2 Tesalónika 3:1-18
3 Nona, abali, munilobelelege na ntidi, wila nzu na Yehova nidhowege nivuwihiwagavi nomaguva dhahene ninga ninvuwelani vari venyu,
2 vina munilobelelege wila Mulugu anivune mmadani mwa attu otakala murima, vowi kahiyo attu otene anna nroromelo.
3 Mbwenyi Nabuya ddororomeleya, iyene onele oulibihani vina onele oubarelani mwa mwiddani.
4 Ninga attu aninfwara Nabuya, iyo ninokuluvela wi nyuwo munokosa vina munelege okosavi esile dhurumileni iyo.
5 Nabuya adhowegevi eddihaga pama mirima dhenyu na okwela wa Mulugu vina na ovilela wila mumfware Kristu.
6 Ninouvahani malago aba, abali, na nzina na Nabuya wehu Yezu Kristu wila mmurabele mbali ddi mbali ohiniwelela vina ohinfwara esile dhisunzihile iyo.*
7 Nyuwo munoziwa pama mweddelo wehu onfwanyelinyu otagiha, sabwani vari venyu kaneddile n’ekalelo yohifwanyelela,
8 nne kanijeli ebewene* yoja ya muttu; ottiya ejo, nanlaba mudhidhi wotene nikosaga mabasa a guru mutana na mattiyu wila nivisapele nanya, vowi kanafuna ompwatteliha muttorho muttu ddi muttu wa nyuwo.
9 Kahiyo wi kaninfwanyela ovahiwa elobo-txilobo na nyuwo, mbwenyi nafuna wi neddena merelo apama anfwanyelinyu otagiha.
10 Sabwani valihu na nyuwo nanuvahani nigano ntti: “Akala muttu kanfuna olaba, bahito ahije.”
11 Iyo nihiwa wila ahikalawo attu ena vari venyu ahiniwelela, kanlaba, mbwenyi anovolowela makani ahili awa.
12 Attu abo ninowaruma, ninowakokomeza na nzina na Nabuya Yezu Kristu wila akalegewo na murenddele vina ajege esile dhingumelani na mabasa awa.
13 Vano, nyuwo abali kamuttiye wira esile dhili dhapama.
14 Akala muttu kanfuna wiwelela esi dhilebilehu mukartani mpu, mmukalele txenjewa* vina muttiye wedda na iyene wila atoteye manyazo.
15 Mbwenyi kammweddihege ninga mwiddani wenyu, vano mudhowegevi mmulagaga ninga mbalinyu.
16 Nabuya wa murenddele auvahegeni murenddele mudhidhi wotene n’ekalelo yotene. Nabuya akale na nyuwo motene.
17 Miyo Paulo, ddinoleba malejelo aba na nlada naga, miyo ddinleba dhahene makarta aga otene, wila muziwe wi ddi miyo olebile.
18 Mahala a Nabuya wehu Yezu Kristu akale na nyuwo motene.