2 Tesalónika 1:1-12
1 Miyo Paulo, Silvano vina Timóteo ninoulebelani nyuwo a mulogo w’o Tesalónika muli mumodhani na Baba wehu, vamodha na Nabuya Yezu Kristu:
2 Mukane mahala na murenddele wa Mulugu Baba vina wa Nabuya Yezu Kristu.
3 Abali, mudhidhi wotene ninomutamalela Mulugu mwaha wenyu. Eji jofuneya okosa, sabwani nroromelo nenyu ninowinjivavi vopitta vina okwela onkwelana nyuwo muttu na mukwaye, onottabwavi winjiva.
4 Nona, iyo ninogaya venjene mwaha wenyu vari va milogo dha Mulugu, sabwani ninoziwa wi masiki mufwanyiwagavi dhorutxa na makattamiho, nyuwo munovilela mmuroromelaga Mulugu.
5 Ejo ezinddiyelo enoniha wi Mulugu onottonga na oligana vina mwaha wa ejuwene munowoniwana ofwanyelela wakela Omwene wa Mulugu, obuwene ontabuwelinyu.
6 Txibarene, vowi Mulugu ddoligana, iyene onele wawiyihedha goyi abale anutotelani goyi.
7 Nyuwo muntabuwa ovano, munele ofuruliwa vamodha na iyo, siku ninfuna wonihiwa Nabuya Yezu ovenyana wirimu na anju aye a guru
8 vari va elala ya motto, adhaga watxinutxa abale ahinimwiwelela Mulugu vina ahiniwelela miselu dhapama mwaha wa Nabuya Yezu.
9 Nabuya wehu onele wattonga attu abo, iyene onele watxinutxa na otolotxiwa wokala-n’okala-wene, dhahene awene kanamone, vina kanakamihedhiwe na guru dhaye,
10 agadha wi attittimihiwe na akoddeli aye vina asibiwe siku ntto mwa abale animuroromela, sabwani onamoona ovahilehu vari venyu ohakeliwa na nroromelo.
11 Sabwa ya ejuwene, iyo ninoulobelelani mudhidhi wotene wila Mulugu wehu auwonenina okala ofwanyelela okuweliwa vina na owodha waye akose opama wotene wowakwana, onimuzivela vina na mabasa otene ankosinyu na nroromelo,
12 wila nzina na Nabuya wehu Yezu nittittimihiwe mwa nyuwo vina mukale mumodhani na iyene, mowiwanana na mahala a Mulugu wehu vina a Nabuya Yezu Kristu.
