2 Korinto 10:1-18
10 Miyo Paulo ddinouttiddani myeddo na okurumuwa vina ttagaraga dha Kristu. Attu ena anloga wi ddigakala vari venyu ddinkala woviyeviha, mbwenyi ddigakala wolapelana na nyuwo ddinoulebelani makarta owutxutxanina.
2 Ddinokumbirha munlobeloni wi ddigakala na nyuwo, ddihite malamulo ovadda, anubuwelemi wi ddinele wita sabwa ya abale anona ninga ninedda na dhofuna dha maningo.
3 Masiki valihu mwilaboni mpuno, kaninwana koddo ninga enira attu a mwilaboni mpuno.
4 Dhipano dhinwanana iyo kahiyo dha mwilaboni mpuno, ninwana na dhipano dhinnivaha Mulugu wila niwodhe obwanyulana esile dhinkala ninga ngome dhovadda.
5 Sabwani ninobwanyula dhubuwelo na dhotedhene dhinabarela attu omuziwa Mulugu. Ninofunya dhubuwelo dhotene dha attu wi amwiwelele Kristu;
6 vina nili womala-nawale wila nitxinutxe ohiwelela wotene, ofiyedha wiwelela wenyu wakwana.
7 Nyuwo munttonga na dhawoneya. Akala muttu onologa na nikuluvelo wi murumiwi wa Kristu, obuwele eji: Akala iyene ddwa Kristu, iyo vina nili a Kristu.
8 Nabuya onivaha owodha wa olibiha nroromelo nenyu, ottiya otolotxa. Masiki kowiliwa ddela ogayana owodha oku ovahiwehu, kaddigatoteyile manyazo.
9 Mbwenyi kaddinfuna okala ninga ddinoutxutxani na makarta aga.
10 Vowi ena anologa: “Dhologa dha mmakartani mwaye s’attima vina dhikaana owodha, mbwenyi agakala na iyo kanopiha nne mazu aye kankana ttima.”
11 Muttu oddo aziwe wi esile dhinlogihu* mmakartani nihili wenewo sinakosihu* nigakala wenewo.
12 Vowi kanintagiha oligana obe oviladdaniha na abale aniviziwiha anya. Mbwenyi anyene agewananiha dhawira dhawa adha aviladdaniha na awenene anya, anowoniha wi kanna ononelamo.
13 Vano iyo kaninvittukulela mwaha wa ejile ehikosilehu, ninvittukulela mwaha wa mabasa àkelihu wa Mulugu vina na mabasa a oulaleyelani nyuwo.
14 Mwebaribari, mudhidhi walihu na nyuwo, nikosile mabasa arumiwehu na Mulugu, vowi ddi iyo oromile oufiyedhanina miselu dhapama mwaha wa Kristu.
15 Nne, kaningaya na mabasa ahittomeliwehu, kuloga mabasa manddimuwa attiddile attu ena. Mbwenyi ninjedhela wi veneva vanunuwa nroromelo nenyu, mabasa erilehu vina onuwegevi mwari mwa mirudda dhipimeleliwe iyo. Dhahene ninele wunuwavi,
16 wi niwodhe olaleya miselu dhapama mirudda dhili wolapela na murudda wenyu, wila nihigaye na mabasa erile ena.
17 “Mbwenyi ole ongaya, agaye mwa Yehova.”
18 Sabwani onrumeliwa, kahiyo ole oniviziwiha mwinya, mbwenyi ddule onziwihiwa na Yehova.