Akadda Galásia 3:1-29
-
Ottiyana wa weddana merelo a Nlamulo na nroromelo (1-14)
-
Muligani onakalelewo mwaha wa nroromelo (11)
-
-
Abrahamu kakelile nipikirhelo mwaha wa weddana Nlamulo (15-18)
-
Kristu, odhile muzizani na Abrahamu (16)
-
-
Witiwa wa Nlamulo vina sabwaya niteliwani (19-25)
-
Ana a Mulugu mwaha wa nroromelo (26-29)
-
Ziza na Abrahamu, babale ali mumodhani na Kristu (29)
-
3 Nyuwo atolo akadda Galásia, bani ouravihileni obure obo? Nyuwo mwakelile masunziho owakwana mwaha wa Yezu Kristu okomeliwe vapingirhizini.
2 Ddikaana elobo enfuna miyo ouvuzani:* Nyuwo mwakelile muya wokoddela mwaha wa weddana merelo anrumiwa munlamuloni obe mwakelile mwaha wa ororomela esile dhiwalenyu?
3 Mukalile dhavi atolo? Wale nyuwo mweddihiwa na muya wokoddela, ovano munfwara dhubuwelo dh’omuttu?
4 Koddi goyi esile dhotedhene mutabuweli ebewene? Ddikaana ebaribari wi kamutabuweli ebewene.
5 Koddi ole onuvahani muya wokoddela vina onira mabasa otikiniha vari venyu, onkosela mwaha wa nyuwo weddana merelo anrumiwa munlamuloni, obe onkosela mwaha wa nyuwo ororomela esile dhiwalenyu?
6 Jijene epadduwile na Abrahamu, iyene “omuroromela Yehova, nona ohoniwa ninga muligani.”
7 Txibarene, munoziwa wi abale anna nroromelo balí ana a Abrahamu.
8 Malebo ahiloga mutanene wi Mulugu agahawira aligani attu a malogo meena mwaha wa nroromelo; Mulugu omulaleyela Abrahamu mutanene miselu dhapama alogaga: “Mwaha wawo attu a malogo otene anele orurihiwa.”
9 Nona, abale anna nroromelo anorurihiwa vamodha na Abrahamu wanna nroromelo.
10 Otene abale ankuluvela merelo anrumiwa munlamuloni agwihedhiwa ntowa, sabwani elebiwa: “Wa ntowa ddule ohineddana dhotene dhilebiwe muroluni ya Nlamulo.”
11 Ottiya ejo, enowoneya wi kawo oniriwa muligani na Mulugu mwaha wa ofwara Nlamulo, sabwani “muligani onakalelewo mwaha wa nroromelo.”
12 Nlamulo kanindha mwaha wa nroromelo, ottiya ejo, “ole onvirihamo dhinruma nlamulo onele okalelawo esuwene.”
13 Kristu onigula anobolaga mwa ntowa na Nlamulo, iyene orumela ogwihedhiwa ntowa vamburoni vehu, vowi ehilebiwa: “Wa ntowa ddule ontomeyiwa vapingirhizini.”
14 Ejo epadduweli wi nruriho na Abrahamu nafiyedhe attu a malogo meena mwaha wa Yezu Kristu, wila nakele muya wa Mulugu opikirheliye ovaha mwaha wa nroromelo nehu.
15 Abali, miyo ddinuloganina na yoladdaniha ennonelamo attu: Nipagano nigamala wimetxiwa masiki na muttu mmodha, kawo onfudha nne ngafuna onenjedhedha.
16 Ovano okoseliwe mapikirheloyá ddi Abrahamu na ziza* naye. Malebo kanloga, “ziza* naye notene,” ninga enjivile; mbwenyi anloga, “ziza* naye” amutonyaga mmodha bahi, oli Kristu.
17 Ottiya ejo, ddinloga dhahi: Nlamulo nikalilewo mvirele vyaka 430, kaninfudha nipagano nikosile Mulugu ofiyedha ogomiha nipikirhelo.
18 Akala wi ninele wakela yohalana mwaha wa weddana nlamulo, bahito kaninakele mwaha wa nipikirhelo; vano Mulugu n’opama waye ohinvaha Abrahamu ejiya mwaha wa nipikirhelo.
19 Nlamulo nikalelewo eni? Nikaleliwo wi niziwihe dhottega mpaka ofiya ziza nakoseliwe nipikirhelo. Mulugu wanarumelana anju nlamulo wi amvahe mulogeli, mulogeliyá wanafiyedhana nlamulona attu a nlogo.
20 Nipagano nigakosiwa na muttu mmodha bahi kavanfuneya mulogeli, jakene eli Mulugu, iyene oli mmodha.
21 Kuloga Nlamulo ninogudulana na mapikirhelo a Mulugu? Nne, kahiyo mwenemo! Kovahiwa nlamulo nawodha ovaha egumi, oligana ogadhile mwaha wa nlamulo.
22 Mbwenyi malebo anloga wi dhilobo dhotedhene dhiperhekeliwa yottega wi abale anna nroromelo afwanye dhilobo dhapama dhipikirheliwe abale animuroromela Yezu Kristu.
23 Vano nihinatti omuroromela Kristu, iyo nakoyiwa na nlamulo vina neddihiwa na nlamulo nakene, oku nijedhelaga yafuna Mulugu oziwiha.
24 Nlamulo nannisogorhela* ninittukulelaga wa Kristu wi niriwe aligani mwaha wa nroromelo.
25 Ovano vanimuroromelihu Kristu, kaninsogorheliwa* vina na nlamulo.
26 Txibarene, nyuwo motene muli ana a Mulugu mwaha wa omuroromela wenyu Kristu Yezu.
27 Vowi nyuwo motene mbatiziwe mwa Kristu, muttukula yeddelo enligana na ya Kristu.
28 Kawo nne Muyuda nne Mugregu, nne mudhari nne furu, nne mulobwana nne muyana, vowi nyuwo motene muli muttu mmodha, mumodhani na Kristu Yezu.
29 Ottiya ejo, akala muli a Kristu, muli a ziza na Abrahamu vina munele wakela dhakakene dhipikirheliwe Abrahamu.
Manota
^ Na egregu, “ddinfuna muddisunzihe.”
^ Na egregu, “beu.”
^ Na egregu, “beu.”
^ Na egregu, “beu.”
^ Entapulela, ole onimwang’anela obe onimbarela mwana.
^ Entapulela, ole onimwang’anela obe onimbarela mwana.
