Ahebreu 10:1-39
10 Vowi Nlamulo ezinddiyelo ya dhilobo dhapama dháfuna odha, mbwenyi kahiyo ebaribari, txipo kigawodheyile Nlamulo ntti na mikutto dhakakene dhimperhekiwa yaka-yaka wakaliha aligani, abale andha omwebedha Mulugu.
2 Kowiliwa mikutto dhannakosiha okala aligani, mikuttodhá kadhigattiyiwe operhekiwa? Sabwani abale animulabela Mulugu komala okoddelihiwa kagobuwela vina dhottega.
3 Mbwenyi mottiyana-mwene, mikutto eso dhimperhekiwa yaka-yaka dhinowawubutxedha dhottega dhawa.
4 Sabwani kinwodheya nikami na ng’ombe dhapogo vina nikami na mbuzi dhapogo ogomiha dhottega.
5 Nona Yezu adhaga mwilaboni, ohiloga: “‘Nyuwo kamufunile mikutto nne mivaho, mbwenyi muddisasanyedha maningo.
6 Kamurumelile mivaho dhoddumeya nne mikutto dhimperhekiwa mwaha wa dhottega.’
7 N’eji ddihiloga: ‘Ddili veneva (mu roluni mulebiwa mwaha waga) wi ddikose ofuna wenyu Eh Mulugu.’”
8 Iyene ohiloga vamaromo: “Nyuwo kamufunile nne kamurumelile mikutto, mivaho, mivaho dhoddumeya nne mivaho dhimperhekiwa mwaha wa dhottega.” Mikutto eso dhimperhekiwa nifwariwaga Nlamulo.
9 Mmaleliye ohiloga: “Ddili veneva wi ddikose ofuna wenyu” iyene onogomiha dhoroma wi ekevo dhanawili.
10 Na “ofuna” oko nihitxenihiwa na mvaho wa maningo a Yezu Kristu dila modha bahi.
11 Ottiya ejo namakutta wetene onokala vamburoni vaye va mabasa siku na siku wila amuttiddele mabasa Mulugu akuttaga dila dhinjidhene mikutto dhakakene, esuwene dhihinwodha ogomiha-mugomihedho dhottega.
12 Mbwenyi Kristu operhekela mukutto dhottega dila modha okala n’okala-wene vina ogilati omononi w’oja wa Mulugu,
13 ovenyana venevo, ajedhelaga mpaka mudhidhi onfuna wikiwa amwiddani aye mutxiddo mwa manyalo aye.
14 Sabwani mwaha wa mukutto operhekiliye dila modha, iyene ohakaliha aligani okala n’okala-wene abale ankoddelihiwa.
15 Ottiya ejivi, muya wokoddela vina ononivaha onamoona ologaga dhahi:
16 “‘Nipagano ninakose miyo na awene masiku abo agavira,’ ttintti: ‘Ddinele wika malamulo aga mmirimani mwawa vina ddinele oleba muyubuweloni mwawa,’” onloga ddi Yehova.
17 Iyene onowenjedhedhavo alogaga: “Kaddinobuwele vina dhottega dhawa, nne vina kaddinobuwele merelo awa ohiligana.”
18 Vanlevelela Mulugu dhottega eso dhotene kavanfuneya okosiwa mvaho wa oleveleliwana dhottega.
19 Nona abali, mwaha wa nikami na Yezu nikaana nikuluvelo na ovira dila ennidhowiha mburo wokoddela,
20 dila eswa vina envaha egumi enifuguleli iyene mwaha wa kurtina, kuloga, maningo aye,
21 vina vowi nikaana namakutta munddimuwa oli vatakulu va Mulugu,
22 nimususele na murima webaribari vina na nroromelo nowakwana, nikanaga murima wokoddelene na mubuwelo* okuputtiwe dhotakala dhotedhene vina na maningo asuwiwe na manje ottorhorha.
23 Nivilibihedhe olaleya njedhelo nehu nihiyelelaga mundduni, sabwani ole onipikirheli ddororomeleya.
24 Nubuwelagane* muttu na mukwaye wila nilibihe* okwela na wira mabasa apama.
25 Vina nihittiye otugumana ninga mulemeleli ena, mbwenyi nilibihagane muttu na mukwaye, ttabwattabwa apa vanoninyu wi sikuna nili vakuvi.
26 Sabwani akala ninowira yottega na ofuna wehu veneva vamalilehu wakela eziwelo yowakwana, yebaribari, kawuwo mukutto mwina wa oleveleliwana dhottega eso,
27 mbwenyi ninojedha ottongiwa wottabwa vina owali onligana na motto, onatolotxe abale aninvanya Mulugu.
28 Muttu ddi muttu onvanya Nlamulo na Mizé, onokwa aheddeliwaga ttagaraga, vagakala attu eli obe araru amvaha onamoona.
29 Nyuwo munona dhavi? Kanfwanyela wonihiwa goyi yottabwa muttu ole ompwazile Mwana Mulugu vina ohittittimihile nikami na nipagano nikoddelihiwiyena, oveyihile vina opwazile muya wa mahala a Mulugu?
30 Sabwani ninomuziwa Mulugu ologile dhahi: “Ntxiga mwinya ddi miyo; ddinele wiyiha.” Vina ologile: “Yehova onele ottonga nlogo naye.”
31 Txibarene yowopiha yottabwayá ja ogwela mmaddani mwa Mulugu oliwo.
32 Nona mubuwele masiku a mundduni abuwene awi, mmalele nyuwo ononihedhiwamo muvilela masoso menjene murabaga koddo enddimuwa.
33 Dila dhina nyuwo muruwaniwa vanamwinjini vina mufwanyiwa masoso, dila dhina mwankala vamodha n’abale apadduweliwa esidhá.
34 Vowi nyuwo muhaweddela ttagaraga abale afugeliwe mukambura vina muhirumela n’ohagalala wiyeliwa dhokana dhenyu, muziwaga wi dhilobo dhinna nyuwo sapama vina kadhimmala.
35 Nona kamunyanyale oliba wenyu murima* okuwene onattuveliwenyu venjivene.
36 Vowi enofuneya nyuwo ovilela wi mugamala okosa ofuna wa Mulugu mwakele dhipikirheliwe.
37 Vowi, “Ohalile mudhidhi mung’onovi bahi,” vina “Ole ondha onele ofiya, kanagonele.”
38 “Mbwenyi muligani waga onakalelewo mwaha wa nroromelo,” vina “ageyelela mundduni kaddinaziveliwena.”
39 Vano iyo kanili abale aniyelela mundduni wila atolotxiwe, mbwenyi nili attu anna nroromelo wila nivuniwe.
Manota
^ Kang’ana Mazu Atapuleliwe.
^ Obe, “nizuzumelagane; nikalelagane txenjewa.”
^ Obe, “nenjedhe.”
^ Na egregu, “ofuru wa ologa.”