1 Pedro 1:1-25
1 Miyo Pedro, murumiwi wa Yezu Kristu, ddinoulebelani nyuwo musakuliwe muli anawedda, mumwadheyeli mirudda dha Ponto, Galásia, Kapadósia, Ázia na o Bitínia
2 Mulugu, Baba, ohusakulani dhahene ninga mwaganiliye wale, iyene ohukoddelihani na muya waye wokoddela wila mukale owiwelela vina muttikitteliwe na nikami na Yezu Kristu.
Mukanegevi mahala a Mulugu vina murenddele.
3 Wottittimihiwa akale Mulugu vina Babi wa Nabuya wehu Yezu Kristu, sabwani na ttagaraga yaye enddimuwa iyene ohinibala wili anivahaga njedhelo na egumi mwaha wa ovenyihiwa mukwani wa Yezu Kristu,
4 wila nakele yohalana, ehinvudda, ehintakala vina ehingoma. Yohalana ejo muhikoyeliwa wirimu.
5 Nyuwo munkoyiwa na guru dha Mulugu, mwaha wa nroromelo wila mufwanye ovuneya ononeye nsaka n’omariha.
6 Mwaha wa ejuwene, nyuwo munottaba venjene, masiki efuneyaga okubanya mwa mudhidhi mung’onovi mwaha wa dhoweha dhottiyana-ttiyana,
7 wila nroromelo nenyu nehiwe, nuvaheni ovuwa, nttittimiho na nriho, nsaka ninonihiwe Yezu Kristu, sabwani nroromelo nenyu nikaana ttima opitta woru enrimela masiki etxittikiwe na motto.
8 Masiki muhimonilevi, nyuwo munomukwela. Masiki ovano muhimonaga, munomuroromela vina munottaba venjene na ottaba ohimpimeya vina na nttittimiho,
9 oku muziwaga wi ororomela wenyu onouwodhihani ovuneya.
10 Mwaha wa ovuneya oku, anamavuhulela avuhulelile mwaha wa mahala anakela nyuwo, ahitamela ononelamo vina opepesa mowakwana-mwene.
11 Anamavuhulela abo antamela oziwa pama eddihiwaga na muya wokoddela mudhidhi na nsaka nafuna ompadduwela Kristu esile dhalogiwe dhihinatti opadduwa. Muya obo wannawoniha mutanene mukalelo ogatabuwile Kristu vina nttittimiho nigakaniliye musogorhomwa.
12 Mulugu ohaziwiha anamavuhulela wi kavilabela anyene mbwenyi aulabelani nyuwo. Anamavuhulela abo ahileba dhilobo dhaddeliwenyu, nona nyuwo muhiwa dhilobo eso na abale aulaleyeleni miselu dhapama akamihedhiwaga na muya wokoddela, obuwene ondha wirimu. Si dhilobo-dhene eso dhinfunetxa anju ononelamo.
13 Nona musasanyedhe yubuwelo yenyu wila mukose mabasa, mukosege dhilobo dhotedhene na zelu, mujedhelege mahala a Mulugu analagihiwenyu nsaka ninonihiwe Yezu Kristu.
14 Ninga ana aniwelela, kamufwarege dhifunelo dhanna nyuwo wale muhinatti omuziwa Mulugu,
15 mbwenyi mweddelo wenyu wotene okale wokoddela, sabwani Mulugu oukuwelileni, ddokoddela.
16 vowi elebiwa dhahi: “Mukale okoddela sabwani miyo ddili wokoddela.”
17 Mmulobelelege Baba onttonga ahinna nsakulano, afwaraga merelo a muttu ddi muttu, mweddegena wova mudhidhi onkalinyu mwilaboni mpuno ninga anawedda.
18 Vowi munoziwa wi kamufuruliwe na dhilobo dhinvudda ninga woru obe parata mmweddeloni mwenyu wabure, obuwene oravihiwenyu na azamani enyu.
19 Mbwenyi mufuruliwe na nikami na Kristu ninna ttima enddimuwa opitta nikami na nibila nohiragala, vina nihinna maleba.
20 Ebaribari wi Kristu okalilewo elabo ehinatti ottanddiwa,* vano wonihiwe omagomo wa masaka mwaha wenyu.
21 Mwaha wa Yezu, nyuwo munomurumela Mulugu, ole onvenyihile mukwani, onvahile nttittimiho wila nroromelo na njedhelo nenyu nikale mwa Mulugu.
22 Ovano vamalilenyu ovikoddeliha mwaha wa wiwelela ebaribari, mukanaga okwelana wobali, ohimpela malago, mukwelanege venjene muttu na mukwaye na murima wotene.
23 Vovi nyuwo mubaliwa wili, ottiya na beu envudda mbwenyi na beu ehinvudda,* mwaha wa nzu na Mulugu oliwo, odduwene onkalawo namukalakala.
24 Txibarene, “attu otene ali ninga mani, nttittimiho nawa notene nili ninga folori dhamutakwani, mani anowuma vina folori enomotta,
25 mbwenyi mazu a Yehova anokalawovi namukalakala.” “Mazu” aba si miselu dhapama dhilaleyeliwe nyuwo.
Manota
^ Mazu aba awi elabo ehinatti ottanddiwa, anaddiwana Adamu na Eva ahinatti okaana aima.
^ Kuloga, beu emmela, enwodha obala milima.