2 Pedro 1:1-21
1 Miyo Simoni Pedro, mwimeleli vina murumiwi wa Yezu Kristu, ddinoulebelani nyuwo mukanile nroromelo nattima ninga nehu, mwaha wa oligana wa Mulugu wehu na wa Mvuni Yezu Kristu:
2 Mukanegevi mahala a Mulugu vina murenddele mwaha wa eziwelo yowakwana ya Mulugu na ya Yezu Nabuya wehu,
3 vowi owodha wa Mulugu onivaha dhotedhene dhinniwodhiha okaana egumi vina omulabela Mulugu n’ororomeleya, mwaha wa eziwelo yowakwana ya Mulugu onikuwelile na nttittimiho naye ninddimuwa vina omyala murima.
4 Mwaha wa dhilobo esi, Mulugu oniroromeliha* mazu aye ebaribari vina okoddeletxa, nona mwaha wa mazu abo, nyuwo munokana mikalelo dhinna Mulugu mugamala ottiya dhilobo dhotedhene dhotakala dha mwilaboni mpuno, esuwene dhiniteya mwaha wa dhifunelo dhabure.
5 Nona, kakosani guru yotene enwodhinyu wila mwenjedhedhe nroromelo nenyu na omyala murima; omyala wenyu murima, mwenjedhedhe na eziwelo;
6 eziwelo yenyu, mwenjedhedhe na ovipimelela mwa dhotedhene; ovipimelela wenyu mwa dhotedhene, mwenjedhedhe na ovilela; ovilela wenyu, mwenjedhedhe na omulabela Mulugu n’ororomeleya;
7 omulabela wenyu Mulugu n’ororomeleya, mwenjedhedhe na wakwela abali; wakwela wenyu abali, mwenjedhedhe na wakwela attu otene.
8 Vowi mugakana mikalelo esi dhotedhene vina dhigenjiva, omuziwa wenyu mwawakwana Nabuya wehu Yezu Kristu onele winjiva, munele obala milima vina kamunobane.
9 Vowi ohinna mikalelo esi, kanona, onofuga mento vatxezani* vina ohidduwala oleveleliwa wa dhottega dhaye dha wale.
10 Nona abali, muvilibihedhegevi ottiddela ejile ekuweleliwenyu vina esakuleliwenyu vowi mugadidelavi weddana mikalelo esi, txipo kamunattiye ororomela.
11 Txibarene, na makalelo aba munele ottiyiwa ovolowa na nttittimiho mu Omweneni wohimala wa Nabuya wehu vina wa Mvuni wehu Yezu Kristu.
12 Nona, ddinfuna dduwubutxedhegeni dhilobo esi, masiki nyuwo muziwaga vina bamuli olibene mwibaribarini esunzilenyu.
13 Mbwenyi oku baddili na maningo aba* ddinona wi japama odidela ouwubutxedhani dhilobo esi.
14 Ddinoziwa wi maningo aba* kanakalewo mudhidhi mwinjene dhahene ninga muddaddeli Nabuya wehu Yezu Kristu.
15 Ddinele okosa guru wila miyo ddigamala odhowa, nyuwo mwanyene mubuwelege dhilobo esi* dhotedhene.
16 Nne, kahiyo sabwa yofwara dhitxirhapi dhottambi dhimparhapatteliwa na attu, yuziwihile iyo owodha na odha wa Nabuya wehu Yezu Kristu; ottiya ejo, iyo nihikala anamoona a ebaribari a nttittimiho naye.
17 Iyene ohakela nriho na nttittimiho na Mulugu, Baba, mudhidhi waddeliwiye mazu aba na nttittimiho ninddimuwa: “Oddu ddi Mwanaga, wokweleya waga, onimurumelimi.”
18 Ndde, iyo nihiwa mazu aba adhaga wirimu vaalihu na iyene vamwangoni wokoddela.
19 Dhahene ninokuluvela mazu a anamavuhulela vina nyuwo munokosa pama wiwelela vowi ali ninga panti enttidda veddimani, kuloga mmurimani mwenyu ofiyedha vati oya vina woneya ttandda.*
20 Mwa dhotedhene nyuwo munoziwa wi kaniwo nivuhulo na mMaleboni nimbudduwa muyubuweloni ya attu.
21 Sabwani nivuhulo txipo kanitiwe na efunelo ya attu, mbwenyi attu aloga mazu a Mulugu eddihiwaga* na muya wokoddela.
Manota
^ Obe, “ovaha mahalene.”
^ Obe txino, “kanona eli wolapela.”
^ Obe, “musasa obu.”
^ Obe, “musasa obu.”
^ Obe, “muromolege.”
^ Ttandda, neneri yoroma enoneya nzuwa nihinatti opattuwa.
^ Obe, “asogorheliwaga.”