1 Korinto 5:1-13
5 Mwahaya bwawi vari venyu vanologiwa merelo a ogonihana wonyakuwa;* ogonihana* ninga oku kuniriwa na attu a malogo meena. Okalawo muttu omutelile mwadhi babe.
2 Koddi nyuwo munogayana esidhá? Kamugafwanyelile okubanya vina mmuttamagihavo vari venyu mulobwana oddo wirile esidhá?
3 Masiki ddihikalaga wenewo, murima waga oli wenewo na nyuwo, dhahene mulobwana oddo miyo ddimala omuttonga ninga ddili wenewo na nyuwo.
4 Mugatugumana na nzina na Nabuya wehu Yezu, muziwaga wi murima waga oli na nyuwo na guru dha Nabuya Yezu,
5 mumperekele muttu oddo Satana, wila mweddelo wabure odhiliyena mmulogoni ogomemo. Dhahene mulogoyá onele okala wokoddela vina onele ovuneya siku na Nabuya.
6 Mwahayá wogayana wenyu kukalile. Nyuwo kamunziwa wi emela eng’onovi enodhakuwiha ottu wotene omunyiwe?
7 Murahile emela yawale wila mukale ottu muswa omunyiwe ohinna emela, dhahene ninga elinyu. Txibarene, Kristu nibila nehu na Paskwa omala okuttiwa.
8 Nona ndhoweni nijeni mattanga, kanijeni na emela yawale nne na emela ya obure vina na ya dhotakala, mbwenyi nijeni na pawu dhotowa emela, dhinoniha okuluveleya vina ebaribari.
9 Mukartani mwaga ddihulebelani wi muttiye wedda* na abale anira dha ogonihana wonyakuwa.
10 Kaddinawaddana attu otene a mwilaboni anira dhogoniyana wonyakuwa, ambava, aliba ntxiga obe anebedha dhingamuttu, kokala dhahene egafuneya nyuwo obudduwamo mwilabonimwá.
11 Ovano ddinoulebelani wi muttiye wedda * na muttu ddi muttu onloga wi ddili mbali, onira dha ogonihana wonyakuwa, * muliba nrima, onebedha dhingamuttu, onloga mazu osuva, mulezeli obe mbava, muttu ninga oddo, kamujege vamodha na iyene.
12 Mabasa aga kahiyo a wattonga abale ahili a mmulogoni. Nyuwo munofwanyela wattonga abale ali a mmulogoni,
13 mbwenyi Mulugu ddinattonga abale ahili a mmulogoni. “Mmuttamagihe mmulogoni muttu oddo onkosa dhilobo dhotakala.”
Manota
^ Na egregu, porneya. Kang’ana Mazu Atapuleliwe.
^ Na egregu, porneya. Kang’ana Mazu Atapuleliwe.
^ Obe, “otugumana.”
^ Obe, “wandana.”
^ Kang’ana Mazu Atapuleliwe, anloga: “Ogonihana wonyakuwa.”
