Akadda Galásia 6:1-18
6 Abali, akala muttu onoroma wedda dila yabure ahinonelagamo, nyuwo muneddihiwa na muya wokoddela mutamele omwiyihedha mudilani yebaribari; mbwenyi munofwanyela okosa ejoyá na murima wofwaseya vina wokurumuwa. Vano muttu-muttu avyang’anele mwinya wi anagwele munyengetteyani vina.
2 Mukamihedhagane na esile dhinukattamihani* mugakosa dhawene, munele wakwaniha nlamulo na Kristu.
3 Akala muttu onowubuwela wi okaana ttima oku ahili elo, onovinyengetta mwinya.
4 Nona muttu-muttu apime merelo aye, dhawene onele okaana mwaha wa wagalala na merelo aye, ottiya mwaha wa oviladdaniha na ena.
5 Txibarene, muttu-muttu onattukule muttorho waye.*
6 Ottiya ejo, muttu onsunzihiwa nzu na Mulugu, agawelena dhapama dhaye dhotene na ole onimusunziha.
7 Kamuvinyengette: Mulugu kanvegiwana. Txibarene, muttu-muttu onasinange ejile yaliliye;
8 sabwani ole onala obuwelaga dhofuna dha maningo aye ottega, onasinange otolotxiwa ondha mwaha wa maningo aye ottega; mbwenyi ole onala eddihiwaga na muya wa Mulugu, onasinange egumi yohimala endha na muya wa Mulugu.
9 Dhahene, nihitxelele wira dhapama, sabwani ninele osinanga vansakaniva, nigahikumuwe.*
10 Nona, egakala yofuneya okamihedhana muttu na mukwaye, nakamihedhe otene, makamaka abalihu na arogorihu, anihuna nroromelo nakakene.
11 Kang’anani wunuwa wa maletra a karta yaga yulebeleni miyo.
12 Abale antamela waziveliha attu, babuwene anukukuselani otxetteliwa; awene ankosela ejoyá wi anafwara-fwariwe na pingirhizi* ya Kristu.
13 Sabwani abale antxetteliwa, kanvirihamo Nlamulo, mbwenyi anfuna wi nyuwo mutxetteliwe wila awene akaane mwaha wa ogayana maningo enyu.
14 Vano miyo txipo kaddingayana elo yina, ehili mwaha wa Nabuyehu Yezu Kristu okwile vapingirhizini.* Mwaha wa okwa waye, miyo ddinona wi elabo ejino ekwa, vina miyo ddikwa mwa elabo ejino.
15 Sabwani elitxi ya makamaka kahiyo otxetteliwa nne ohitxetteliwa, mbwenyi ku okalihiwa muttu muswa na Mulugu.
16 Murenddele na ttagaraga ya Mulugu ekale na otene abale anedda na malago aba; ndde, murenddele na ttagaraga dhikale na Izrayel wa Mulugu.
17 Oromana ddabuno ofiyedha musogorho, ahikalewo muttu ondditotela makattamiho, sabwani ddikaana mambazi mmaningoni mwaga anoniha wi ddili mudhari wa Yezu.
18 Mahala a Nabuya wehu Yezu Kristu akale na muya oneddana nyuwo. Amen.
Manota
^ Obe, “mittorho dholemela.”
^ Obe, “muttorho wa merelo aye.”
^ Obe, “nigahitxelele.”
^ Obe, “pingirhizi ya goyi.” Kang’ana Mazu Atapuleliwe.
^ Obe, “pingirhizi ya goyi.” Kang’ana Mazu Atapuleliwe.
