2 Korinto 8:1-24
8 Ovano abali, ddinfuna wi muziwe dhinkosa abali a mulogo w’o Masedónia mwaha wa wakela mvaho wa mahala a Mulugu.
2 Mudhidhi wehiwani venjene na makattamiho manddimuwa, awene ahoniha ottaba onddimuwa vina ahoniha okala attu ovaha, masiki valani ayelegi ottabwa.
3 Vowi awene ahivaha bari mwawodhelani, ndde, ddili munamoona wi awene avaha opitta esile dhawodhani.
4 Awene na ofuna wawa, annikumbirha dila dhinjidhene wila akaane gari ya operheka mvaho na murima wawa vina okosa mabasa a wakamihedhana akoddeli.
5 Akosa okwaranya esile dhajedhelihu, sabwani vamaromo aviperheka na murima wawa wotene vamentoni va Nabuya vina vamentoni vehu, na ofuna wa Mulugu.
6 Dhahene nimukokomeza Tito wila apulihe mabasa aba aromiliye vari venyu, a wakela mivaho dhikosilenyu na murima wenyu wotene.
7 Dhahene ninga nyuwo murelile mwa dhotene, na nroromelo, na mazu, na eziwelo, na ozuzumela, na oukwelani wehu, murele vina na mvaho obu.
8 Kaddinlogela ejiya ninga nlamulo, mbwenyi wila dduziwiheni ovivelela na efunelo ya attu ena vina ddone ebaribari ya okwela wenyu.
9 Sabwani nyuwo munoziwa mahala a Nabuyehu Yezu Kristu. Masiki vàliye mureli ovikosiha muyelegi mwaha wenyu wila nyuwo mukale areli mwaha wa oyelega waye.
10 Miyo ddinonamo dhahi mwaha wa makani aba: Ottidda mabasa aba onoudhelanina yopurelamo, vowi vanovira yaka bamuromile mabasa aba, vina muhoniha efunelo ya wira mabasayá.
11 Ovano kapulihani mabasa aromilenyu, dhawene munopuliha mabasayá n’efunelo yakakene eromilenyuna mowiwanana na esile dhinenyuna.
12 Sabwani akala muttu okaana efunelo yovaha, mvahoyá onorumeliwa, bari ejile enna muttuyá ottiya na ejile ehinniyena.
13 Kaddinfuna wi yukaleleni ninga muttorho wolemela wa nyuwo, mbwenyi ena yakalele ninga muttorho woluluva.
14 Vano okaana wenyu dhilobo dhinjidhene onokamihedha ojombeliwa wawa, mwa mpaddi mwina okaana wawa dhilobo dhinjidhene onokamihedha ojombeliwa wenyu; n’eji motene muganligana.
15 Dhahene ninga mulebeliwani: “Muttu wanna dhinjene kakanile vopitta, muttu wanna dhing’onovi kattabwile okaana dhing’onovi.”
16 Nimutamalele Mulugu wikile mmurimani mwa Tito efunelo ya ouzuzumelani dhahene ninga munkoselihu.
17 Iyene kakaleli orumelavi nikokomezo nehu, mbwenyi na ofuna waye onele odha ouwonaniwo ninga mwamulobilehu.
18 Nimuruma vamodha na iyene mbali onlogiwa pama na milogo dhotedhene mwaha wa olaleya miselu dhapama.
19 Ottiya ejo, iyene ohittomiwa na milogo wila neddege notene, nidhowagana mivaho esi dhindhowihu ogawa wi Nabuya avuwihiwe vina nonihe wi ninofuna wakamihedha ena.
20 Dhahene ninorabela wi anakalewo muttu onaniloge bure mwaha wa mivaho esi dhinsogorhelihu.
21 ‘Niheddiha dhotedhene n’ororomeleya, ottiya vamentoni va Yehova bahi, mbwenyi vina vamentoni va attu.’
22 Ottiya ejo, nimuruma vamodha na awene mbalihu omonilehu dila dhinjidhene mwa dhilobo dhottiyana-ttiyana wila onozuzumela mabasa. Ovano iyene ohoniha ozuzumela waye vopitta, mwaha wa nikuluvelo ninddimuwa niniyena mwa nyuwo.
23 Akala attu anouvuzani wi Tito bani? Mwawaddele wi iyene onlaba mabasa vamodha na miyo wi nukamihedheni nyuwo; obe akala attu anouvuzani wi abali aba ena bani? Mwawaddele wi abo, arumiwe na milogo vina anonvuwiha Kristu.
24 Nona, mwawonihe abali abo wi munowakwela na murima wenyu wotene, vina mwawonihe attu a mmulogoni mwahayá onulogani iyo nugayaganina.
