2 Timóteo 4:1-22
4 Miyo ddinoukokomeza vamentoni va Mulugu na va Kristu Yezu onattonge aliwo na akwile, nsaka ninonihiwiye Mumweneni mwaye:
2 Kalaleya nzu na Mulugu, kakosa ejoyá n’owaguva, midhidhi dhofwanyelela vina midhidhi dhorutxa, walage, wasumulele, wakokomeze na ovilela wotene vina wasunzihe pama.
3 Vowi onele ofiya mudhidhi onakoddagani masunziho apama,* mbwenyi anelege ofwara esile dhinfunani vina anelege ovitamelela anamasunziha anawaddelege esile dhinfunani wiwa.
4 Anelege okodda ovuruwana ebaribari, mbwenyi anavuruwanege gahala dhottambi.
5 Vano weyo, wubuwelege pama dhilobo dhotedhene, ovilele makattamiho, kuttiye olaleya miselu dhapama, kakosa mabasa a Mulugu mowakwana-mwene.
6 Miyo ddinoperhekiwa ninga vinyu enkuttuleliwa vebuwani vina mudhidhi wa ofuruliwa waga oli vakuvi.
7 Miyo ddiraba koddo yapama, ddittamaga mpaka omagomo, ddikalawo na nroromelo.
8 Oromana ovanene mpaka musogorho, ddinjedhela wakela mwereko woligana, onaddittuvele ddi Nabuya onttonga n’oligana; onele oddivaha mwereko obo ninga nlivo nsaka nineyeliye. Kanaddivahe miyovi bahi, mbwenyi onele wavaha vina otene anjedhela wonihiwa waye.
9 Kakosa guru yotene wi odhe oddone momaguva.
10 Demas oddittiya sabwani wankwela dha elabo ejino,* iyene odhowile o Tesalónika, Kresente odhowa o Galásia, vano Tito odhowile o Dalmásia.
11 Luka bahi ddihalile na miyo, ogadhaga omudhena Marko sabwani iyene onoddikamihedha mmabasani a Mulugu.
12 Ddimuruma Tíkiko o Éfezo.
13 Ogadhaga odhene kazaku yaga ettiyilemi o Tróade vatakulu va Karpo, odhena vina rolu, makamaka dha ttebe.
14 Alexandre namafula safurhi oddiputtula venjivene, Yehova onele omwiyihedha mowiwanana na esile dhikosiliye.
15 Weyo vina omukalele pasope, sabwani iyene osadduwela venjene miselu dhalaleyihu.
16 Dila yoroma yattongiwemi vamentoni va alamuleli, kavo waddikamihedhile, otene addinyanyala—Mulugu ahapwattelihe muladdu sabwa ya ejuwene.
17 Vano Nabuya wali na miyo vina oddilibiha wila ddilaleye mazu otene a Mulugu wi attu a malogo otene ewe; vina ddivuniwa mwano mwa poddogoma.
18 Nabuya onele oddivuna mubureni mwetemwene addittukulele Mumweneni mwaye wa wirimu. Nabuyayá avahiwe nttittimiho okala n’okala-wene. Amen.
19 Mumperhekele malejelo aga Priska na Ákila vamodha na attu a ntakulu na Onezíforo.
20 Erasto ohalile o Korinto, mbwenyi Trófimo ddimuttiyile bali muredda o Mileto.
21 Kakosa guru dhotedhene wi odhe okuno nsaka n’oridha nihinatti ofiya.
Êubulu, Pudente, Lino, Kláudiya na abali otene anouperhekela malejelo.
22 Nabuya akale na weyo mwaha wa mukalelo wapama ononihiwe. Mahala a Mulugu akale na weyo.
