2 Korinto 6:1-18
6 Iyo ninlaba mabasa vamodha na Mulugu, ninoukokomezani wila munakele mahala a Mulugu muhittiddagana mabasa.
2 Mulugu onloga: “Nsaka napama ddihuvuruwana vina siku novuneya ddihukamihedha.” Moone! Ovano tti nsaka nopitta okala napama. Moone! Ovano tti siku novuneya.
3 Kaninfuna wira elo enimuttukulela muttu okwakwattuwa, wila mabasa animwirelihu Mulugu ahilogiwe bure;
4 mbwenyi mwa mikalelo dhotedhene ninoviziwiha ninga arumiwi a Mulugu; nivilela dhoweha dhinjidhene, makattamiho, masaka orutxa vina segedho,
5 Nibubuddiwa, nifugeliwa mukambura, nifwanyiwa muttitti wa attu a owali, nilaba na guru mabasa ovadda, nivira omattiyu s’ohigona, nivilela na dala;
6 nikalawo na mweddelo wokoddela, niheddana eziwelo, ovilela, opama, niheddihiwa na muya wokoddela, nilagiha okwela wohisarhapitta,
7 niloga mazu ebaribari, niroromela guru dha Mulugu, nittiddela dhipano dholigana dha orabana koddo na nlada n’oja vina n’emara,
8 iyo ninottittimihiwa vina ninopwaziwa; ninologiwa bure vina ninorihiwa, ninowoniwa ninga attu anloga ottambi oku nilogaga ebaribari.
9 Ninowoniwa ninga attu ohiziweya masiki Mulugu aniziwaga, ninga attu attongeliwe okwa mbwenyi nikalawo, ninotabutxiwa* mbwenyi kaninpiwa.
10 Attu anubuwela wi iyo ninokubanya mbwenyi mudhidhi wotene ninkala owagalalene, ninowoniwa ninga ayelegi mbwenyi ninowavaha attu enjene dhilobo dhinji dhapama, ninowoniwa ninga attu ahinna elo mbwenyi nikaana dhilobo dhotene.
11 Abali o Korinto, iyo nihiloga na nyuwo nihuvitelagani elo vina nihufugulelani murima wehu.
12 Kahiyo iyo onufugelani murima wehu, mbwenyi ddi nyuwo onnifugela murima wenyu.
13 Ddinouloganina ninga anaga—dhahene ninga mufugulelini iyo mirima dhehu—nyuwo vina munifugulele mirima dhenyu.
14 Kamuvitaganyihe* na abale ahinroromela. Koddi oligana oniwanana dhavi na yotakala? Obe txeza eniwanana dhavi na eddima?
15 Ottiya ejo, wiwanana gani onna Kristu na Belial?* Vina muttu onna nroromelo oniwanana dhavi na muttu ohinna nroromelo?
16 Wiwanana gani onna mparha wa Mulugu na dhingamuttu? Iyo nili mparha wa Mulugu oliwo dhahene ninga mulogele Mulugu: “Ddinele okala vari vawa, ddinele okalaga na awene; Miyo ddinele okala Mulugu wawa, awene anele okala nlogo naga.”
17 Yehova onloga dhahi: “‘Kabudduwanivo vari vawa, kamuvitaganyihe na awene, kattiyani ottidda dhokwaruliha; miyo ddinele ouwakelani.’”
18 “‘Miyo ddinele okala babinyu, vina nyuwo munele okala anaga a analobwana na a anayana,’ onloga ddi Yehova, Mulugu Wowodha-wodha.”
Manota
^ Obe, “ninosaddeyiwa.”
^ Na egregu, “kamuvimagelele kanga yakakene.”
^ Nzu nindela mu Ebrayiko nintapulela “ehinpurela elo.” Onaddiwana ddi Satana.
