2 Timóteo 3:1-17
3 Vano muziwe wi masiku omariha anele odhana midhidhi dhorutxa vina dhowopiha.
2 Attu anelege ovikwela anya, anelege okwela kobiri, anele okala anamagaya, anamavittukulela, anelege onveyiha Mulugu, kanawiwelelege amambali awa, kanaziwege otamalela, kanaroromeleyege,
3 kanakwelege akwawa, kanewananeyegena, anakale anamazivala, kanaziwege ovipimelela, anakale awali, anelege widda dhapama,
4 anelege wasadduwela akwawa, anakale aliba ntidi, anele odhaleliwa ovittukulela, anelege okwela dhinazivela ottiya omukwela Mulugu,
5 anele okala ninga animwebedha Mulugu, oku ahili dhawene; attu ninga abo, weyo warabele.
6 Vari vawa vanobudduwa alobwana andhowa n’oswaga mmatakulu vina ananyengetta ayana ahinna nroromelo noliba, adhaleliwe dhottega, ayana abo ahinjiveliwa mmirimani mwawa dhifunelo dhottiyana-ttiyana,
7 mudhidhi wotene ankala osunzavi, mbwenyi kanwodha ofiyedha eziwelo yowakwana yebaribari.
8 Dhahene ninga Janes na Jambres amusadduwelile Mizé, alobwana abo vina anosadduwela ebaribari. Yubuwelo yawa ehimala ovirigana vina kanrumeliwa na Mulugu, sabwani anokodda ororomela.
9 Vano kanadhowe wolapela, vowi otolo wawa onele oziweya na attu otene, dhahene ninga yapadduweli alobwana abale eli.
10 Mbwenyi weyo ohifwaseyela ofwara masunziho aga, mweddelo wa mwigumini mwaga, efunelo yaga, nroromelo naga, ovilela waga, okwela waga na opisa waga murima,
11 ofwara-fwariwa waga vina matabuwo aga, ninga abale agumanilena miyo o Antiokiya, o Ikónio na o Listra. Miyo ddivilela ofwara-fwariwa oku wotene vina Nabuya oddivuna mufwara-fwariwanimwa.
12 Txibarene, otene abale anfuna omulabela Mulugu n’ororomeleya ninga anamafwara a Kristu Yezu, anele ofwara-fwariwa vina.
13 Attu abure na anamanyengetta, anelege ottabwagavi, anyengettaga vina anyengettiwaga.
14 Mbwenyi weyo, ohittiye esile dhisunziliwe vina dhittukulelihiwe weyo orumela, vowi onomuziwa ole ousunzihile esodhá,
15 vina ovenyana muhimani, weyo onoziwa malebo okoddela anwodha ouvaha eziwelo enaufwanyihe ovuneya mwaha wa omuroromela Kristu Yezu.
16 Malebo otene avudheleliwe na Mulugu, anolabela mabasa wi àsunzihe attu, àtxinutxe attu, ogolele dhiviriganile wi àlagihe attu dila yoligana,
17 dhawene muttu wa Mulugu, onokala womala-nawale, owakwanene wi akose mabasa otene apama.
