2 Joau 1:1-13
1 Onleba ddi miyo munddimuwa,* ddinulebelani nyuwo ddona osakuliwe vamodha na aninyu munkweliwa venjene na miyo vina munkweliwa na otene anziwa ebaribari,
2 ddinulebelani sabwa ya ebaribari eli na iyo vina enakalevi na iyo okala n’okala-wene.
3 Mulugu, Babi wehu wa wirimu vamodha na Yezu Kristu Mwanaye, anonivaha okwela vina anonisunziha esile dhili dh’ebaribari; awene anele ononiha mahala a Mulugu, oneddela ttagaraga vina onivaha murenddele.
4 Ddihagalala venjene muziwelimi wi anenyu ena, anoweddana ebaribari, dhahene ninga munirumeli Baba.
5 Ovano ddona, ddinoukumbirhani wi nikwelanege muttu na mukwaye. (Kaddinulebelani yoruma eswa, mbwenyi ddinulebelani yoruma eziwilehu ovenyana omaromo.)
6 Okwela entapulela ohittiya weddana dhoruma dha Baba. Yoruma yakelihu ovenyana omaromo jiji, munofuniwana weddaganavi okwela.
7 Sabwani anamanyengetta enji àbalaleyela mwilaboni, abo babale ahinrumela wi Yezu Kristu wahidha ninga muttu. Aba ba anamanyengetta vina amwiddani a Kristu.
8 Mukale txenjewa wi munayelele dhigumelihu na mabasihu, mbwenyi muwodhe ofwanya ottuveliwa wowakwanela.
9 Muttu ddi muttu ohinfwara masunziho a Kristu asunzihaga dhina, kanrumeliwa na Mulugu. Ole oneddanavi masunziho a Kristu, onorumeliwa na Baba vina na Mwana.
10 Akala muttu onogumana na nyuwo mbwenyi ahisunzihaga dhilobo dhiniwanana na esile dhisunzihile Kristu, kammwakele vatakulu venyu nne vina kammulejele.
11 Sabwani onimulejela onokamihedha merelo aye abure.
12 Masiki ddikanaga dhinji dha wulebelani, kaddinfuna wulebelani na papeli vina na tinta, mbwenyi ddinojedhela odha ouwonaniwo wi ddiloge na nyuwo kove na kove, wila ottaba wenyu wakwane.
13 Aima a murogorinyu osakuliwe, anouperhekela malejelo.
Manota
^ Obe, “muluvali.”