1 Korinto 9:1-27
9 Kaddinna ofuru? Kaddili murumiwi? Kaddimonile Yezu, Nabuya wehu? Nyuwo kamuli mabasa aga, animuttiddelimi Nabuya?
2 Masiki miyo ddihikalaga murumiwi wa ena! Nyuwo munorumela wi miyo ddili murumiwi wenyu, sabwani nyuwo muli ezinddiyelo enoniha wi ddili murumiwi wa Nabuya.
3 Mavuzo aga mwa abale anddiloga bure baba:
4 Koddi kaninna ofuru wa oja na omwa?
5 Koddi iyo kaninna ofuru wa omutela murogora oli muroromeli wila eddege na iyo, dhahene ninga mukosile arumiwi ena, abali a Nabuya vina Sefa?
6 Obe ddi miyo na Barnabé bahi, onfwanyela ottidda mabasa a ovisapelana nanya?
7 Munyakoddo gani onlaba, avikalihaga mwinya? Bani onala nvidera, ahija milimadha? Bani onsapiha mabila, akodda omwa mukakayá?
8 Koddi ddinloga esidhá na ononelamo waga? Obe Nlamulo vina kaninloga esidhá?
9 Sabwani elebiwa mu Nlamulo na Mizé: “Kammage omulomoni wa n’gombe, emususuraga tirigu.” Koddi Mulugu onzuzumela n’gombe bahi?
10 Obe kahiyo mwaha wehu ologeliwe esidhá? Txibarene, nlamulo ntti nilebeliwe mwaha wehu, sabwani muttu onlima na muttu onsusura, anofwanyela okosa esidhá, ajedhelaga wakela elobo.
11 Akala iyo nitxeya vari venyu dhilobo dhomuyani, egahikala yabure ojedhela wi nyuwo munivahe nikamihedho nomaningoni?
12 Akala attu ena akaana ofuru oku wa okamihedhiwa na nyuwo, iyo kanafwanyelela vopitta? Iyo kanifunile ofuruyá oku, mbwenyi ninovilela dhotedhene wila nihite enkwakwattutxa miselu dhapama mwaha wa Kristu.
13 Nyuwo kamunziwa wi abale anttidda mabasa a Mulugu, anja dha mumparhani vina kamunziwa wi abale anlaba malabo otene vebuwani anowakela epaddi ya esile dhimperhekiwa vebuwanivá?
14 N’ekalelo yakakene, Nabuya oruma wi abale anlaleya miselu dhapama akalegewo mwaha wa miselu eso dhapama.
15 Mbwenyi miyo kaddukumbirhileni elo. Vina kaddinulebelani wila muddikosele esidhá, vowi mwa miyo japama okwa, ehili—kawo onawodhe oddaka enddigayiha!
16 Nona akala ddinokosa mabasa a olaleya miselu dhapama, obu kahiyo mwaha wa ovittukulelana, sabwani jofuneya wira mabasayá aba. Txibarene, ddinakale ani, ddigahilaleye miselu dhapama!
17 Akala ddinokosa na murima wotene, ddinele wakela nlivo. Mbwenyi, masiki akala ddinokosa ninga yomageleliwa, ddikanavi muttorho wa wira mabasa aba.
18 Bili dhawene, ddinattuveliwe eni? Yottuveliwa yaga ja olaleya miselu dhapama ddihilogosaga elo. Ddigakosa dhawene kaddinalabihedhe bure owodha waga wa olaleya miselu dhapama.
19 Sabwani masiki baddinna ofuru na attu otene, ddivikosiha mudhari wa etene wila ddaattukulele attu enjene ofwara dila ya Kristu.
20 Mwa Ayuda, ddali ninga Muyuda wila ddattukulele Ayuda dila ya Kristu. Mwa abale anedda na nlamulo, ddakala ninga muttu onedda na nlamulo masiki ddiheddagana na nlamulo, wila ddattukulele dila ya Kristu abale aneddana nlamulo.
21 Mwa abale ahinna nlamulo, ddihikala ninga kaddinna nlamulo masiki miyoyá baddili ninga muttu ohinna nlamulo na Mulugu, mbwenyi ddeddagana nlamulo na Kristu, wila ddattukulele dila ya Kristu abale ahinna nlamulo.
22 Mwa abale obanile, ddahikala muttu wowobana, wila ddattukulele dila ya Kristu abale obanile. Ddikosa dhotedhene dhinwodhimi wila ddakamihedhe attu a ekalelo yotene wi egawodheya, ddavune enayá.
23 Ddinkosa dhotedhene mwaha wa miselu dhapama wila ddalaleyele miselu esi attu ena.
24 Nyuwo kamunziwa wila abale anttamaga wi ‘àkele nlivo, * otene anottamaga mbwenyi onakela nlivoná ddi mmodha bahi? Kattamagani ninga munfuneyelani wi muwodhe wakela nlivoná.
25 Otene anttamaga wi àkele nlivo, * anovipimelela mwa dhotedhene. Ebaribari wi awene ankosela ejoyá wi àkele nlivo ninnongeya, mbwenyi iyo ninttamagela wi nakele nlivo nihinnongeya.
26 Nona, miyo ddinottamaga ddiziwaga ondhowemi vina kaddinwana ninga ddinvada pevo.
27 Ddinovada maningo aga * vina ddinoweddiha ninga mudhari wila ddinadhe okoddiwa na Mulugu, miyo walaleyile attu ena.
