2 Pedro 2:1-22
2 Vano, ahikalawo vina anamavuhulela a ottambi vari va nlogo, dhahene ninga munakalelewo anamasunziha a ottambi vari venyu. Aboya anele wita n’oswaga makuru antolotxa afiyedhaga omukodda munya wagulile avitotelaga anyene otolotxiwa n’omaguva.
2 Ottiya ejo, attu enjene anelege ofwara mweddelo wawa wohifwanyelela ontota manyazo,* vina mwaha wawa attu anelege ologa bure dila ya Mulugu.*
3 Vina eddihiwaga na nrima, awene anele ouwiyelani na mazu onyengetta, mbwenyi okoniwa wawa ottongiwe wale, kunagonele vina otolotxiwa wawa oli vakuvi.
4 Txibarene, Mulugu koveleli wakona anju attegile mbwenyi iyene ohavokela mu Tartaru* àfugelaga mwiddimani enddimuwa* àkoyelaga wi attongiwe.
5 Iyene vina koveleli wakona attu a nsaka nawale mudheliyena mpulo munddimuwa elabo ejile yadhalile attu abure, mbwenyi ohinvuna Nowé walaleya oligana vamodha na attu ena atanu na eli.
6 Iyene ottonga sidadi dha Sodoma na Gomora ofiyedha okala munddura, dhahene ohawoniha attu abure esile dhinapadduwe musogorho.
7 Mbwenyi iyene ohinvuna Loti wali muligani vina wakala w’okubanyene mwaha wa mweddelo wohifwanyelela ontota manyazo* wa attu abale àli attegi—
8 vowi mudhidhi wakala muligani oddo vari va attu abale abure, wannona mweddelo wawa, wanniwa dhabure dhakosani, nona siku na siku dhilobo eso dhannimukubanyiha venjene.
9 Nona Yehova onoziwa wavuna muwehiwani abale animwebedha iyene, mbwenyi onowakoyela attu ohiligana, otolotxiwa siku n’ottongiwa,
10 ttabwa-ttabwa abale antamela wararutxa attu ena wi atakalihe maningo awa* apwazaga onddimuwa.
Aboya anovivolotxa mmakanini a akwawa vina anovittukulela, kanova waloga bure abale anttittimihiwa na Mulugu.
11 Vano anju masiki akanaga ewodhelo na guru yinjene, kanaruwana mwaha wa omuriha Yehova.
12 Mbwenyi alobwana abo ankala ninga dhinama dhihinubuwela, dhineddihiwa na mpudha, abaleliwe wi amagiwe vina atolotxiwe, anologa bure dhilobo dhihinziwani. Awene anele otolotxiwa mwaha wa mweddelo wawa onattukulela wutolotxiwani,
13 anotabuwa mwaha wa obure okosilani, anoziveliwa ojavo oku ang’aniwaga.
Awene maleba vina ahiragala, anoziveliwa masunziho awa a ottambi oku ajaga mattanga vamodha na nyuwo.
14 Awene anofuna venjene olupa matelo,* kanwodha ottiya ottega vina anowakwekwetta abale ahinna nroromelo noliba.* Murima wawa odhala nrima.* Ana agwihedhiwe ntowa.
15 Attiya dila yomyala vina apupuruwa, afwara dila ya Balau mwana Beyor, odduwene wakosa dhilobo dhabure mwaha wa ofunetxa ottuviwa,
16 mbwenyi osaddeyiwa mwaha wa olupa ejile eli yoligana. Enama yohiloga entteba mittorho ehiloga na lizu na muttu, ekurumutxaga mweddelo wabure wa namavuhulelayá.
17 Alobwana abo ali ninga fukuwa dhihina manje vina kugu entukumiwa na pevo enddimuwa, aboya akoyeliwa eddima enddimuwa.
18 Abo anologa dhilobo dhinkala ninga dhina ttima oku dhihinna ttima. Anokosa merelo anoniha mweddelo wohifwanyelela ontota manyazo* vina anowattukulela attu wiyelela dhifunelo dhohikala vina anowakwekwettela okosa dhilobo dhabure, esuwene dhittiyilani.
19 Masiki vanlogani wila anowodha wavaha ofuru attu; awene anyene adhari a dhilobo dhabure, sabwani wotene ole ompemberhiwa na muttu mwina, onkala mudhari waye.
20 Txibarene akala awene bamalile ovuneya mwa dhonyakuwa dha mwilaboni mwaha wa eziwelo yowakwana ya Nabuya vina mvuni Yezu Kristu, anowiyelela wili okosa dhakakene vina anopemberhiwa, omagomelo wawa onakale wottabwa opitta omaromo wawa.
21 Egahakalela yapama kohikana eziwelo yowakwana ya dila yoligana, ehili oziwa agamala ottiya ofwara dhoruma dha malamulo a Mulugu akelilani.
22 Mwa awene ehakwanihedheya enloga emariha eji: “Mwanabwa ohiyelela oja mattapiko aye, guluwe emalile ohabihiwa ehiyelela ovipigidha vamuroveni.”
Manota
^ Na egregu, aselgeya. Kang’ana Mazu Atapuleliwe anloga: “Mweddelo Wohifwanyelela Ontota Manyazo.”
^ Na egregu, “dila ya ebaribari.”
^ Kang’ana Mazu Atapuleliwe.
^ Obe txino, “àvokelaga muttoloni mwa eddima.”
^ Na egregu, aselgeya. Kang’ana Mazu Atapuleliwe anloga: “Mweddelo Wohifwanyelela Ontota Manyazo.”
^ Obe, “maningo a attu.”
^ Obe, “mento awa adhala oraruwa.”
^ Obe, “abale ahilibile.”
^ Obe, “ahisunziha mirima dhawa okala dha nrima.”
^ Na egregu, aselgeya. Kang’ana Mazu Atapuleliwe anloga: “Mweddelo Wohifwanyelela Ontota Manyazo.”
