1 Pedro 4:1-19
4 Vowi Kristu otabuwa mmaningoni, nyuwo vina mukane yubuwelo yakakene, sabwani muttu ontabuwa ohittiya okosa dhottega,
2 wi ovenyana ovanene akalelewo okosa efunelo ya Mulugu, ottiya otamelaga esile dhinazivela attu.
3 Vowi wale munonga mudhidhi mwinjene mukosaga esile dhinazivela attu a mwilaboni, mufwaraga mweddelo wohifwanyelela ontota manyazo* na dhifunelo dhohifwanyelela, olezela, mattanga ohifwanyelela, ottabwiha omwa vina webedha dhingamuttu.
4 Ovano awene anotikina sabwani nyuwo kamunkosa dhilobo dhakakene dhinkosani mmweddeloni mwawa wabure, nona agauruwanagani.
5 Vano attu abo anele wakulela vamentoni va Kristu, odduwene onattonge aliwo na akwile.
6 Nona miselu dhapama dhilaleyeliwa vina abale akwile, wila masiki attongiwaga ninga munttongeliwa attu aliwo, akalewo eddihiwaga na guru dha Mulugu.*
7 Mbwenyi omagomelo wa dhilobo dhotedhene onowaddamela. Nona mukale a malago vina mulobelege mudhidhi wotene.*
8 Opitta dhotedhene esi, mukane okwelana onddimuwa muttu na mukwaye, vowi okwela onokunela dhottega dhinjidhene.
9 Mwakelagane mmatakulu mwenyu, muhinyonyeyaga.
10 Bari mvaho wakelile muttu ddi muttu, alabena wila àkamihedhena attu ena ninga mwimeleli wapama wa mahala a Mulugu, abuwene anoneya mwa mikalelo dhottiyana-ttiyana.
11 Akala muttu onologa, aloge ninga onloga mazu a Mulugu, akala onowimelela, emelele akuluvelaga guru envaha Mulugu; wila mwa dhilobo dhotedhene Mulugu attittimihiwege mwaha wa Yezu Kristu. Nttittimiho na owodha saye, okala n’okala-wene. Amen.
12 Abali okweleya, kamutikine mwaha wa dhoweha dhinddimuwa* dhinufwanyani, ninga munpadduweliwa elobo ehinziwenyu.
13 Ottiya ejo, mudhowegevi muttabaga oku mufwanyiwaga makattamiho akakene a Kristu, wila nyuwo vina muttabe vina muhagalale venjene nsaka ninonihiwe nttittimiho naye.
14 Akala munopwaziwa* mwaha wa nzina na Kristu, muhagalale sabwani muya wa nttittimiho, ndde, muya wa Mulugu oli na nyuwo.
15 Vano, ahikalevo mmodha wa nyuwo ontabuwa mwaha wa okala panga, mbava, wira dhabure obe ovivolotxa mmakanini ahinimpatta.
16 Mbwenyi akala muttu onotabuwa sabwa ya okala Mukristu, katoteye manyazo, vano adhowegevi amuttittimihaga Mulugu oku eddaga ninga mukristu.
17 Vowi obu mudhidhi ottomiwe wila ottonga orome, ottonga oko onroma na attu a Mulugu,* ovano akala onroma ottongiwa ddi iyo, txini enapadduwele abale ahiniwelela miselu dhapama dha Mulugu?
18 “Akala muttu woligana murima ovuneya waye onorutxa, kito txini enampadduwele muttu wabure vina muttegi?”
19 Dhahene, abale antabuwa mwaha wa okosa efunelo ya Mulugu, aviperheke* mmadani mwa Muttanddi wororomeleya, oku akosaga dhapama.
Manota
^ Na egregu, aselgeya. Kang’ana Mazu Atapuleliwe anloga: “Mweddelo Wohifwanyelela Ontota Manyazo.”
^ Obe, “muya wa Mulugu.”
^ Obe, “mudhidhi wotene mukalege omala-nawale wila mulobele.”
^ Obe, “dhinligana na motto.”
^ Obe, “munoruwaniwa.”
^ Na egregu: “nyumba ya Mulugu.”
^ Obe, “aperheke egumi yawa.”
