1 Korinto 8:1-13
8 Ovano mwaha wa dhoja dhimperhekeliwa amulugu, ninononelamo wi notene nikaana eziwelo mwaha wa makaniya aba, mbwenyi eziwelo enomukosiha muttu ovittukulela vano okwela onolibiha.
2 Akala muttu onowubuwela wi onoziwa elobo, kanatti oziwa ninga mwafuneyelani.
3 Vano akala muttu onomukwela Mulugu, Mulugu onomuziwa muttuyá oddo.
4 Mwaha wa oja dhoja dhiperhekeliwe amulugu, ninoziwa wi amulugu kahiyo elobwene mwilaboni vina kawo Mulugu mwina ahili mmodha bahi.
5 Masiki akalagawo abale ankuweliwa amulugu peno wirimu, peno vati, dhahene ninga mukalelaniwo “amulugu” enjene vina “anabuya” enjene,
6 mwa iyo oliwo Mulugu mmodha, Babi, oli nipara na dhotedhene; iyo ninimukalelawo iyene; vina oliwo Nabuya mmodha, Yezu Kristu, opaddutxiwe na Mulugu wila akose dhotedhene, iyo nikaana egumi mwaha waye.
7 Vano kahiyo otene anna eziwelo eji. Mwahayá bwawi attu ena annawebedha amulugu, nona agajaga dhoja eso, anona ninga dhikutteliwe amulugu, dhawene mubuwelo* wawa wowobana onowasumulela.
8 Oja kunanandanihe na Mulugu, nona kaninakale ottabwa nigahije nne kaninakale apamayá nigaja.
9 Mukale pasope wi ofuru wenyu wosakula onakale nlugu nowakwakwattutxa abale anna nroromelo nawobana.
10 Sabwani akala muttu onna nroromelo nawobana onouwona weyo ojaga dhoja mumparani mwa amulugu, nroromelo naye nawobana kaninamuttukulele iyene oja dhoja dhiperhekeliwe amulugu?
11 Nona na oziwa wenyu munotolotxa nroromelo na mbalinyu wobanile, odduwene okweliwe na Kristu.
12 Mugàttegelaga dhahene abalinyu mutolotxaga mubuwelo * wawa wowobana, munimuttegela Kristu.
13 Nona akala yoja enokwakwattutxa nroromelo na mbalaga, kaddinaje vina nama wila ddihimukwakwattutxe mbalaga.