2 Korinto 12:1-21
12 Ddinele ogaya masiki ddihikanaga yopurelamo na ogayawa mbwenyi ddinele ologa esile dhiddonihile Nabuya.
2 Miyo ddinomuziwa muttu mmodha oli mumodhani na Kristu, mwa vyaka 14 mundduni—iyene ottukuleliwa erimu yanoraru, peno ottukuleliwewo na maningo aye, peno kattukuleliwewo na maningo aye, miyo kaddinziwa, onziwa ddi Mulugu.
3 Ndde, miyo ddinomuziwa muttu oddo—peno ottukuliwe na maningo aye, peno kattukuliwe na maningo aye, miyo kaddinziwa, onziwa ddi Mulugu—
4 ottukuleliwa o paraizu, ohiwa mazu ahinwodheya ologiwa vina ahinrumelihiwa muttu ologa.
5 Ddinele ogaya mwaha wa muttu oddo, mbwenyi kaddinagayele mwaha waga, ehili dhawobana dhaga.
6 Masiki miyo kofuna ogaya kaddigakalile tolo, sabwani ddigalogile ebaribari. Mbwenyi ddinorabela wi ahikalewo muttu onddittittimiha mwaha wa ejile enoniye mwa miyo obe eniwiye mwa miyo,
7 vowi ddinowakela dhowonihiwa dhowumiha milomo.
Wi ddihivittittimihe vopitta, ddihikiwa mmaningoni mwaga mwinga, anju wa Satana, wi addibubuddege mudhidhi wotene, wila ddihivittittimihetxe vopitta.
8 Ddihimukumbirha Nabuya dila ttaru wila aburutxemo mwingayá mmaningoni mwaga.
9 Mbwenyi iyene ohiddakula: “Mahala aga anouwakwana, sabwani guru dhaga dhinlibetxa vanobaniwe.” Nona n’ohagalala winjene, ddinele ogayela wobana waga wi guru dha Kristu dhikalevi mwa miyo ninga musasa.
10 Ddinoziveliwa na wobana waga, oruwaniwa, otowiwa, ofwara-fwariwa vina na segedho mwaha wa Kristu. Sabwani vanobanimi, panlibetxemi.
11 Ddikala tolo. Mbwenyi ddi nyuwo oddittukulele okosa ejoyá, vowi kamulogile elobo yapama ekosilemi. Sabwani kavali elo enddikosiha miyo okala mung’ono vari va arumiwi enyu abo anddimuwa masiki miyoya ddihili elo.
12 Txibarene, ddihuwonihani vari venyu wi ddili murumiwi na ovilela onddimuwa, na vizinddiyelo, na matikiniho vina na mabasa owodha-wodha.
13 Elobo gani yuttiyanihileni nyuwo na milogo dhina, ehili ejile ya miyo ohukumbirhani elo? Muddilevelele na muriwa wenyu wotene mwaha wa yovonya eji.
14 Muziwe wi eji dila yanoraru enivisasanyedhela miyo wi ddidhe ouwonaniwo vina kaddinfuna oukumbirhani elo, vowi miyo kaddintamela dhokana dhenyu, mbwenyi ddinutamelani nyuwoyá; sabwani kinjedheliwa wi aima àtamelele dhokana ababiwa, mbwenyi ababi banatamelela aniwa.
15 Miyo ddinohagalala ononga dhotedhene dhinemi na egumiyá yaga mwaha wenyu. Akala ddinoukwelani vaddiddi enokala yapama nyuwo oddikwela vang’onovi?
16 Mbwenyi mwa dhotedhene kaddukumbirhileni elo, masiki dhawenevi nyuwo munloga wi “ddihupelani malago” vina ddihuttiddani na “oswaga.”
17 Koddi ddihuttukulelani yenyu na abale aurumeleni miyo, odha wenewo?
18 Ddimudidela Tito wi adhe auwoneniwo vina ddimuruma na mbali mmodha. Koddi Tito ohuttukulelani yenyu? Miyo na Tito kaninedda na muya mmodha? Vina kaninedda dila modhene?
19 Nyuwo munubuwela wi mudhidhi obu wotene natamela ovivuna vamentoni venyu? Dhotedhene dhilogilehu s’ebaribari vamentoni va Mulugu ninga attu aninfwara Kristu. Abali okweleya, muziwe wi dhotedhene dhinirehu, ninirela olibiheya wenyu.
20 Ddinowova wi ddigafiya wenewo ddihufwanyeni ninga mwafunelimi, nyuwo vina muddonena ekalelo yahaddijedhelinyuna; ddinowova oufwanyanina owana-wana, aje, okoyelana ntxiga, opambihana, wabana, waganyedhana vina merelo a ovittukulela na ohiwanana.
21 Txino ddigeyela, Mulugu waga onodha odditota mwanyazo vamentoni venyu, baddidha wunla mwaha wa enjiyá mwa nyuwo attegile wale, vano ahitxinuwile sabwa ya dhonyakuwa dhawa, na ogonihana wonyakuwa,* vina na mweddelo wohifwanyelela okosilani ontota manyazo.*
Manota
^ Na egregu, porneya. Kang’ana Mazu Atapuleliwe.
^ Na egregu, aselgeya. Kang’ana Mazu Atapuleliwe anloga: “Mweddelo Wohifwanyelela Ontota Manyazo.”
