2 Korinto 11:1-33
11 Masiki miyo ddikalaga ninga tolo, ddanfuna wi nyuwo muddivilele. Mbwenyi, txibarene nyuwo munoddivilela-wene.
2 Vowi miyo ddinoukanelani aje. Aje enligana na ya Mulugu,* sabwani ddihipikirhela wutelihani mulobwana mmodha, Kristu, wila dduperhekeni wa iyene ninga namwali. *
3 Mbwenyi ddinowova wi munadhe opadduweliwa yakakene empadduwele Eva, onyengettiwe na nowa muswagani mwaye, nyuwo vina munadhe otakalihiwa yubuwelo yenyu muttawihiwaga ebaribari na okoddela oninfwanyelela Kristu.
4 Vowi txibarene, akala onofiya muttu aulaleyelani Yezu wottiyana na ole oulaleyeleni iyo, obe akala dhubuwelo dhenyu dhinoweddihiwa na guru dhina dhinttiyana na dheddiha dhubuwelo dhenyu, peno munolaleyeliwa miselu dhapama dhinttiyana na esile dhinrumelinyu, nyuwo munorumela dhilobo eso.
5 Miyo kaddinona wi vakala elobo enddikosiha okala mwana vamentoni va arumiwi enyu anddimuwa.
6 Masiki miyo ddihikanaga ttotto ya ologa, kaddirameyeliwe eziwelo, txibarene iyo nihuziwihani esodhá mwa dhilobo dhotedhene.
7 Obe miyo ddil’ottega mwa oviyeviha wi nyuwo muttittimihiwe, ddulaleyelagani miselu dhapama dha Mulugu na murimaga wotene, muhipitxelaga elo?
8 Miyo ddirumela wakela nikamihedho na milogo dhina wila ddiwodhe oulabelani nyuwo.
9 Vano mudhidhi wafwanyiwemi dhojombeliwa baddili na nyuwo, kaddimukumbirile muttu elo, sabwani abali adhile o Masedónia ahidhana dhinjidhene dhaddijombela. Kaddafuna omukumbirha muttu elobwene vina ddihigana ohikosa ejoyá.
10 Dhahene ninga muninfwarela miyo Kristu, kayiwo elo enaddittiyihe miyo ogayana ejiya mmiruddani dhotedhene dha Akáia.
11 Sabwaya jani? Sabwa yawi kaddinukwelani? Mulugu onoziwa wi ddinoukwelani.
12 Mbwenyi ddinele odhowagavi ddiraga dhiniremi, wi abale antamela okala ninga oligana na iyo, vina antamela ogayana esile dhinkosani, ahikane mwaha.
13 Sabwani alobwana abo arumiwi a ottambi, anamalaba onyengetta, anvikosiha ninga arumiwi a Kristu.
14 Eso kadhinnitikiniha, sabwani mwinyene Satana onovikosiha ninga anju wa txeza.
15 Nona kanintikina akala emeleli aye anovikosiha ninga emeleli a dholigana. Mbwenyi omagomo wawa onewanane na dhawira dhawa.
16 Ddinologa dila yanawili: Kakalewo onubuwela wi ddili tolo. Mbwenyi akala munowubuwela dhawene ddinokumbirha wi muddirumele na otolo waga, wi ddikane vang’onovi mwaha w’oddigayiha.
17 Dhinloga miyo ovanene, kaddinloga na yotagiha ya Nabuya, mbwenyi ddinloga ninga tolo na ovikuluvela onligana na muttu onivittukulela.
18 Akala attu anogaya mwaha wa dhamwilaboni mpuno,* miyo vina ddinele ogaya.
19 Akala nyuwo munloga wi “kamuli atolo,” kito munziveleliwani wavilela abale ali atolo.
20 Txibarene, nyuwo munonvilela muttu-muttuvi onukosani adhari, onttapatta dhokana dhenyu, onuwakani dhinenyu, onvittittimiha osogorho wenyu vina onuvadani omentoni.
21 Ologa esidhá ononitotela manyazo, vowi ninodha okala ninga nili attu owobana.
Mbwenyi akala ena anira na oliba murima—ddinloga ninga tolo—miyo vina ddinowira na oliba murima.
22 Awene akadda Ahebreu? Miyo vina ddili. Awene Ana Izrayel? Miyo vina ddili. Awene ba ziza* na Abrahamu? Miyo vina ddili.
23 Awene arumiwi a Kristu? Ddinakula ninga taduwa, miyo ddittabwa okala murumiwi wa Kristu opitta awene: Ddilaba venjene, ddifugeliwa mukambura dila dhinjidhene, ddiwasuliwa dila dhinjidhene vina dila dhinjidhene ddankala nena n’okwa.
24 Ddivadiwa na Ayuda dila tanu; dila-dila addivada dila 39.*
25 Ddivadiwa dila ttaru na miri, ddiponyedhiwa malugu dila modha, ddibwina mbara dila ttaru, ddikala omattiyu modha vina omutana modha munyaza.
26 Ddikosa oleddo dila dhinjidhene, ddifwanyiwa dhowopiha mmanjeni, dhowopiha dha ambava, dhowopiha dha nlogo naga, dhowopiha dha malogo meena, dhowopiha musidadi, dhowopiha mwiddeddereni, dhowopiha mbara, dhowopiha dha abali a ottambi.
27 Ddilaba na guru ddikosaga mabasa ovadda, ddikala mattiyu menjene s’ohigona, na dala vina na nttona, kaddakana yoja dila dhinjidhene, na oridha vina ddihikanaga yowabala.*
28 Ottiya esi bahi, ddikaana enddizuzumiha masiku otene: Efunelo ya wona milogo.
29 Bani wobanile, miyo vina ddihobana? Bani onkwakwattuwa, miyo ddihisilidhiwa venjene?
30 Akala ddikaana enddigayiha, ddingaya sabwa ya esile dhinddoniha wi ddili muttu wowobana.
31 Mulugu vina Babi wa Nabuya Yezu, ole onfwanyela ottittimihiwa okala-nokala-wene, onoziwa wi kaddinozivala.
32 O Damasko governador walamuleliwa na mwene Areta, ohawika ang’aneli misuwo dha sidadi y’o Damasko wi addimage.
33 Mbwenyi abalaga addika mmuddangani* baddititihedha vajanelani ya ngome ya musidadi, baddivuneya mmadani mwaye.
Manota
^ Na egregu, “ntidi na Mulugu.”
^ Nzu ntti na egregu ninaddiwana muyana ohinagonaga na mulobwana.
^ Obe, “mwaha wa dhemuttu.”
^ Na egregu, “ttaga.”
^ Na egregu, “40 oburutxavo modha.”
^ Obe, “yovi.”
^ Obe, “musestoni.”
