3 Joau 1:1-14
1 Onleba ddi miyo munddimuwa,* ddinulebela weyo Gayu; ddinoukwela na murima waga wotene.
2 Mbalaga wokweleya, ddinolobela wi dhotedhene dhuweddelege pama, vina okaane egumi yaderetu dhahene ninga enna weyo ovanene.
3 Ddihagalala venji mudheli abali addaddela wi onoweddanavi ebaribari, vina olivi w’ororomeleya.
4 Kayiwo elobo yina enddittabiha venji, ehili wiwa wi anaga anoweddavi mwibaribarini.
5 Mbalaga wokweleya, onowoniha ororomeleya wawo mwa dhapama dhinakoseliwe abali, masiki ohaziwaga.
6 Awene aloga mwaha wa wakwela wawo abali a mmulogoni. Ddinouttidda myeddo, wakamihedhe na esile dhinwodhiwe* agafunaga okosa oleddo wawa, n’ekalelo enimuzivela Mulugu.
7 Txibarene mwaha wa nzina na Mulugu, awene ahidhowa olaleya ahijedhelaga ovahiwa elobo na attu a malogo meena.
8 Nona ninofuniwana wawakelaga pama abali ninga aba, wila neddegena ebaribari vamodha na awene.
9 Ddihalebela karta abali otene a mmulogoni, mbwenyi Diótrefi ontameletxa okala mburo woroma vari va abali, kanvaha ttima esile dhinloga iyo.
10 Nona miyo ddigadha wenewo ddinele ovitula dhinkosiye vina ottambi onnizivaleliye,* ottiya ejivi iyene onokodda wawakela abali na nriho vina onotamela wakoddiha vina wattamagiha mmulogoni abale anfuna wawakela abali.
11 Mbalaga wokweleya, kutagihe dhili dhabure, otagihe dhili dhapama. Onkosa esile dhili dhapama ondha wa Mulugu, onkosa esile dhili dhabure kanimuziwa Mulugu.
12 Otene anologa pama mwaha wa Demétriyu, ebaribari enovaha onamoona waye. Txibarene iyo ninovaha onamoona oku, weyo vina onoziwa wi dhinlogihu s’ebaribari.
13 Miyo ddahikana dhinji dhowulebela, mbwenyi kaddinfuna wulebelagavi na papeli vina na tinta.
14 Vano ddinojedhela odha wenewo momaguva wi niloge kove na kove.
Murenddele okale na weyo.
Amarho ehu anouperhekela malejelo. Waperhekele malejelo aga amarho ehu mmodha-mmodha.
Manota
^ Obe, “muluvali.”
^ Txino yatapulela wavaha kobiri wi alabihedhe muleddoni mwawa.
^ Na egregu, “onowaba alogaga mazu abure.”
