Akadda Galásia 4:1-31
4 Ddinouwaddelani, muttu onfuna ottiyedhiwa dhohalana agakala mwana kanttiyana na mudhari, masiki akalaga mwinya wa dhotedhene;
2 mbwenyi akalawo attu animusogorhela vina ansogorhela nyumba yaye ofiyedha siku nittomile babe mutanene.
3 N’ekalelo yakakene, valihu aima nàli adhari a esile dhihimpurela elo dha elabo ejino.
4 Mbwenyi mfiyedhe nsakana, Mulugu omuruma Mwanaye, obaliwe na muyana odduwene weddihiwa na nlamulo,
5 wila apitxele muttengo onawobolela abale eddihiwa na Nlamulo wi nikane gari ya okala ana a Mulugu.
6 Nona vowi muli ana, Mulugu oruma muya wa Mwanaye mmurimani mwehu vina muyayá onologa “Aba,* Babani!”
7 Nona ovano kuli mudhari, mbwenyi oli mwana; vina akala oli mwana onele wakela esile dhinfuna ouvaha Mulugu.
8 Vano, vahamuziwa nyuwo Mulugu, mwali adhari a esile dhihili amulugu.
9 Mbwenyi ovano vamuziwilenyu Mulugu obe vaziwiwenyu na Mulugu, munfunelani wiyelela dhilobo dhebewene, dhawobana, dhohikana mabasa, muvittiyaga wili okala adhari a esuwene?
10 Nyuwo munubuwela wi akalawo masiku, myeri, masaka na vyaka dhattima opitta dhina, nanda munoriha esuwene.
11 Ddinoukubanyedhani, ddinowova wi guru dhukoseleni miyo dhinakale dhebewene.
12 Abali, ddinoulobani, mukale ninga miyo, sabwani miyo vina ddali ninga nyuwo. Kamuddikoseli elo-wene yabure.
13 Mbwenyi nyuwo munoziwa wi yali sabwa ya oredda okanilemi gari ya oulaleyelani dila yoroma miselu dhapama.
14 Masiki vaukaleleni eredda yaga yoweha, nyuwo kamuddinyanyalile nne vina kamuddipwazile,* mbwenyi muddakela ninga anju wa Mulugu vina ninga Kristu Yezu.
15 Ohagalala okule wannenyu oli wuvi? Sabwani miyo ddikaana ebaribari yawi wale kowodheya nyuwo mugakorhovoramo mento enyu, muddivaha miyo.
16 Koddi ovano ddili mwiddani wenyu sabwa ya ouwaddelani ebaribari?
17 Awene anotamela venjene okwekwetta mirima dhenyu, mbwenyi kantamela oupurihani, antamela oumwalanihani na miyo wi mwafwarege awene.
18 Txibarene, japama okalawo attu ena antamela okwekwetta mirima dhenyu afunaga oupurihanimo, ottiya bahi miyo ddigakala na nyuwo.
19 Abalaga okweleya, ddinowiwa opa mwaha wenyu, opawa oku onladdana na wa muyana ofiyedhiwe mudhidhi wobala. Ddinowiwavi opa oku mpaka nyuwo woniha omuttu oswa onladdana na wa Kristu.
20 Miyo ddigahiziveliwa okala wenewo na nyuwo dduloganina n’ekalelo yottiyana, sabwani kaddinziwa enfwanyela miyo oukoselani.
21 Muddaddele, nyuwo munfuna weddihiwa na nlamulo, kamuniwelela Nlamuloná?
22 Motagiha, elebiwa wi Abrahamu wanna aima eli a analobwana, mmodha wambalile na muyana wa mudhari, mwina wambalile na muyana wa furu.
23 Mwana wa muyana wa mudhari obaliwe ninga mumbaleliwa aima ena, vano mwana wa muyana wa furu obaliwe mwaha wa nipikirhelo.
24 Dhilobo esi dhikaana yotapulelamo yina, jiji: Ayana aba antonya mapagano meli, nimodha nikosiwe o Mwangoni Sinai, nttuwene ninabala aima wi akale adhari. Nipagano ntti ninligana Agar.
25 Agar onimutonya Sinai, mwango oli o Arábiya, ovano ontapulela Jeruzalemi; vowi iyene mudhari vamodha na anayeyá.
26 Mbwenyi Jeruzalemi wa wirimu dd’ofuru, iyene ddi mayihu.
27 Vowi ehilebiwa: “Kattaba, muyana wa ngomwa, ohimbala, kuwa n’ohagalala muyana ohonile goyi dhobala, sabwani ana a muyana ottiyiwe ahinjiva opitta a ole oli na mamunaye.”
28 Abali, nyuwo muli ana abaliwe mwaha wa nipikirhelo dhahene ninga Izaki.
29 Dhahene ninga nsaka nttile, mwana wabaliwe ninga mumbaleliwa ena, wahiroma omwidda ole obaliwe na muya wokoddela, yakakene jimpadduwa masaka abano.
30 Vano txini enloga malebo? “Omuttamagihe mudhari na mwanayeyá vowi mwana wa muyana wa mudhari, kanagawelena dhohalana vamodha na mwana wa muyana wa furu.”
31 Nona abali, iyo kanili ana a muyana wa mudhari, mbwenyi a muyana wa furu.