Akadda Galásia 5:1-26
5 Kristu onobola wi nikale afuru. Nona mukale ovikomene, vina muhirumele wili wiriwa adhari.
2 Mukale txenjewa! Miyo Paulo ddinouwaddelani wi mugatxetteliwa, Kristu kanaupureleni elo.
3 Ddinologa wi mulobwana wotene onrumela otxetteliwa onomageleleya wiwelela Nlamulo notene.
4 Nyuwo muntamela wiriwa aligani mwaha wa weddana nlamulo, mumwalana na Kristu, nyuwo mukodda wakela mahala a Kristu.
5 Iyo oneddihiwa na muya wokoddela ninojedha na murima wotene oligana ondha mwaha wa nroromelo.
6 Mwa abale ali mumodhani na Yezu Kristu, otxetteliwa vina ohitxetteliwa kunna ttima, ninna ttima tti nroromelo nindha mukwelani.
7 Nyuwo mwela wedda pama mwibaribarini.* Bani wuttihileni wiwelelaga ebaribariyá?
8 Masunziho a abale auttihileni wiwelela kandha mwa Mulugu ouwittanileni.
9 Emela eng’onovi enodhakuwiha ottu wetene omunyiwe.
10 Ddikaana ebaribari wi nyuwo muli mumodhani na Nabuya, kamunobuwele n’ekalelo yottiyana; mbwenyi muttu ddi muttu ontamela oukwekwettani, kintanala eliye, onele ottongiwa ninga munfwanyeleliye.
11 Mwa miyo, abali, akala ddinolaleyavi mwaha wa otxetteliwa, kito ddinfwara-fwareliwa nni? Bili dhawene, nlugu n’okwakwattutxa mwaha wa pingirhizi ya Yezu, nigomihiwa.
12 Miyo ddanfuna wi alobwana abo antamela ouzuzumihani, avipe muguwoni.*
13 Abali, nyuwo mukuweleliwa ofuru, vano kamulabena ofuru oko ninga gari ya wirana dhofuna dha maningo, ottiya ejo, na okwela mulabe ninga adhari mukamihedhagana muttu na mukwaye.
14 Nlamulo notene, ninakwanihedheya* na yoruma eji: “Omukwele muttu mukwawo ninga envikweliwe wamwinya.”
15 Mwadidelaga olumana vina otakunana, porhe-porhe munadhe otolotxana mukalelinyu.
16 Ddinouwaddelani, mweddegevi na muya wokoddela, dhawene kamunere-wene yofuna ya maningo.
17 Efunelo ya maningo enogudulana na esile dhinfuna muya wokoddela; efunelo ya muya wokoddela enogudulana na esile dhinfuna maningo, dhobili kadhiniwanana; nona nyuwo kamunkosa esile dhinfunenyu wira.
18 Ottiya ejo, akala nyuwo muneddihiwa na muya wokoddela, kamuneddihiwa vina na nlamulo.
19 Esile dhinfuna maningo dhinoziweya-wene, sisi: ogonihana wonyakuwa,* dhotakala, mweddelo wohifwanyelela ontota manyazo,*
20 webedha dhingamuttu, wira dhodomonyo,* widdana, owana-wana, aje, owali, opambihana, ogawana, wita makuru,
21 osilila, olezela, mattanga otakala,* na dhina dhinladdana na esene. Ddinouwaddelani esidhá, dhahene ninga muwaddelileni miyo, wi anira esidhá kanavolowe mumweneni mwa Mulugu.
22 Ottiya ejo, mikalelo* dhindha na muya wokoddela sisi: okwela, ottaba, murenddele, ovilela, opama, murima wa pama, nroromelo,
23 okurumuwa, ovyang’anela. Kaniwo nlamulo ninviriganiha mikalelo esi.
24 Vano, abale ali mumodhani na Kristu Yezu, akomela vapingirhizini maningo awa vamodha na esile dhàzivela na dhafunani.
25 Akala nineddihiwa na muya wokoddela, neddegevi mowiwanana na muya wokoddela.
26 Kanikale anamavittukulela, nitamelaga mavurhano muttu na mukwaye vina nisililagana muttu na mukwaye.
Manota
^ Na egregu, “nyuwo mwanttamaga pama.”
^ Dhawene kagafwanyelile weddana nlamulo nabarelani.
^ Obe txino, “ningwaddiwa.”
^ Na egregu, porneya. Kang’ana Mazu Atapuleliwe.
^ Na egregu, aselgeya. Kang’ana Mazu Atapuleliwe anloga: “Mweddelo Wohifwanyelela Ontota Manyazo.”
^ Obe, “okwiri.”
^ Mattanga abo, muttu-muttu onkosa esile dhinfuniye.
^ Na egregu, “dhawima.”
