2 Korinto 5:1-21
5 Iyo ninoziwa wila nyumba eji ya vati, musasa obo ogatolotxiwa, ninele ovahiwa na Mulugu nyumba eswa wirimu, nyumba enakalegewo namukalakala ehimagiwe na mada a attu.
2 Sabwani ninogurumela munyumbani eji ya vati, nifunaga venjene wakela nyumba yehu ya wirimu, ejo enele onikunela dhahene ninga guwo,
3 wila ogafiya mudhidhi onfunehu wabala, nihifwanyiwe nihinna guwo.
4 Txibarene, iyo oli mmusasani mpu ninogurumela na okubanya, kaninfuna ottiya nyumba eji mbwenyi ninfuna nakele nyumba yina wirimu, wila egumi yamukalakala ekalevi vamburoni va maningo ankwa.
5 Onisasanyedhile esidhá ddi Mulugu onivahile muya waye ninga ezinddiyelo ennikuluveliha esile dhinadhe.
6 Nona mudhidhi wotene ninororomela vina ninoziwa wi nigakalavi na maningo aba nili wolapelana na Nabuya,
7 sabwani iyo nineddihiwa na nroromelo ottiya na esile dhinonihu.
8 Nona, nikaana nikuluvelo ninddimuwa vina ninofuna ottiya maningo ehu wolapela wi nikale vamodha na Nabuya.
9 Dhahene, masiki nikale vamodha na iyene, masiki nikale wolapelana na iyene efunelo yehu jomwagalaliha.
10 Vowi notene iyo ninele wimela* osogorho wa tribunali ya Kristu wi muttu-muttu akele nlivo ninfwanyelela esile dhiriliye bali na maningo aye, peno dhapama peno dhabure.*
11 Vowila ninoziwa entapulela omova Nabuya, ninowattukulela attu orumela dhinsunziha iyo, mbwenyi iyo ninoziwiwa deretu na Mulugu, nona ninjedhela wi mubuwelo* wenyu oukamihedheni oniziwa pama.
12 Kahiyo yawi ninoviziwiha wa nyuwo dila yanawili, mbwenyi ninoukokomezani wila mulogege mwaha wehu mugayaga wi muwodhe omwakula oddule ongaya mwaha wa ejile eliye otakuluvi, ottiya ejile eli mmurimani mwaye.
13 Akala nili ninga ataduwa, nimutaduweli Mulugu, akala nili a zelu, nuwireleni nyuwo.
14 Sabwani okwela wa Kristu ononittukula* murima vowi iyo ninnonelamo dhahi: Muttu mmodha ohakwela attu otene, txibarene attu otene ahimala okwa.
15 Iyene ohakwela otene wila abale ankalawo ahivikalelewo anya mbwenyi amukalelewo ole wakwelile vina ovenyihiwe mukwani.
16 Oromana ovanene mpaka musogorho, kaninawona attu nifwaraga mikalelo dhowoneya masiki ena mwa iyo wale vamuziwani Kristu n’ekalelo ya woneya, mbwenyi ovanene ninimuziwa n’ekalelo yina.
17 Nona akala muttu oli mumodhani na Kristu, yottanddiwa eswa, dhawale dhivira; kang’anani! Dhittanddiwa dhilobo dhiswa.
18 Dhotedhene esi dhindha wa Mulugu, oniwananihile na iyene mwaha wa Kristu vina onivahile mabasa aba a wawandaniha attu na iyene.
19 Kuloga wi Mulugu mwaha wa Kristu wela wawiwananiha attu wi akale amarho aye, ahitanalaga dhottega dhawa vina iyene onikuluvelana muselu wa wawandaniha attu na iyene.
20 Nona iyo nili anamukatti ali vamburoni va Kristu, Mulugu onoukokomezani na dhologa dhehu. Ninga attu ali vamburoni va Kristu, ninouloganina dhahi: “Karumelani wandana na Mulugu.”
21 Kristu kattegile mbwenyi Mulugu omperheka ninga mukutto mwaha wa dhottega dhehu, nona mwaha waye ninowodha okala wokoddela vamentoni va Mulugu.
Manota
^ Obe, “wonihiwa.”
^ Obe, “dhonyakuwa.”
^ Kan’ana Mazu Atapuleliwe.
^ Obe, “ononeddiha; ononija.”
