2 Timóteo 2:1-26
2 Nona, weyo mwanaga, odhowegevi ovikomaga na mahala a Mulugu andha mwa Kristu Yezu;
2 esile dhiwale weyo na miyo vina dhirumelilewe na anamoona enjene, dhilobo eso waasunzihe alobwana ororomeleya wila aboyá afwanyelele wasunziha attu ena.
3 Ninga munyakoddo webaribari wa Kristu Yezu, karumela ovilela makattamiho.
4 Kawo muttu onlaba ninga munyakoddo, onzuzumela* dha marhondda,* akala onofuna omwagalaliha ole omulebele ninga munyakoddo.
5 Ottiya ejo, muttu onkosa mavurhano a ottamaga* kanakela nlivo* agahittamage afwaraga maganoyá.
6 Namalima onttidda mabasa na guru ddinfwanyela oroma oja milima dha mabasa aye.
7 Wubuwelegevi dhinuwaddelimi, Nabuya onele ouvaha ononelamo wa dhilobo dhotedhene.
8 Wubuwelege wi Yezu Kristu ovenyihiwa mukwani vina wali wa ziza* na Davidi, ejo enowiwanana na miselu dhapama dhinlaleyimi,
9 mwaha wa esene ddinotabuwa vina ddili wofugeliwene ninga timbwini. Vano nzu na Mulugu, kanifugeliwe.
10 Nona, ddinovilelavi dhilobo esi dhotedhene mwaha wa abale asakuliwe wila awene vina afwanye ovuneya ondha mwa Kristu Yezu na nttittimiho nihingoma.
11 Mazu aba bebaribari: Akala nihikwa vamodha na iyene, ninele okalawo vina vamodha na iyene;
12 nigavilelagavi ninele olamulela vamodha na iyene, mbwenyi nigamukodda iyene vina onele onikodda;
13 nigahiroromeleye iyene onkalavi wororomeleya, vowi kanwodha ovikodda mwinyene.
14 Wawubutxedhege attu abo dhilobo esi, wasunzihaga* vamentoni va Mulugu wila ahiwanege mwaha wa mazu, dhilobo esi kadhinna yopureleyamo vowi dhinowaputtula* abale aniwa.
15 Kakosa guru dhotedhene wi orumeliwe vamentoni va Mulugu ninga namalaba ohinna elo enimutota manyazo, oziwaga olabana pama nzu na ebaribari.
16 Mbwenyi orabele mazu aninveyiha Mulugu, vowi makani abo anowattukulela attu ottabwiha wira dhobure,
17 mazu awa anomwadheya ninga elodda emmwadheya mmaningoni. Ena mwa attu abo ddi Heminewu na Fileto.
18 Alobwana abo attiya ebaribari, alogaga wi abale akwile amala ovenyihiwa mukwani, dhawene anopupurutxa nroromelo na ena.
19 Masiki dhawene, Mulugu omwimetxa alsersi woliba wohittekenyeya oli vamburoni vaye onna mazu awi: “Yehova onowaziwa attu aye,” vina “Ole onromola nzina na Yehova akoddege esile dhili dhohiligana.”
20 Nyuwo munoziwa wi nyumba enddimuwa kamunkala bahi dhobo dha woru na dha parata, mbwenyi munokala vina dhobo dha miri na dha ddongo, dhobo dhina dhinlabiwana dhilobo dhottittimiheya, oku dhina dhinlabiwana dhilobo dhihili dhottittimiheya.
21 Dhahene akala muttu kankala ninga dhobo esile dhinlabiwana dhilobo dhihili dhottittimiheya, onokala yobo enlabiwana dhilobo dhattima, yokoddelihiwa, enimulabela mwinya, esasanyeliwe mabasa otene apama.
22 Nona, kattawa dhifunelo dhozombwe, vano otamele oligana, nroromelo, okwela vina murenddele, vamodha na abale aninvuwiha Nabuya na murima wottorora.
23 Ottiya ejivi, orabele makani otaduwa ahinna osogorhowa, vowi weyo onoziwa wi esidhá dhinotatamula owanawana.
24 Sabwani mwimeleli wa Nabuya kanfwanyelela owana, mbwenyi akale muttu wofewa murima na otene, onfwanyelela osunziha, onziwa ovyang’anela agakoseliwa dhabure,
25 vina onasunziha n’okurumuwa abale ahinna mweddelo wofwanyelela. Txino Mulugu onodha wakosiha osaddula murima wawa,* wi akaane eziwelo ya ebaribari,
26 dhawene anele otxinuwa vina ovuneya vamuregani wa Ddiabo, vowi iyene ohattidda wila akosege ofuna waye.
Manota
^ Na egregu, “ommageya.”
^ Obe txino, “onkosa mabasa a siku na siku.”
^ Na egregu, “jogu.” Eji eniwanana na jogu dhottiyana-ttiyana.
^ Na egregu, “kara.”
^ Na egregu, “beu.”
^ Na egregu, “wavahaga onamoona wowakwana.”
^ Obe, “dhinowatolotxa; dhinowapupurutxa.”
^ Obe, “orugunutxa yubuwelo yawa.”
