1 Korinto 3:1-23
3 Abali, miyo kaddilogile na nyuwo ninga attu aneddihiwa na muya wa Mulugu, ddilogile na nyuwo ninga attu aneddihiwa na dhubuwelo dha attu,* ninga attu ahinnonelamo pama dila dha Kristu.
2 Miyo dduwamwihileni nibele ottiya yoja yovadda, sabwani nyuwo kamwalibiletxe. Txibarene, ofiyedha ovanene nyuwo kamulibiletxe,
3 vowi muneddihiwa na dhubuwelo dha attu. Ddiziwa wi vari venyu vakala aje na owanawana, kahiyo ebaribari wi muneddihiwa na dhubuwelo dha attu vina munedda ninga attu?
4 Muttu mmodha agaloga: “Miyo ddininfwara Paulo,” mwina aloga, “Miyo ddininfwara Apolo,” kamunona wi munedda ninga attu a elabo?
5 Apolo bani? Kito Paulo bani? Iyo nili arumiwi bahi aukamihedhileni okala anamafwara, iyo nikosile ejile erumiwehu wira na Nabuya wehu.
6 Miyo dditxeya, Apolo ohelela manje, mbwenyi ddi Mulugu wonuwiha,
7 dhahene ole onala, kahiyo elo, nne ole onhelela manje, mbwenyi Mulugu onunuwiha.
8 Ole onala na ole onhelela manje ali muttu mmodha, mbwenyi muttu-muttu onakele nlivo naye mowiwanana na mabasa aye.
9 Iyo ninlaba vamodha na Mulugu. Nyuwo muli mundda wa Mulugu, obuwene onlimiye vina nyuwo muli nyumba ya Mulugu, ejuwene emmagiye.
10 Miyo ddimwita alsersi na mahala a Mulugu avahiwemi, ninga namamaga wa ttotto, mbwenyi ena anomaga vadhulu va alsersiva. Nona muttu-muttu akalele txenjewa mukalelo ommagiye valsersiniva.
11 Kawo muttu onfwanyela omwita alsersi mwina, ahili ole omalile witiwa, oli Yezu Kristu.
12 Akala muttu onomaga valsersiniva na woru, parata, malugu ozerimela, tabwa, mani, obe sengwe,
13 mabasa a muttu ddi muttu anele woneya nigafiya sikuna, motto onele woniha akala mabasaya ali a pama obe ali abure.
14 Motto ogahiddumeye ejile emagile muttu vadhulu va alsersi, muttu oddo onele wakela nlivo naye.
15 Akala mabasa a muttu anozwa na motto, iyene onele oyelela, mbwenyi iyeneyá onele ovuneya, onakale ninga ovuneyile vamottoni.
16 Nyuwo kamunziwa wi muli mparha wa Mulugu vina muya wa Mulugu oli na nyuwo?
17 Akala muttu onotolotxa mparha wa Mulugu, Mulugu onele omutolotxa oddoyá, sabwani mparha wa Mulugu bokoddela vina nyuwo muli mparhaya obo.
18 Kamuvinyengette mwanya: Akala muttu onowubuwela wi okaana eziwelo mwilaboni mpuno* akale ninga tolo, dhawene panakaliye wa eziwelo.
19 Sabwani zelu ya elabo ejino kahiyo elo vamentoni va Mulugu, ninga mulebeliwani: “Iyene onowakosiha aziwitxi omottela vamuregani vaye.”
20 Elebiwa dhahi: “Yehova onoziwa wi dhubuwelo dha aziwitxi, kadhinlabela elo.”
21 Ahikalevo onvittukulela sabwa ya esile dhinkosa attu, sabwani dhotedhene senyu.
22 Akale Paulo, akale Apolo, akale Sefa,* ekale elabo, ekale egumi, okale okwa, dhikale dhilobo dhovanene, dhikale dhilobo dhinadhe, dhotedhene senyu.
23 Vano nyuwo muli attu a Kristu, vina Kristu ddwa Mulugu.
Manota
^ Na egregu, “muttu womaningoni.”
^ Obe, “nsaka nttino.” Kang’ana Mazu Atapuleliwe.
^ Onkuweliwa vina Pedro.
