1 Korinto 7:1-40
7 Vano, mwaha wa esile dhiddilebelinyu, japama mulobwana ohigona na muyana;
2 mbwenyi, mwaha wa winjiva wa ogonihana wonyakuwa,* mulobwana ddi mulobwana akaane mwadhiye vina muyana ddi muyana, akaane mamunaye.
3 Mulobwana otelile, amvahe mwadhiye eninfwanyelela,* muyana vina oteliwe amvahe mamunaye eninfwanyelela.*
4 Muyana oteliwe kahiyo mwinya wa maningo aye, mbwenyi mwinya ddi mamune; yakakene vina, mulobwana otelile kahiyo mwinya wa maningo aye, mwinya ddi mwadhiye.
5 Mulobwana otelile na muyana oteliwe, ahikoddege ogonihana na ole oteliwiyena, ehili mudhidhi wiwananelani wila aviperekele malobelo, mugamala mwiyelele ogona vamodha wila munagwele vamuregani wa Satana mwaha wa ohivyang’anela wenyu.
6 Ddinlogela ejo wila muziwe wi enorumelihiwa, mbwenyi kaddinoulamulani.
7 Ddanfuna wila alobwana otene akale ninga miyo. Mbwenyi Mulugu ohinvaha muttu ddi muttu owodha waye; nona, ena anotela, ena kantela.
8 Ovano ddinloga na abale ahitelile* vina na ayana ali amamukwela, wila japama-wene okala dhahene ninga miyo.
9 Vano akala kamunwodha ovyang’anela, mutele obe muteliwe; vowi japama-wene otela obe oteliwa ehili oddumeya murima sabwa ya wubuwela dha ogonihana.
10 Mwa abale atelilena, ddinowavaha malago, muyana oteliwe ahimuttiye mamunaye, malago aba kahiyo aga, ba Nabuya.
11 Mbwenyi akala onomuttiya, ahiteliwe, obe ewanane na mamune; vina mulobwana otelile ahimuttiye mwadhiye.
12 Mbwenyi ena ddinowawaddela, ndde, miyo, ottiya Nabuya: Akala mbali okaana mwadhiye ohinimuroromela Nabuya, nanda mwadhiyeyá afunavi okala na iyene, ahimuttiye;
13 akala muyana okaana mamune ohinimuroromela Nabuya vina onfunavi okala na iyene, muyanayá, ahimuttiye mamune.
14 Sabwani mamuni ohinimuroromela Nabuya ohikoddelihiwa mwaha wa mwadhiye, vina muteliwi ohinimuroromela Nabuya ohikoddelihiwa mwaha wa mbali, kohikala dhahene aninyu kagakalile okoddela, ovano awene ali okoddelene.
15 Vano akala mulobwanayá obe muyanayá ohinimuroromela Nabuya onfuna amuttiye, mbali obe murogorayá kammageleliwa okala vamodha, sabwani Mulugu ohukuwelelani mmurenddeleni.
16 Muteliwi, akala onokalavi na mamuno onziwa dhavi wila kunanvune mamunoyá? Obe, mamuni, akala onokalavi na mwadhiyo, onziwa dhavi wila kunamvune mwadhiyoyá?
17 Vano muttu-muttu akalegewo dhahene ninga mwaliye, mudhidhi omukuwelile Yehova Mulugu. Nikokomezo ntti, ddinowaddela milogo dhotedhene.
18 Akala mulobwana okuweliwe na Mulugu bamalile otxetteliwa, akale dhawene. Akala mulobwana okuweliwe ahinatti otxetteliwa, katamele otxetteliwa.
19 Otxetteliwa kuntapulela elo, vina ohitxetteliwa kuntapulela elo; enfuneya ku wiwelela dhoruma dha Mulugu.
20 Muttu ddi muttu akale dhawene ninga yaliye mudhidhi okuweliwiye.
21 Weyo okuweliwe buli mudhari? Kuzuzumele ejoyá, mbwenyi ogawodha ovifurula, kapura gari ejo.
22 Sabwani wotene ole okuweliwe na Nabuya bali mudhari, ddabuno ofuruleya wi akale wa Nabuya; yakakene vina, ole okuweliwe banna ofuru, ddabuno mudhari wa Kristu.
23 Nyuwo muguliwa na muttengo munddimuwa, kattiyani okala adhari a attu.
24 Abali, muttu ddi muttu akale dhawene vamentoni va Mulugu, ninga yaliye mudhidhi okuweliwiye.
25 Ovano mwa abale ahinatelaga obe ahinateliwaga, kaddinna yoruma ya Nabuya, mbwenyi ddinloga ejile enonimi wi japama ninga muttu wororomeleya mwaha wa mahala a Nabuya.
26 Mwaha wawi ninkalawo masaka a makattamiho, ddinona wi japama-wene mulobwana okala dhawene ninga eliye.
27 Weyo ohitela? Bahito, kutamele omuttiya mwadhiyo; weyo kutelile? Bahito kumutamele muyana.
28 Vano masiki otele kunttega, vina akala muttu ohitelile* onotela, kanttega. Mbwenyi abale anatele anele ogumanana makattamiho mwigumini mwawa, ddinilela wi ddurabeliheni makattamihoyá abo.
29 Ddinouwaddelani eji abali, mudhidhiyá ohalile oli mung’onovi, oromana ovanene, abale atelile akale ninga katelile,
30 abale anunla, akale ninga kanunla; abale anttaba, akale ninga kanttaba; abale angula akale ninga kanna;
31 abale anjavo dhinvaha elabo ejino, akale ninga kanjavo mwawakwana-mwene, sabwani dha mwilaboni dhinosadduwa.
32 Txibarene, ddinfuna wi muhikane yowuzuzumihani. Mulobwana ohitelile onzuzumela dhilobo dha Nabuya, sabwani onfuna wi amwagalalihe Nabuya.
33 Vano mulobwana otelile onzuzumela dhilobo dha mwilaboni, sabwani onfuna wi amwagalalihe mwadhiye,
34 vina oli wogaweya. Vina muyana ohiteliwe, ohinagonaga na mulobwana, onzuzumela dhilobo dha Nabuya, wi akale wokoddela omaningoni vina muyubuweloni; vano muyana oteliwe, onzuzumela dhilobo dha mwilaboni, sabwani onfuna amwagalalihe mamune.
35 Ddinlogela ejiya mwaha wa opama wenyu, mbwenyi kaddinoukoddihani; miyo ddinfuna wila mukosege eli yapama vina mmulabelege Nabuya mudhidhi wotene, muhikanaga yowuzuzumihani.
36 Akala muttu omala okwaranya vyaka dha muzombweni,* vina onowona wi kanwodha wang’anela efunelo yaye ya ogonihana, atele, kanttega.
37 Vano akala muttu onogana mmurimani mwaye vina ahikana efunelo ya otela, mbwenyi aziwa wang’anela efunelo ya ogonihana oku baganile mmurimani mwaye wi kanfuna otela, onokosa pama.
38 Dhahene vina, ole otelile onokosa yapama, mbwenyi ole ohitelile ddikosiletxe yapamayá.
39 Muyana oteliwe onomageleliwa okalavi na mamunaye oku mamuneya baliwo. Vano akala mamuneyá onokwa, iyene ohifuruleya wila ateliwe na ole oninfuniye, mbwenyi ateliwe mwa Nabuya bahi.
40 Miyo ddinona wi iyene onagaleletxe agahiteliwe, vina ddinokuluvela wi ddikaana muya wokoddela wa Mulugu.
Manota
^ Na egregu, porneya. Kang’ana Mazu Atapuleliwe.
^ Enaddiwana, efunelo ya ogonihana wa attu atelanile.
^ Enaddiwana, efunelo ya ogonihana wa attu atelanile.
^ Mazu aba a Egregu, anaddiwana abale ali amamukwela, attiyilena obe amwalanile.
^ Na Egregu, ole ohinagonaga na muttu, masiki akale mulobwana obe muyana.
^ Entapulela wi ohikwaranya nsaka ninttabwetxa azombwe wunlela ogonihana.