mulugu: Kahiyo otene mwa iyo anakwe, * mbwenyi ninele osadduliwa.
52 Ejoyá enapadduwe momaguva, ninga okapila wa mento, mudhidhi onfuna wobiwa parhaza womariha. Parhazayá onele wiweya, abale akwile anele ovenyihiwa na maningo ahinvudda vina iyo ninele osadduliwa.
53 Vowi maningo aba anvudda, anele osadduliwa wi akale maningo ahinvudda vina maningo aba ankwa, anele osadduliwa wi akale maningo ahinkwa.
54 Mudhidhi onfuna osadduliwa maningo aba anvudda akala maningo ahinvudda vina maningo aba ankwa akala maningo ahinkwa, venevo anele wakwanihedheya mazu aba alebiwe dhahi: “Okwa otolotxiwa namukalakala.”
55 “Okwa, opemberha wawo oli wuvi? Okwa, guru yawo ya otolotxa* eli wuvi?”
56 Guru ya otolotxa* entatamula okwa ji yottega, vina owodha wa yottega tti Nlamulo.*
57 Ninomutamalela Mulugu vowi onivaha guru dha opemberhana okwa mwaha wa Nabuya wehu, Yezu Kristu!
58 Nona, abalaga okweleya, mukale oliba, ohittekenyeya. Mudhidhi wotene mukanege mabasa menjene, mmulabelaga Nabuya, oku muziwaga wi mabasa animulabelinyu Nabuya na ntidi kahiyo ebewene.
Manota
^ Onkuweliwa Pedro.
^ Na egregu, “anogona mukwani.”
^ Na egregu, “angona mukwani.”
^ Obe, “kamupeleye malago.”
^ Na egregu, “anagone mukwani.”
^ Obe, “veneno yawo.”
^ Obe, “veneno.”
^ Obe, “Nlamulo ninovaha owodha yottega.”
