2 Korinto 13:1-14
13 Eji dila yanoraru endha miyo ouwonaniwo. “Makani angwaddiwa vagakala anamoona eli obe araru anloga yakakene.”
2 Masiki vahilimi vamodha na nyuwo wenewo, ddinkala ninga ddili na nyuwo dila yanawili; vina mwa abale attegile wale vamodha na enayá, ddinona wi ddigadha wenewo dila yina kaddinaweddele ttagaraga.
3 Vowi nyuwo muntamela vizinddiyelo dhinoniha wi Kristu onologa na mulomo waga, Kristuyá kahiyo awobana vari venyu mbwenyi ohoniha guru dhaye.
4 Txibarene, iyene okwa vapingirhizini ninga muttu wowobana mbwenyi okalawo sabwa ya guru ya Mulugu. Ebaribari wi iyo vina nili owobana na iyene, mbwenyi ninele okaana egumi na iyene mwaha wa owodha wa Mulugu oli mwa nyuwo.
5 Mudidele ovipima wi moone akala muli munroromeloni. Mudidele woniha ejile elinyu-wene. Obe kamunziwa wi Yezu Kristu oli mumodhani na Nyuwo? Munofwanyela oziwa akala kamukoddiwe.
6 Miyo ddinjedhela wila munonelemo wi iyo kanikoddiwe.
7 Ninolobela wa Mulugu wi muhire elo-wene yabure, kahiyo wi nikale ninga nil’orumeliwa, mbwenyi wila nyuwo mukose eli yapama masiki nikalaga ninga nikoddiwe.
8 Vowi kaninfwanyela okosa elo ehiniwanana na ebaribari, mbwenyi ninkosa ejile eniwanana na ebaribari.
9 Iyo txibarene ninohagalala veneva valihu owobana mbwenyi nyuwo oliba. Ninokumbirha munlobeloni wi mukose matxinjo anfuneya. *
10 Ddinologa esidhá veneva valimi wolapela na nyuwo, wi ddigakala vamodha na nyuwo ddihobetxe owali na owodha oddivahile Nabuya, oli owodha wa olibihana ottiya wa otolotxana.
11 Nona abali, muhagalalegevi, muhittiye okosa matxinjo anfuneya, opangarhaziwa vina mukanege yubuwelo modhene, mukalaga na murenddele; dhahene Mulugu wa okwela vina wa murenddele onele okala na nyuwo.
12 Mulejelagane muttu na mukwaye na beju y’obali.*
13 Akoddeli otene anouperhekelani malejelo.
14 Nyuwo motene mwakele mahala a Nabuya Yezu Kristu vina mukane okwela wa Mulugu na muya wokodela onupurelihani nyuwo motene.
