Akadda Galásia 2:1-21
2 Vano mvirele vyaka 14 ddidhowa dila yanawili o Jeruzalemi na Barnabé, ddamuttukula vina Tito.
2 Ddidhowilewo sabwa ya esile dhaddaddelile Nabuya Yezu, vina ddihanonihedhamo abali asogorhela mmulogoni, miselu dhapama dhinalaleyelimi attu a malogo meena. Mbwenyi ddawaddelile ejoyá vawa-vene wi ddikane ebaribari yawi mabasa amukoselimi Mulugu ali apama obe abure. Obe akala yamalelimi wira kaddereli ebewene.
3 Mbwenyi Tito wali na miyo, kavo ommageleli wi atxetteliwe masiki iyeneyá bali Mugregu.
4 Makani aba eteyile sabwa ya abali a ottambi avolowile mmulogoni noshaga wila anizivalelege; awene afuna one ofuru onna iyo mwaha wokala anamafwara a Kristu Yezu, wila anittukulele wiyelela okala adhari a nlamulo,
5 mwa awene kanawiweleli, nne ngafuna mwa mudhidhi mung’onovi,* wila ebaribari ya miselu dhapama ekalegevi na nyuwo.
6 Vano abale avyona ninga attima—mwa miyo kaddawonilena ottiyana sabwani Mulugu kanimuttonga muttu ang’anaga eliye otakuluvi—alobwana abo a ettomo kalogile elo yonile miyo ninga eswa.
7 Ottiya ejo, awene ahona wi miyo ddahakela mabasa a walaleyela miselu dhapama abale ahitxetteliwe, dhahene ninga Pedro wakelile mabasa a walaleyela miselu dhapama abale atxetteliwe—
8 sabwani Mulugu onvahile Pedro owodha wa okala murumiwi wa attu atxetteliwe, oddivaha miyo vina owodha wa walaleyela miselu dhapama attu a malogo meena—.
9 Venevo Tiago, Sefa* na Joau àli ninga asogorheli,* muziwelani wi iyo nahakela mahala a Mulugu, anittanikela mada awa a mono woja, miyo na Barnabé ninga ezinddiyelo ya olaba mumodhani, wila iyo nidhowe naalaleyele miselu dhapama attu a malogo meena, awene adhowe àlaleyele abale atxetteliwe.
10 Awene anikumbirhile bahi wi nihadduwale abali ali ayelegi, vina jijuwene enivilibihedhaga miyo okosa.
11 Vano mfiyedhe Sefa* o Antiokiya ddihimpambiha ddilogaga na iyene kove na kove sabwani wahivonya.
12 Sabwani attu arumiwe na Tiago ahinatti ofiya, iyene wanja na attu a malogo meena, mbwenyi mfiyedhe attu abo iyene ottiya oja na awene vina ologa, awovaga abale atxetteliwe.
13 Ayuda ena avitaganyiha vina na Sefa* mugwarhagwambini mpo, ofiyedha Barnabé vina ovitaganyiha mugwarhagwambini mwawa.
14 Mbwenyi monelimi wi awene kedda mowiwanana na ebaribari ya miselu dhapama, miyo ddimwaddela Sefa* vamentoni va otene: “Akala weyo oli Muyuda vina onkalawo ninga attu a malogo meena, ottiya ninga Ayuda, onwodha dhavi wamagelela attu a malogo meena okalawo afwaraga yeddelo ya Ayuda?”
15 Iyo oli Ayuda obaliwana, ottiya okala attegi a malogo meena,
16 ninononelamo wi kawo muttu oniriwa muligani sabwa ya wira dhinruma nlamulo, mbwenyi sabwa ya omuroromela Yezu Kristu, nona nimuroromele Yezu Kristu wila niriwe aligani mwaha wa omuroromela Kristu, ottiya mwaha wa wira dhinruma nlamulo, sabwani kawo muttu oniriwa muligani mwaha wa ovirihamo dhinloga nlamulo.
17 Akala iyo ninofwanyiwana yottega, oku nitamelaga wiriwa aligani mwaha wa Yezu Kristu, kuloga Kristu mwimeleli wa yottega? Nne-wene, kahiyo!
18 Akala ddinomaga wili esile dhifudhilemi, ddinoniha wi ddili namalupa nlamulo.
19 Sabwa yawi ddaneddana nlamulo, ddihikwela nlamulo wila ddimukalelewo Mulugu.
20 Ovano ddikomeliwa vapingirhizini na Kristu; onkalawo kahiyo miyo vina, mbwenyi ddi Kristu onkalawo mumodhani na miyo, txibarene, egumi enkalawo miyo na maningo ddinkalelawo omuroromela Mwana Mulugu, oddikwelile vina operhekile egumi yaye mwaha waga.
21 Miyo kaddinkodda mahala a Mulugu, sabwani akala oligana ondha mwaha wa nlamulo, txibarene Kristu okwile ebewene.
Manota
^ Na egregu, “wora modha.”
^ Onkuweliwa vina Pedro.
^ Obe, “abuwene àli ninga matxikwa a milogo.”
^ Onkuweliwa vina Pedro.
^ Onkuweliwa vina Pedro.
^ Onkuweliwa vina Pedro.