1 Pedro 2:1-25
2 Dhahene muttiye obure wotene, ottambi, ogwarhagwambi, nrima na dhozivala dhotedhene.
2 Ninga aima a nyenye anunlela venjene wamwa mukaka wa nibele, nyuwo vina tamelaní venjene nzu na ebaribari na Mulugu, wila muwodhe wunuwa mpaka ovuneya. Nzu na Mulugu ninligana na mukaka wokotta,
3 vowi mumala okaana ebaribari,* wi Nabuya ddwapama.
4 Mudhidhi onimususela nyuwo Nabuya, odduwene oli nlugu na egumi okoddiwe na attu, mbwenyi osakuliwe na Mulugu vina ononiwana ttima vamentoni vaye,
5 nyuwo muli malugu anna egumi, munolibihiwavi ninga nyumba yomuyani wila mukale anamakutta okoddela wi muperheke mikutto dhomuyani dhinrumeliwa na Mulugu mwaha wa Yezu Kristu.
6 Sabwani mpaddi dhahi wa Malebo onloga: “Moone! Ddinowimetxa o Sioni nlugu nisakuliwe, nlugu na ttima nili nlugu ninddimuwa na alisersi, wotene onaroromele txipo kanatxinuwe.”
7 Vano, mwa nyuwo iyene ddwa ttima sabwani munomurumela, mbwenyi mwa attu ahinimurumela, “nlugu nikoddile anamamaga nyumba, ttidhile okala nlugu ninddimuwa na alisersi”
8 “nlugu ninakwakwattutxa vina mwara onamottiha attu.” Awene anokwakwattuwa sabwani kaniwelela mazu a Mulugu. Esi sittongeliwe attu-ene abo.
9 Mbwenyi nyuwo “muli ziza nisakuliwe, anamakutta orumeliwa ninga amwene, nlogo na attu okoddela, nlogo nisakulile Mulugu wila muvuwihe merelo a pama” a ole oukuwelileni mwiddimani, aukuwelelagani mutxezani mwaye mokoddela.
10 Sabwani wale nyuwo kamwali nlogo, mbwenyi ovano muli nlogo na Mulugu; wale nyuwo kamweddihiwa na ttagaraga, mbwenyi ovano muhakela ttagaraga.
11 Abali okweleya, ddinoukokomezani ninga anawedda, anamadha ankala mudhidhi mung’onovi wi mutadhege dhifunelo dha maningo dhinwanavi na nyuwo.
12 Mukane mweddelo wapama vari va attu a malogo, wi agaumagedhani yawi muli attu abure, awene akale anamoona a merelo enyu apama vina yopurelamoyá ekale omuttittimiha wenyu Mulugu siku n’ottonga waye.
13 Sabwa ya Nabuya, mwawiwelelege muhapambihaga attu otene anttonga, peno amwene, peno anddimuwa,
14 obe agovernador ninga abale arumiwe wi àtabutxe abale anira dhabure vina àttittimihe abale anira dhapama.
15 Sabwani ku ofuna wa Mulugu wi mukose dhapama wila mwamalihe attu abure anloga dhihinziwani.
16 Mukale ninga attu anna ofuru, kamulabena ofuru wenyu mwiraga dhabure, mbwenyi mweddege ninga emeleli a Mulugu.
17 Mwarihe attu a ekalelo yotene, mwakwelege abali ali orugunuwa elabo yotene, mmove Mulugu vina mmurihe mwene.
18 Adhari awiwelelege anabuya awa na wova onafwanyelela, kahiyo bahi abale ali apama obe anna murima wofewa, mbwenyi na abaleya ali orutxa waziveliha.
19 Sabwani muttu agavilela dhorutxa,* vina agatabutxiwa ahinna muladdu, sabwa ya iyene otamela okala wokoddela vamentoni va Mulugu, ejo jowagalaliha.
20 Txibarene, ttima gani enkaninyu mugavadiwaga sabwa ya ottega wenyu vina muvilelaga ejoyá? Mbwenyi akala munovilela matabuwo sabwa yawira dhapama, ejo enomuzivela Mulugu.
21 Txibarene, mukuweleliwe ejene, sabwani Kristu outabuwelani auttiyedhagani mweddelo wila mufware ttarho dhaye n’ororomeleya.
22 Iyene kattegile nne kalogile mazu ozivala.
23 Varuwaniwiye, iyene kàkula n’oruwana, vatabuwiye, iyene katxutxa, mbwenyi waviperhekela Mulugu onttonga na oligana.
24 Iyene ottukula dhottega dhehu mmaningoni mwaye bali vapingirhizini wila nikwele* dhottega vina nikalelewo oligana. “Vilodda dhaye dhihuvulumutxani.”
25 Sabwani wale, mwali ninga mabila anedda zerhu-zerhu, mbwenyi ovanene mumwiyelela mukumbuzi wenyu oli vina munddimuwa wa egumi yenyu.
Manota
^ Obe, “mumala osunza na dhotagiha dhenyu.”
^ Obe, “osegedheya, wiwa opa.”
^ Obe, “wila nifuruliwe.”