2 Tesalónika 2:1-17
2 Nona abali, mwaha wa odha wa Nabuya wehu Yezu Kristu vina ogumanihiwa wehu na iyene, ninoulobani
2 wi muhirimeliwe zelu yapama nne muhizuzume akala munowiwa wi siku na Yehova nifiya, kamuzuzume peno akala muselu onlogiwa wi ondhela wa Mulugu* peno mwiwale na attu ena, obe mwengesile mukartani mwa attu ena anloga wi karta eji operhengezile ddi iyo.
3 Ahikalewo muttu onunyengettani na ekalelo-ekalelovi, sabwani siku ntto kaninafiye ahinatti okalawo anamasadduwela dha Mulugu vina ahinonihiwe muttu wabure odduwene onatolotxiwe.
4 Iyene nvanyi, onovittukulela vadhulu va yotene enkuweliwa mulugu obe yotene ejile enebedhiwa* vina onogilati mumparhani mwa Mulugu, akalaga osogorho wa attu otene ninga mulugu.
5 Koddi nyuwo kamunubuwela wi valimi na nyuwo, ddannuwaddelani esidhá?
6 Ovano nyuwo munomuziwa onimbarela muttu oddo wabure wi ahonihiwe nsaka naye nihinafiya.
7 Ebaribari wi obure obo ohinoneya onowireyavi, mbwenyi kunaziweye ofiyedha mudhidhi onadhowe ole ombarela.
8 Venevo onele wonihiwa ole onira obure vina Nabuya Yezu onele omutolotxa na mazu ambudduwa mwano mwaye,* iyene onele otolotxiwa kakamwene mudhidhi wa odha waye.
9 Mbwenyi woneya wa ole onira obure, ompadduwela mwaha wa mabasa a Satana abuwene ankosiye na guru, na vizinddiyelo vina na matikiniho a ottambi.
10 Iyene onowanyengetta vina onowapela malago abale otene andhowa wutolotxiwani, awene anele otolotxiwa mwaha wa okodda orumela vina okwela ebaribari egavunile.
11 Nona Mulugu ohattiya wi akwekwettiwe na masunziho a ottambi wila arumelege dhottambi,
12 dhahene otene anottongiwa sabwani karumelile ebaribari, mbwenyi anziveliwana dhohiligana.
13 Nona, iyo ninomutamalela Mulugu mudhidhi wotene sabwa yenyu, abali, munkweliwa na Yehova, sabwani ovenyana omaromo, Mulugu ousakulani wi muvuneye mwa oukoddelihani na muya waye vina mwaha wa ororomela wenyu ebaribari.
14 Mulugu oukuwelelani ovuneya mwaha wa miselu dhapama dhulaleyileni iyo wila mukane nttittimiho n’akakene ninna Nabuya wehu Yezu Kristu.
15 Nona, abali, mukale olibene vina mwiwelelege esile* dhisunzihiwenyu peno na mazu ehu obe na karta yehu.
16 Mulugu Babihu ononikwela mwaha wa mahala aye, iyene ononipangarhaza masiku otene vina onivaha njedhelo nihingoma, nona ninokumbirha wi iyene vamodha na Nabuyehu Yezu Kristu,
17 apangarhaze murima wenyu vina aulibiheni wila mudhidhi wotene mukosege vina mulogege esile dhili dhapama.
Manota
^ Obe, “mazu a muya.”
^ Obe, “enkokoreliwa.”
^ Na egregu, “muya.”
^ Na egregu, “dhilemelelo.”
