2 Korinto 4:1-18
4 Vowi nikaana mabasa aba mwaha wa ttagaraga enikanele Mulugu, kanitxelele mabasayá.
2 Mottiyana-mwene, ninonyanyala dhilobo dha manyazo dhinkosiwa moviteyani vina kanineddana dhoswagela, nne kaninviriganiha nzu na Mulugu; mbwenyi mwa olaleya ebaribari, ninowawoniha attu otene wi ninowira dhapama vamentoni va Mulugu.
3 Akala txibarene miselu dhapama dhinlaleyihu dhihiviteya,* dhaviteyeli abale ali dila yotolotxiwa,*
4 abale ahinroromela, apibiwe omentoni na mulugu wa elabo ejino wi ahone txeza ya miselu dhapama dhottittimiheya mwaha wa Kristu, oli nladdaniho na Mulugu.
5 Iyo kaninlaleya mazu ehu, ninlaleya mazu a Yezu Kristu ninga Nabuya vina ninowoniha wi nili adhari enyu mwaha wa Yezu.
6 Sabwani ddi Mulugu ologile: “Txeza emoneye mwiddimani,” txezayá eji enomoneyavi mmurimani mwehu wi emoneye na eziwelo yottittimiheya ya Mulugu endha mwa kove ya Kristu.
7 Vano nikaana nifumo ntti mu vyoboni dha ologo, wi owodha onddimuwa onkwaranya wa muttu okale wa Mulugu ottiya wehu.
8 Ninofwanyiwa dhorutxa dhipaddi dhotedhene, mbwenyi ninoziwa yokosa; ninokala ninga nifugeleyile mbwenyi kanintowiwa vobudduwela;
9 ninofwara-fwariwa, mbwenyi kaninnyanyaliwa; ninomottihiwa, mbwenyi kanintolotxiwa.
10 Mudhidhi wetene ninovilela mmaningoni mwehu otabutxiwa, dhahene ninga mutabutxeliwe Yezu wila egumi ya Yezu yonihiwe mwigumini mwehu.
11 Mudhidhi wotene iyo ninogumanana dhowopiha dhinnittukulela wukwani dhahene ninga Yezu, n’eji ninowawoniha attu otene wi ninotabuwa dhahene ninga mutabuwele Yezu.
12 Dhahene, iyo ninofwanyiwa wopiha wa okwa mbwenyi nyuwo, egumi.
13 Jijuwene elebiwe: “Miyo ddikaana nroromelo, nona ddihiloga”; iyo vina nihoniha wi nikaana nroromelo nakakene, nona ninologa,
14 Ole onvenyihile Yezu onele vina onivenyiha wi nakale vamodha na Yezu vina onele onittiya vamentoni va Yezu.
15 Dhotedhene esi, onireliwa ddi nyuwo; wi mahala a Mulugu enjivegevi, sabwani attu enjene anotamalela amuttittimihaga Mulugu.
16 Nona, kaniniyelela mundduni, masiki maningo ehu alalagavi, murima wehu na dhubuwelo dhehu, dhinokalihiwa dhiswa siku na siku.
17 Masiki makattamiho annifwanya akalaga a mudhidhi mung’onovi vina ahili elo; makattamiho abo anoniwodhiha wakela nttittimiho, nttittimiho ninddimuwa nihimmala.
18 Oku nihizuzumelaga wang’ana esile dhinoneya mbwenyi nizuzumelaga wang’ana esile dhihinoneya. Sabwani esile dhinoneya samudhidhi mung’onovi, vano esile dhihinoneya samukalakala.