Ahebreu 11:1-40
11 Nroromelo tti nikuluvelo nawi esile dhinjedheliwa dhinele opadduwa vina ezinddiyelo yawoneya entonyihedha wi txibarene esile dhihinoneya na mento dhikalawo.
2 Vowi sabwa ya nroromelo alobwana a masaka awale* ahakela onamoona* woniha wi anorumeliwa na Mulugu.
3 Na ororomela ninonelamo wi dha odhulu na dha vati apano dhidhile okalawo na nzu na Mulugu, esile dhinoneya dhidhile okalawo mwa esile dhihinoneya.
4 Na ororomela Abeli ohimperhekela Mulugu, mukutto wattima opitta wa Kayini, mwaha wa ororomela oko iyene ohakela onamoona wawi wali muligani vowi Mulugu, wahirumela mivaho dhaye vina masiki okwilevi nroromelo naye ninonisunziha.
5 Na ororomela Enoki ottukuliwa na Mulugu, wi ahitabuwe mudhidhi wafuniye okwa, vina kavo wonile odhowiliye sabwani Mulugu, wahimala omuttukula vowi ahinatti ottukuliwa iyene wahakela onamoona wawi wahimuziveliha Mulugu.
6 Ottiya ejo, muttu ohinna nroromelo kanwodha omuziveliha Mulugu, sabwani wotene ole onimususela Mulugu onofuniwana orumela wi Mulugu okalawo vina iyene onowattuva abale animutamela na murima wotene.
7 Na ororomela, Nowé mmaleliye wakela mpaganyo wa Mulugu mwaha wa esile dhahoneya, ohoniha omova Mulugu vina omusasanya pangaya mudhile ovuneya amudhaye; na ororomela oko iyene ohoniha wi elabo yanfwanyela otolotxiwa vina okala namakela wa esile dhinvahiwa aligani mwaha wa nroromelo.
8 Na ororomela, Abrahamu mukuweleliwiye na Mulugu, ohiwelela, ovenya odhowa mburo wampikirheli Mulugu wila onele omvaha; iyene odhowa, masiki ahiziwaga wadhowiye.
9 Na ororomela, okala ninga mwana-wedda mwilaboni yapikirheliwiye, okala ninga wali mwilaboni yaweddela akalaga mmisasani vamodha na Izaki vina Jakob, abuwene akelile vamodha na iyene dhapikirheliwani na Mulugu.
10 Vowi wanjedha sidadi yanna alisersi webaribari, esasanyedhiwe vina emagiwe na Mulugu.*
11 Vina na ororomela Sara masiki vakwaranyiliye vyaka dhobala ohakela guru ya ombala mwana,* vowi wannimuroromela* Ole wakosile nipikirhelona.
12 Nona mwa mulobwana mmodha wakalile ninga wakwile, mubaliwa ana enjene ninga vineneri dha wirimu vina ahinkontareya ninga mutxesa wa mbara.
13 Otene aba akwile aroromelaga, masiki vahakelilani dhilobo dhapikirheliwani, mbwenyi ahonela wolapela-wene vina ahirumela n’ohagalala, alaleya vanamwinjini wi awene àli anawedda vina anamakala a mudhidhi mung’onovi mwilaboni mwalani.
14 Abale anloga dhahene anowoniha wi anotamela na murima wotene mburo wawa wi akalegevo.
15 Vano, kowiliwa ela wubuwelavi mburo wakalani wale, awene agahikana efunelo yawiyela.
16 Mbwenyi mwahaya bwawi attu aba antamela mburo wapama, kuloga mburo wa wirimu, nona Mulugu kankana manyazo mwa okuweliwa Mulugu wawa, vowi ohasasanyedhela sidadi.
17 Na ororomela, Abrahamu mweheliwiye na Mulugu, wali womala-nawale wila amperheke Izaki, mulobwana ole wamalile wakela n’ohagalala mapikerhelo wahalile vang’onovi wila amperheke mwanaye mmodha bahi.
18 Masiki valogiwani wi: “Ole onakuweliwe ziza* nawo onadhe mwa Izaki.”
19 Mbwenyi iyene wankuluvela wi Mulugu, onowodha onvenyiha mwanaye Izaki mukwani vina ohimwakela mwana oddo sabwani wakala ninga ovenyihiwe mukwani; ejo yoniha esile dháfuna opadduwa musogorho.
20 Vina na ororomela Izaki omururiha Jakob na Ezaú awaddelaga esile dháfuna opadduwa musogorho.
21 Na ororomela Jakob afunaga okwa oharuriha ana a Jozé mmodha-mmodha vina omwebedha Mulugu asamelaga mukongozo waye.
22 Na ororomela Jozé bali vakuvi na ogoma wa egumi yaye ohiloga obudduwa wa ana Izrayel mw’Ejipitu vina ohapanga yafwanyelani okosana magogoddo aye.*
23 Na ororomela Mizé mmaleliye obaliwa, amambali aye ahinvita mwari mwa myeri miraru sabwani ahona wi mwanaya wali wokoddela vina kovile nlamulo na mwene.
24 Na ororomela Mizé munuweliye ohikodda okuweliwa mwana wa mwana-muyana wa Faraó,
25 iyene osakula otabutxiwa na nlogo na Mulugu, ottiya ojavo mudhidhi mung’onovi dhilobo dha dhottega,
26 sabwani iyene wannona wi otabutxiwa wa Kristu yali ninga yorela enddimuwa opitta mafumo a mw’Ejipitu, vowi iyene wanang’ana ddo-ddo-ddo nlivo nafuniye wakela.
27 Na ororomela iyene obudduwa w’Ejipitu ahovaga owali wa mwene sabwani wahilibiha murima akalaga ninga onimona Ole ohinoneya.
28 Na ororomela iyene ohimuja Paskwa vina ahisigiha nikami vadhulu va misuwo wila anju wa Mulugu anape anawa a attaji.
29 Na ororomela nlogo na Izrayel nihabuwa Nyaza ya Manje Ofila ninga vamattakani awuma, mbwenyi mwafunela akadda Ejipitu okosa yakakene, amedhiwa na manje a mwinjeya.
30 Na ororomela rhinga dha Jerikó dhigwa murugunuwele nlogo dila tanu na bili.
31 Na ororomela Rahab, jeberuwa, kakwile vamodha na abale aheweleli sabwani iyene ohawakela anamabeddegela na mada meli.
32 Ddinaloge eni yina? Sabwani kaddigakanile mudhidhi kowiliwa ddela ologa vina mwaha wa Jideau, Baraki, Sansau, Jefté, Davidi, Samuwel, vamodha na anamavuhulela ena.
33 Na ororomela awene ahagonjiha amwene; attonga n’oligana, ahakela dhapikirheliwe, afuga milomo dha apoddogoma,
34 attimiha motto wattidda n’owali, attawa opiwa na supadda, àli attu awobana ahidha okala a guru, àkala owarala mukoddoni, ahapemberha anyakoddo áfuna ovolowa mwilaboni mwawa.
35 Ayana ahawakela attu awa akwile abuwene avenyihiwe mukwani, mbwenyi ena ahitabutxiwa sabwani karumelile ofuruliwa,* èrela wi afwanye ovenyihiwa mukwani wapamawa.
36 Ndde, attu ena ahehiwa mwa oteyiwa vina owasuliwa, txibarene ottiya esivi awene amagiwa na kurenti vina afugeliwa mukambura.
37 Awene aponyedhiwa malugu, ahehiwa, agwaddiwa vari,* ahipiwa na supadda, annedda babalile ttebe dha mabila na ttebe dha mbuzi, ankana dhojombeliwa, afwanyiwa masoso vina atabutxiwa,
38 elabo kiyattittimiha, annedda dhuwa-dhuwa mwiddeddereni, mmyangoni, mugurugudhani vina mimburo dhotibiwa.
39 Vano masiki vakelilani onamoona wapama mwaha wa nroromelo nawa, awene konile wakwanihedheya wa mapikirhelo,
40 sabwani Mulugu, wahigana onivaha elobo yapama wi awene akale owakwana vamodha na iyo.
Manota
^ Obe, “azamani ehu.”
^ Obe, “ahakela vizinddiyelo.”
^ Obe, “namasasanyedha vina namamagaya ddi Mulugu.”
^ Na egregu, “beu.”
^ Obe, “wannimukuluvela.”
^ Na egregu, “beu.”
^ Obe, “winteriwa waye.”
^ Obe, “ofuruliwa mwaha wa yobolo-yobolovi.”
^ Obe, “ahigwaddiwa dhipaddi-dhipaddi.”
