2 Korinto 7:1-16
7 Nona abalaga okweleya, ninga nikaana mapikirhelo aba, nivikoddelihe ninyanyalaga dhotakala dhotene dha maningo na dha muya, nivilibihedhaga okala otxenene, nimovaga Mulugu.
2 Munifugulele murima wenyu. Kanimwireli muttu elobo yohiligana, kanimwireli muttu manyigalo, kaninpujile muttu.
3 Kaddinlogela esidhá wila ddukoneni, vowi ddimala ouwaddelani wila nyuwo muli mmurimani mwehu wi mukwe vamodha na iyo vina mukalewo vamodha na iyo.
4 Ddinologa na nyuwo ddihivitaga elo, ddinougayelani nyuwo, ddimala opangarhazeya, ddidhala ottaba mmakattamihoni anifwanyile.
5 Txibarene, mfiyedhihu o Masedónia kanifwasile, nahifwanyiwa dhonidhugudha dhinjidhene—nanpambihiwa vina nankubanyedha milogo.
6 Vano Mulugu, onapangarhaza abale akumuwile, onipangarhaza na odha wa Tito;
7 kahiyo bahi na odhavi waye, mbwenyi na nipangarhazo nakeliliye wa nyuwo, sabwani iyene ohinaddela efunelo yenyu ya oddona, okubanya wenyu onddimuwa na oddizuzumela wenyu; nona ottaba waga ohinjiva.
8 Masiki vautoteleni miyo okubanya na karta yaga, miyo kaddinkubanya masiki vamaromo-vene vakubanyilemi (sabwani ddihona wi kartayá ehukubanyihani mwa mudhidhi mung’onovi),
9 ovano ddihagalala, kahiyo mwaha wa outotelani okubanya, eddizivelile jowi okubanya wenyu ohudhelanina otxinuwa. Okubanya oko wali bari mwafunela Mulugu, dhahene iyo kanuwireleni yabure.
10 Sabwani okubanya onimuzivela Mulugu onottukulela wutxinuwani, onfwanyiha ovuneya, mwa ejo kawo onkubanya; mbwenyi okubanya wa mwilaboni onototela okwa.
11 Ovano konani epadduwile mwaha wa nyuwo woniha okubanya onimuzivela Mulugu; mutxeniha nzina nenyu, muribiwa murima, muhoniha wova, mwahikana efunelo yawira dhapama vina mukosa guru enddimuwa wi musaddulele dhobure dhikosilenyu; dhahene muhoniha mwa mikalelo dhotedhene wi mmakanini mpu kamunnamo muladdu.
12 Masiki vaulebeleni miyo, kaddirele mwaha wa ole okosile yabure nne vina kaddirele mwaha wa ole okoseliwe yabureyá, mbwenyi ddirele wi ovilibihedha wenyu wa wiwelela woneye vari vehu vina vamentoni va Mulugu.
13 Nona, jijene ekalilehu opangarhazeyene.
Mbwenyi ottiya nipangarhazovi nakelilehu ninohagalala venji sabwa ya wagalala wa Tito, sabwani nyuwo motene mumulibiha.
14 Akala ddihiloga na iyene mwaha wa nyuwo ddigayaga, kaddikanile manyazo, mbwenyi dhahene ninga dhotedhene esile dhuwaddeleni iyo dhali dhebaribari, dhotedhene esile dhilogilehu na Tito nigayaga s’ebaribari.
15 Ottiya ejo, wukwelani waye oninjivetxa venevo vanubuweliye wiwelela wa nyuwo motene, omwakela wenyu na nriho vina na nttittimiho ninddimuwa.
16 Ddinowagalala sabwani ddinowodha ouroromelani nyuwo mwa dhilobo dhotene.
