Filémoni 1:1-25
1 Miyo Paulo, ofugeliwe sabwa ya Kristu Yezu vamodha na Timóteo mbalihu, ddinoulebela weyo Filémoni mukamihedhi wehu wokweleya.
2 Ddinomulebela vina murogorihu Ápiya vina Arkipu munyakoddo mukwehu mwa Kristu na mulogo ontugumana vatakulu vawo.
3 Nyuwo mukane mahala na murenddele wa Mulugu Babihu vina wa Nabuya Yezu Kristu.
4 Mudhidhi wotene ddinomutamalela Mulugu waga, dduromolaga weyo mmalobeloni mwaga,
5 vowi ddinowiwavi ologiwa mwaha wa nroromelo na okwela wawo onimukweliwena Nabuya Yezu vina akoddeli otene.
6 Ddinolobela wi nroromelo ninehuna mumodhani nuttukulele ononelamo dhapama dhotedhene dhinehuna mwaha wa Kristu.
7 Ddahagalala vina ddahipangarhazeya venjene ddiwaga ologa wa okwela wawo, vowi weyo mbali ohagalaliha mirima dha akoddeli.
8 Nona, masiki vanemina ofuru mwa Kristu wa wuruma okosa eli yapama,
9 ddinfuna ddukumbirhe mwaha wa okwela, onukumbirha ddi miyo Paulo, wuluvalile vina ofugeliwe mwaha wa Kristu Yezu.
10 Miyo ddinouttidda myeddo mwaha wa mwanaga Onezimu, odduwene omukalilemi babe baddili mukambura.*
11 Wale iyene kaupurelihamo elo, mbwenyi ovanene onoupurelihamo weyo vina onoddipurelihamo miyo.
12 Miyo ddinomuruma wili odha oliwe, ndde iyene wa vamurimani vaga.*
13 Miyo ddigahiziveliwa wi iyene akale okuno na miyo wi addirele esile dhafuniwe oddirela, oku miyo baddili wofugeliwene mwaha wa miselu dhapama.
14 Mbwenyi kadinfuna okosa elo ddihinatti ouziwiha wila merelo awo apama anakale ninga omageleliwa, vano okose na ofuna wa murima wawo.
15 Txino jijene emuttukuleli iyene ovenyavo vatakulu vawo, wila eyele akalegevi na weyo,
16 kahiyo ninga mudhari mbwenyi opitta mudhari, ninga mbalawo wokweleya, miyo ddinomukwela venjene nona weyo omukwele vina venjene ninga mudhari vina ninga mbalawo mwa Nabuya.
17 Akala weyo onoddona ninga mukwawo, omwakele pamene dhahene ninga mugaddakelile weyo.
18 Ottiya ejo, akala iyene ohuttegela obe okaana mangawu na weyo, miyo ddinele oupitxela.
19 Miyo Paulo ddinoleba ejiya na mada aga: Ddinele oupitxela—ottiya ejo, weyo okaana mangawu na miyo, mangawuyá ji egumi yawo.
20 Ndde mbalaga, miyo ddinofuna wakela nikamihedho ntti nawo mwaha wa Nabuya; kahagalaliha murima waga mumodhani na Kristu.
21 Ddikaana ebaribari wila weyo onele okosa yukumbirilemi, nona ddulebela vowi ddinoziwa wila onele wira opitta esile dhulobilemi.
22 Ottiya ejo, ddinokumbirha wi oddisasanyedhe mburo wila miyo ddigadha ddikalevo, sabwani ddinokuluvela wi na malobelo anddikoselinyu ddinele ofuruliwa, ddidhé ddikale na nyuwo.
23 Epafra, mukwaga ofugeliwe mukambura vamodha na miyo, mwaha wa Kristu Yezu onouperhekela malejelo,
24 vina Marko, Aristarko, Demas na Luka anlaba vamodha na miyo, anouperhekela malejelo.
25 Mahala a Nabuya Yezu Kristu akale na nyuwo mwaha wa mweddelo wenyu wapama.
