2 Korinto 1:1-24
1 Miyo Paulo, murumiwi wa Kristu Yezu na ofuna wa Mulugu na Timóteo mbalihu. Ddinolebela karta eji mulogo wa Mulugu oli o Korinto vamodha na akoddeli otene ali o Akáia:
2 Mwakele mahala na murenddele ondha wa Mulugu Babi wehu, vina wa Nabuya wehu Yezu Kristu.
3 Atamaleliwe Mulugu, Babi wa Nabuya wehu Yezu Kristu, Babi wa ttagaraga enddimuwa vina Mulugu wanipangarhazo notene.
4 Onnipangarhaza* muwehiwani mwehu mwetemwene* wi na nipangarhazo ninakela iyo na Mulugu, niwodhe wapangarhaza ena muwehiwani mwawa mwetemwene.*
5 Nipangarhazo nindha mwa Kristu ninowinjiva, dhahene ninga muninjivela dhoweha dhinnifwanya mwaha wa onfwara Kristu.
6 Vano nigafwanyiwaga dhoweha, ninfwanyeliwa opangarhazeya wenyu. Vina nigapangarhaziwaga, nimpangarhazeliwa wi nyuwo vina mupangarhazeye wila muwodhe ovilela mmakattamihoni akakene angumanana iyo.
7 Njedhelo nehu mwa nyuwo ttoliba, sabwani ninoziwa wi dhahene ninga munfwanyeliwa nyuwo makattamiho, munele wakela vina nipangarhazo.
8 Abali, ninfuna wi muziwe dhorutxa dhinifwanyile o provinsia ya Ázia. Dhorutxadhá eso dhahittabwa, iyo kaniwodhile ovilela na guru dhehu, nahifiyedha ohiziwa akala nigakalawo obe nigakwa.
9 Txibarene nobuwela wi nahittongeliwa okwa. Eji epadduwele wi nihivikuluvele nanya, mbwenyi nimukuluvele Mulugu onavenyiha abale akwile.
10 Iyene onivuna mudhidhi wafunehu okwa, vina onele onivuna, nikaana njedhelo nawi onelege onivunavi.
11 Nyuwo munowodha onikamihedha munilobelelaga wa Mulugu, sabwani attu enjene aganilobelelaga, Mulugu onovuruwana vina ononikamihedha, dhawene attu enjene anomutamalela Mulugu.
12 Vowi ninogayela eji, mubuwelo* wehu onovaha onamoona wawi ninowedda mwilaboni na murima wokoddelene vina na ebaribari endha wa Mulugu, ottiya na eziwelo ya attu, mbwenyi na mahala a Mulugu.
13 Ninulebelani esile dhinwodhinyu wengesa* vina ononelamo, ddinjedhela wi mudhowegevi munonelagamo* esidhá,
14 dhahene ninga munnonelamo nyuwo wi nili mwaha wa ogaya wenyu vina nyuwo munele okala mwaha wa ogaya wehu siku na Nabuyehu Yezu.
15 Nona na nikuluvelo ntti, miyo ddannubuwela oroma odha ouwonaniwo dila yanawili wila muhagalale.*
16 Ddanfuna ouwonaniwo ddigadhowaga o Masedónia vina ddigeyelaga o Masedónia, dhahene nyuwo mugahiddivelela vang’onovi mudila ddigadhowaga o Judeya.
17 Koddi, mubuwelile miyo, ddubuwelile ddihiromile otanalela? Obe ddinokosa dhotedhene na dhubuwelo dha omuttu, nona ddigaloga: “Ndde, ndde” ngamala “Nne, nne”?
18 Mbwenyi dhahene ninga mukalele Mulugu wororomeleya, enuwaddelani iyo kahiyo “ndde” ngamala bikala “nne.”
19 Sabwani Mwana Mulugu, Yezu Kristu oulaleyeleni iyo, kuloga miyo, Silvano* na Timóteo, kali “ndde” mudhidhi wakakene bakala “nne,” mbwenyi “ndde” okala-wene “ndde” mwa iyene.
20 Kintanala winjiva wa mapikirhelo a Mulugu, mapikirheloyá akala “ndde” mwa iyene. Nona jijene enlogelihu “Amen” wa Mulugu na nzina na Yezu wila Mulugu attittimihiwe.
21 Mbwenyi Mulugu ddinnikuluveliha wi iyo vamodha na nyuwo nili a Kristu vina ddi iyene onittikittelile.
22 Iyene onivaha muya wokoddela mmurimani mwehu vina onivaha nikuluvelo nawi onele onivaha esile dhinadhe musogorho.
23 Miyo kaddinatti odha o Korinto sabwani kaddinfuna ouribihani murima, Mulugu ddinvaha onamoona wa esidhá.
24 Kahiyo wi nili anya a nroromelo nenyu, mbwenyi ninlaba mumodhani wi muhagalale, vowi tti nroromelo nenyu ninulibihani.
Manota
^ Obe, “onnilibiha.”
^ Obe, “mmakattamihoni mwehu.”
^ Obe, “mmakattamihoni mwawa.”
^ Kang’ana Mazu Atapuleliwe.
^ Obe txino, “dhinziwenyu pama oromana wale.”
^ Na egregu, “mpaka omagomo.”
^ Obe txino, “wila mupurelemo dila yanawili.”
^ Vina onkuweliwa Sila.
