2 Korinto 3:1-18
3 Niloge wi enofuneya iyo oviziwiha wili wa nyuwo? Peno enofuneya oulebelani makarta anloga pama mwaha wehu, dhahene ninga ena? Obe enofuneya nyuwo onilebela makarta ninga aba? Nne.
2 Nyuwo muli karta yehu elebiwe mmurimani mwehu, enziwiwa vina enengesiwa na attu otene.
3 Enowoneya wi nyuwo muli karta ya Kristu elebiwe na iyo arumiwi a Mulugu, karta eji kilebiwe na tinta, mbwenyi elebiwe na muya wa Mulugu oliwo, kilebiwe vanluguni, mbwenyi elebiwe mmurimani.
4 Dhahene iyo ninomuroromela Mulugu mwaha wa Kristu.
5 Mbwenyi iyo nanya kaninfwanyelela okosa mabasa ba mabasa, ottiya ejo ddi Mulugu onnifwanyeliha okosa mabasa ba mabasa,
6 oniwodhihile okala arumiwi a nipagano niswa, niheddihiwaga na nlamulo mbwenyi neddihiwaga na muya wa Mulugu; sabwani nlamulo ninodhana okwa, mbwenyi muya wa Mulugu onovaha egumi.
7 Vano nlamulo nindhana okwa nttuwene nilebiwe vamaluguni nidha na nttittimiho ninddimuwa ofiyedha ana Izrayel ohiwodha wang’ana omentoni wa Mizé mwaha wa nttittimiho na omentoni waye, mbwenyi nttittimihona ntto nigagomihiwa.
8 Akala nlamulo nidha na nttittimiho, kito muya wa Mulugu kunadhe na nttittimiho ninddimuwa?
9 Akala nlamulo ninattukulela attu wukwani ttottittimiheya, mabasa anattukulela attu okala okoddela attabwa ottittimiheya!
10 Txibarene, nttittimiho na nlamulo kahiyo elo, nigaladdanihiwa na nipagano niswa.
11 Akala ejile yafuna ogomihiwa yitiwe na nttittimiho, ejile enfuna ohala ehikana nttittimiho n’opitta!
12 Ninga nikaana njedhelo ntti, ninologa na nikuluvelo ninddimuwa,
13 vina kaninkosa ninga Mizé wakunela omentoni waye na vewu wila ana Izrayel ahididelege wang’ana ejile yafuna ogomihiwa.
14 Mbwenyi yubuwelo yawa efugeya. Mpaka ddabuno, yubuwelo yawa enkala dhawene yokuneleyene na vewu vina kanwodha ononelamo nipagano nawale. Kristu bahi ddinwodha onikamihedha ovenyihawo vewu ejo.
15 Txibarene mirima dhawa dhili dhokuneleya-dhene mpaka ovanene, nona awene kanwodha ononelamo dholeba dha Mizé.
16 Mbwenyi muttu agamwiyelela Yehova, vewuyá enovenyihiwawo.
17 Txibarene, Yehova ddi Muya, vina vali muya wa Yehova, vakala ofuru.
18 Iyo notene ovenyihilewo vewu omentoni wehu, nili ninga supeyo enoniha nttittimiho na Yehova; ninosadduliwa wila nikalege ninga Mulugu vina nonihegevi nttittimiho na Mulugu ninga munfunela Yehova, odduwene oli Muya.*
Manota
^ Obe txino, “ononihiwa na muya wa Yehova.”
