2 Pedro 3:1-18
3 Abalaga okweleya, eji karta yaga yanawili enulebelani miyo, dhahene ninga ejile yoroma yulebeleni miyo, ddinoukokomezani, dduwubutxedhagani wi mulibihe ewodhelo yenyu ya wubuwela na ekalelo yapama,
2 wila mubuwele mazu alaleyiwe wale na anamavuhulela ororomeleya vina na dhosunziha dha Nabuya wehu vina Mvuni wehu, dhiwalenyu na arumiwi.
3 Vamaromo-vene, ziwaní wi masiku omariha anele witeya anamabedda, analogege dhoveyiha, afwaraga dhubuwelo dhawa dhabure.
4 Awene anelege ologa: “Oli wuvi ole walogiwe wi agahoneya? Moone, ovenyana nsaka nikwile azamani ehu ofiyedha ddabuno, dhotedhene dhili dhahene ninga mwalani omaromelo wa elabo.”
5 Awene kanfuna orumela ebaribari eji, ovenyana wale yahikalawo erimu vina Mulugu ohilabihedha nzu naye wi amwalanihe elabo na manje vina na vari va manje.
6 Sabwa ya dhilobo eso, attu a nsaka nttile ahitolotxiwa abwinihiwaga na manje.
7 Mbwenyi na nzu nakakene, erimu na elabo ya ovanene dhinokoyeliwa oddumeyiwa na motto siku ninfuna ottongiwa vina otolotxiwa attu abure.
8 Nona abalaga okweleya muziwe eji, Yehova onoona siku nimodha ninga vyaka txikwi vina vyaka txikwi ninga siku nimodha.
9 Yehova kangonela wakwaniha ejile epikirheliye ninga munubuwelela attu ena, mbwenyi iyene onouvilelani, vowi kanfuna otolotxiwa wa muttu nne mmodha mbwenyi onfuna wi attu otene arugunutxe murima.
10 Siku na Yehova ninadhe ninga mbava vina siku ntto erimu enele orimela n’oruma onddimuwa,* dha wirimu na dha vati dhinele onyuguluwa na oviha vina dhinele ototowa, elabo na dhotedhene dhilimo dhinele woneya.
11 Vowi dhilobo esi dhotedhene dhinele ototowa dhahene, mubuwele mweddelo gani onfwanyelinyu okaana vina dhilobo gani dhinfwanyelinyu okosa; mukale attu anna merelo apama, mukosege dhilobo dhinoniha wi munomulabela Mulugu n’ororomeleya,
12 oku mujedhaga vina mubuwelaga odha wa siku na Yehova, siku ntto erimu enele otolotxiwa na motto, vina dhilobo dhotene dha wirimu na dha vati dhinele onyuguluwa na oviha onddimuwa.
13 Mbwenyi ninojedhela erimu eswa vina elabo eswa ninga mpikirheli Mulugu, mwenemo munele okala oligana.
14 Nona abalaga okweleya, vowi munojedhela dhilobo esi, kakosani guru yotene wila iyene aufwanyeni muhinna maleba, nne yovirigana vina na murenddele.
15 Ottiya eji, muziwe wi ovilela wa Nabuya wehu onodhana ovuneya, dhahene ninga yulebeleni mbalihu wokweleya Paulo na eziwelo evahiwiye,
16 alogaga dhilobo esi ninga munkoseliye mmakartani meena, vano dhilobo dhina dhilebiwemo dhinorutxa ononeleyamo, dhilobo eso abale ahinnonelamo vina ahinna nroromelo noliba anopupurutxa, dhahene ninga munkoselani na Malebo meena avitotelaga otolotxiwa.
17 Nona abalaga okweleya, muziwaga dhilobo esi mutanene, mukale txenjewa wila munapupurutxeliwe okosa dhilobo dhabure na attegi vina munadhe wobaniha nroromelo nenyu.
18 Ottiya ejo, munuwegevi na mahala a Mulugu, na eziwelo ya Nabuya wehu vina Mvuni Yezu Kristu. Iyene avahiwege nttittimiho ovanene vina okala n’okala-wene. Amen.
Manota
^ Kuloga, oruma onvira n’owaguva.
