1 Korinto 4:1-21
4 Iyo ninfuna wila attu anonege ninga arumiwi animuttiddela mabasa Kristu vina emeleli anziwiha dhoviteya dha Mulugu.
2 Enjedhiwana emeleli jawi akale attu ororomeleya.
3 Kaddintanala opimiwa na nyuwo, nne na tribunali ya attu, sabwani nne miyo ddamwinya, kaddinvipima.
4 Sabwani kaddinna elo yovisumelana ddamwinya. Vano kahiyo wi ddili woligana, vowi onddipima ddi Yehova.
5 Nona kamuttonge elo mudhidhiya ohinafiya, mujedhe ofiyedha nsaka ninadhe Nabuya. Iyene onele odhana va txezani esile dhinkosiwa mwiddimani vina onele woniha esile dhinubuwela attu mmurimani mwawa, venevo muttu-muttu onele wakela nttittimiho naye ninanvahe Mulugu.
6 Abali, mwa dhilobo esi dhilogilemi, miyo na Apolo nihuttiyedhani yotagiha wila nyuwo mupurelemo mwang’anaga merelo ehu; musunze na yoruma eji: “Mufwarege bahi ejile elebiwe.” Mugakosa dhahene kamunakale attu ovittukulela, musakulagana muttu na mukwaye.
7 Bani onukosiha weyo okala wottiyana na ena? Txibarene, txini enna weyo, ehakeliliwe? Akala wile wakela dhotedhene dhina weyo, ongayelanani ninga kul’ovahiwa?
8 Nyuwo munubuwela wi mukaana dhotedhene dhinfunenyu? Munubuwela wi murela? Muroma olamulela, muhili na iyo? Miyo txibarene ddanfuna wi nyuwo murome olamulela, wi iyo nilamulele vamodha na nyuwo.
9 Miyo ddinona wi Mulugu onittiya iyo arumiwi vamburoni vomariha ninga attu attongeliwe okwa wila noniwe na otene, sabwani iyo nikala ninga teatru ya elabo, ya anju vina ya attu.
10 Iyo nili atolo mwaha wa Kristu, vano nyuwo muli a malago mukalaga mumodhani na Kristu. Iyo nili owobana, mbwenyi nyuwo muli oliba. Nyuwo munottittimihiwa, vano iyo kaninttittimihiwa.
11 Mpaka ddabuno ninokwa na dala, ninokwa na nttona, kaninna guwo dhowakwana, ninowasuliwa, * kaninna vego vokala,
12 nikosa mabasa ovadda na mada ehu, varuwaniwehu nanruriha, vafwara-fwariwehu nanvilela n’okurumuwa;
13 vazivaleliwehu nannakula na murima wofwasa; nikala ninga lixu na mwilaboni vina dhotowa ttima dha dhilobo dhotedhene.
14 Kaddilebile dhilobo esi wi ddutotenina manyazo, mbwenyi wi ddusunzihenina ninga anaga okweleya.
15 Masiki vanna nyuwo attu 10.000 anusunzihani mukalelo wa onfwara Kristu, kamunna ababi enjene, sabwani ddi miyo okalile babi wenyu mwa Kristu Yezu, sabwa ya oulaleyelani miselu dhapama.
16 Nona ddinoukokomezani, mudditagihe miyo.
17 Jijene enurumelani miyo Timóteo, mwanaga wokweleya, wororomeleya mwa Nabuya. Iyene onele oubutxedhani musunzihelo waga mowiwanana na Kristu Yezu, dhahene ninga munsunzihedhimi dhipaddi dhotedhene, mmilogoni dhotedhene.
18 Attu ena anovigwarula, obuwelaga wi miyo kaddinadhe ouwonani.
19 Mbwenyi Yehova agafuna, ddinele odha ouwonani mohigonela, ddinofuna wawona attu abo anvigwarula, kaddinfuna oziwa esile dhinlogani, ottiya ejo ddinfuna ddiziwe akala ahikana owodha wa Mulugu obe akala kanna.
20 Omwene wa Mulugu, kunonihiwa na mazuvi bahi, mbwenyi ononihiwa na owodha wa Mulugu.
21 Nyuwo munfuna eni? Ddidhe dduwoneni na muwasulo obe na okwela vina na murima wokurumuwa?
Manota
^ Obe, “ninotabutxiwa.”