1 Pedro 5:1-14
5 Nona miyo vina oli musogorheli wa mulogo mukwenyu, munamoona wa matabuwo a Kristu vina onakele nttittimiho ninonihiwe, ddinowakokomeza anddimuwa a mmulogoni ali vari venyu dhahi:
2 Mukumbuze mabila a Mulugu attiyedhiwenyu, musogorhelaga* n’okwela ninga munfunela Mulugu ottiya n’okukuseliwa, mukosaga n’oziveliwa ottiya na efunelo ya ogumela elobo;
3 kamwakubanyihe attu a Mulugu attiyedhiwenyu mbwenyi mukale yotagiha yapama ya mabilayá.
4 Mudhidhi ononihiwe mukumbuzi munddimuwa, nyuwo munele wakela nlivo* na nttittimiho nihinvudda.
5 N’ekalelo yakakene, nyuwo azombwe mwawiwelelege muhapambihaga alobwana owunuwelavo, vano motene mukale* oviyeviha muttu na mukwaye, vowi Mulugu kanziveliwa na attu ovittukulela mbwenyi onowavaha mahala aye attu oviyeviha.
6 Nona muviyevihe vamentoni va Mulugu wowodha* wila iyene awuttukuwiheni mudhidhi wofwanyelela,
7 oku mumperhekelaga Mulugu dhotedhene dhinuzuzumihani* sabwani iyene onoukoyani.
8 Mukale txenjewa vina muviyang’anelege! Mwiddani wenyu Ddiabo onedda aurugunuwagani ninga poddogoma ongoroma, amutamelaga womuja.
9 Mbwenyi mukale oviyettekene na nroromelo noliba, muziwaga wila abali enyu, orugunuwa elabo yotene anofwanyiwa makattamiho akakene.
10 Vano mugamala otabuwa mudhidhi mung’onovi, Mulugu mwinya wa mahala otene, oukuwelileni oya munttittimihoni naye nihingoma mowiwanana na Kristu, onele wakwaniha mashagiho enyu. Iyene onele oulibihani, onele wuvahani guru vina onele ouwimetxani pwí.
11 Owodha wotene okale na Mulugu okala n’okala-wene. Amen.
12 Ddihulebelani karta eji na mazu mang’onovi na nikamihedho na Silvano* mbali wororomeleya wila ddulibiheni vina ddukokomezeni wi aba ba mahala a ebaribari a Mulugu. Kalanivi oliba na mahala aba.
13 Muyana oli o Babilónia* osakuliwe ninga nyuwo, onouperengezelani malejelo vamodha na mwanaga Marko.
14 Mulejelagane muttu na mukwaye na beju yobali.*
Nyuwo motene muli anamafwara a Kristu mukane murenddele.
Manota
^ Obe, “mwang’anelaga.”
^ Na egregu, “kara.”
^ Obe, “mwabale.”
^ Na egregu, “nlada n’owodha na Mulugu.”
^ Obe, “makattamiho enyu.”
^ Onkuweliwa vina Sila.
^ Onkala ninga muyana onaddiwana, mulogo.
^ Akristu anlejelana avahagana beju mudhidhi wagumanani.