Akadda Galásia 1:1-24
1 Miyo murumiwi Paulo, ddinoulebelani nyuwo, kaddittomiwe na attu wi ddikale murumiwi mbwenyi ddittomiwe na Yezu Kristu vamodha na Mulugu, Babihu onvenyihile iyene mukwani.
2 Miyo Paulo vamodha na abali otene ororomeleya, ninoulebelani nyuwo muli milogo dh’o Galásia:
3 Mukane mahala a Mulugu na murenddele ondha wa Mulugu Babihu vina wa Nabuya Yezu Kristu.
4 Iyene oviperheka mwaha wa dhottega dhehu wila anivune mwilaboni ejino yabure* ninga munfunela Mulugu Babihu.
5 Mulugu attittimihiwe okala n’okala-wene. Amen.
6 Ddinotikina sabwani nyuwo munomuttiya Mulugu odduwene ouwittaneleni na mahala a Kristu mufiyedhaga orumela miselu dhina dhapama.
7 Kahiyo wi dhikalawo miselu dhina dhapama; mbwenyi akalawo ena anuzuzumihani vina anfuna opupurutxa miselu dhapama mwaha wa Kristu.
8 Nona, masiki akalewo mmodha wa iyo obe anju wa wirimu onulaleyelani miselu dhapama dhinttiyana na esile dhulaleyileni iyo, oddoyá agwihedhiwe ntowa.
9 Dhahene ninga mmalelihu ologa, ddinologa wili; wi muttu-muttuvi onulaleyelani miselu dhapama dhinttiyana na esile dhirumelilenyu, agwihedhiwe ntowa.
10 Koddi miyo ddintamela orumeliwa na attu obe orumeliwa na Mulugu? Obe ddinfuna ddawagalalihe attu? Miyo kowawagalalihagavi attu, kaddigakalile mudhari wa Kristu.
11 Abali, ddinfuna wila muziwe wi miselu dhapama dhulaleyileni miyo kadhindha wa attu.
12 Sabwani kaddakelile na attu, nne kaddisunzihiwe na muttu mbwenyi Yezu Kristu ddiddiziwihile.
13 Txibarene, nyuwo muhiwa wi miyo wale ddeddana yeddelo ya Ayuda vina ddanfwara-fwara venjene* mulogo wa Mulugu, ddankosela dhabure dhinjidhene mulogoyá obo wila ddigomihe,
14 vina ddanfwara vaddiddi yeddelo ya Ayuda opitta attu a nlogo naga anna vyaka dhakakene na miyo, vowi ddankanela vaddiddi ntidi dhilemelelo dha azamani aga.
15 Mbwenyi Mulugu, odduwene oddisakulile ddihinatti obaliwa vina oddikuweleli mahala aye, ohona wi japama
16 oddiziwiha Mwanaye wi ddalaleyele malogo miselu dhapama mwaha wa mwanaye, miyo kaddidhowile omukumbirha malago muttu* mwina,
17 nne kaddidhowile o Jeruzalemi wi ddagumane na abale àli arumiwi miyo ddihinatti, mbwenyi ddidhowile o Arábiya mmalelemi baddiyelela o Damasko.
18 Vano mvirele vyaka ttaru ddidhowa o Jeruzalemi wi ddamone Sefa,* ddikala na iyene masiku 15.
19 Mbwenyi kaddawonile arumiwi ena, ahili Tiago mbali wa Nabuya.
20 Mwaha wa dhilobo dhinulebelani miyo, ddinouwaddelani vamentoni va Mulugu wi kaddinozivala.
21 Mmalelani ddidhowa mirudda dh’o Síria na dh’o Silísia.
22 Mbwenyi anamafwara a Kristu a milogo dh’o Judeya kaaddiziwa.
23 Ewa ologa bahi wi: “Mulobwana oddule wanifwara-fwara vina wakosela dhabure milogo, ovano onolaleya miselu dhapama.”
24 Venevo awene aroma omuttittimiha Mulugu mwaha waga.
Manota
^ Obe, “nsaka nabure.” Kang’ana Mazu Atapuleliwe.
^ Na egregu, “ddanfwara-fwara vopitta.”
^ Na egregu, “maningo na nikami.”
^ Onkuweliwa vina Pedro.
