2 Korinto 9:1-15
9 Mwaha wa mabasa anakosela nyuwo akoddeli, kili yofuneya iyo oulebelani,
2 sabwani ddinoziwa wi nyuwo munofuna okamihedha. Miyo ddinologa na ogaya vamentoni va Amasedónio mwaha wenyu. Ddihawaddela wi mwa yaka yantero, nyuwo akadda Akáia mugana wi mukamihedhe, mwaha wa nyuwo ofuna okamihedha venjene muhawodhiha Amasedónio enjene ofuna vina okamihedha.
3 Vano ddinowaruma abaliyá odha wenewo wila nihugayenina ebewene mwaha wa efunelo yenyu yokamihedha vina muwodhe okamihedha dhahene ninga mwalogilemi wi munele okamihedha.
4 Kohikosa dhahene, akadda Masedónio kodha wenewo na miyo, nufwanyani muhili omala-nawale, iyo—ottiya ologa nyuwo—nigahikana manyazo mwaha wa oukuluvelani nyuwo.
5 Nona ddihona wi jofuneya wakokomeza abali, vamaromo wi adhe auwoneniwo vina asasanyedhe namutanene mvaho operhekilenyu na murima wotene, wila okale womala-nawale ninga mvaho operhekilenyu na murima wotene, ottiya womageleliwa.
6 Mbwenyi mwaha wa ejiya, ole onala vang’onovi onasinange vina vang’onovi, oku onala dhinjidhene onele osinanga vina dhinjidhene.
7 Muttu-muttu akose ninga muganeliye mmurimani mwaye, ottiya okosa ahifunaga obe n’omageleliwa, sabwani Mulugu onimukwela ole omvaha n’oziveliwa.
8 Ottiya ejo, Mulugu onowodha ouvahani vopitta mahala aye wila muhikane enujombelani, mbwenyi mukane vawinjiva-vene dhilobo dhotene dhinfunenyu wi mukose mabasa otene apama.
9 (Dhahene ninga mulebeliwani: “Iyene onogawa venjene vina onowavaha ayelegi. Oligana waye onogonela okala-nokala-wene.”*
10 Ole oninvaha namalima beu dhowinjiva-dhene vina pawu ninga yoja, onele ouvahani, vina onele ouwenjedhedhani beu wi mwale, oku enjedhedhaga dhosinanga dha mabasa enyu oligana.)
11 Mulugu onele ourelihani venjene wi nyuwo muwodhege ovaha venjene. Attu anelege omutamalela Mulugu mwaha wa mvaho wenyu obuwene ondhowihu wavaha attu ena;
12 sabwani mabasa aba ovaha ankosenyu, kanakwanihedhe bahi dhojombeliwa dha akoddeli, mbwenyi vina anele wattukulela attu enjene omutamalela Mulugu.
13 Awene anomuttittimiha Mulugu, sabwa yawi mabasa aba okamihedha, anowoniha wi nyuwo munowiwelela miselu dhapama mwaha wa Kristu, ninga mulaleyilenyu vanamwinjini, vina munowakamihedha na murima wotene arumiwi vamodha na attu otene.
14 Malobelo anukoselani awene na ntidi, anowoniha wi anowukwelani mwaha wa mahala a Mulugu ali na nyuwo.
15 Nimutamalele Mulugu mwaha wa mvaho waye wa mahala ahinwodha attu opimawa.
Manota
^ Obe, “kwamukalakala.”
