Ahebreu 12:1-29
12 Nona, ninga nihirugunuwiwa na anamoona enjene ali ninga murabo, nittiye muttoro wotene onnilemela na yottega ennipaka, nittamage na ntidi muttamango onikuweleli Mulugu,
2 oku nididelaga omwang’ana Mwimeleli Munddimuwa vina Muliba Wakwaniha nroromelo nehu, Yezu. Mwaha wa ottaba otonyihedhiwiye, iyene ovilela okwa vapingirhizini ya goyi* apwazaga manyazo, vina ogilati omononi w’oja wa mpaddo wa Mulugu.
3 Txibarene, mmubuwelege ole ovilelile mazu menjene abure alogiwa na attegi, abuwene aloga mazu anattonga anya, wila muhileme nne vina muhiyelele mundduni.
4 Nyuwo kamunatti owanetxa na yottega ofiyedha okala nena na okwa.
5 Vina muhidduwala-wene malago anuvahani Mulugu aukokomezagani ninga anaye, eraga: “Mwanaga, kupwaze olagiwa na Yehova vina kunyimuwe ogasaddeyiwaga na iyene;
6 Sabwani Yehova onalaga abale anakweliye vina onimuwasula* oddule onimwakeliye ninga mwanaye.”
7 Mvilelege makattamiho, monege ninga epaddi ya olagiwa wenyu. Mulugu, onuweddihani ninga anaye. Mwebaribari, mwana gani ohinlagiwa na Babe?
8 Mbwenyi akala nyuwo motene kamunlagiwa, bahito kamuli anaye, muli ana a muttu mwina.
9 Ottiya eji, amambali ehu annilaga dila dhinjidhene masiki dhawene iyo kanittiyile wariha, kanafwanyela omwiwelela vopitta Babihu onneddiha na muya waye wokoddela wi nikalewo?
10 Amambali ehu ahinilaga mwa mudhidhi mung’onovi afwaraga esile dhonani wi sapama, mbwenyi babihu wa wirimu ononilaga mudhidhi wotene akoselaga opurelamo wehu wila nikale attu okoddela ninga iyene.
11 Ebaribari wi kawo muttu onagalala agalagiwaga, mbwenyi onokubanya, vano nigarumela olagiwa oko ninobala milima dha murenddele vina dha oligana.
12 Nona, mulibihe mada ahilibile vina maboddo obanile,
13 mogolelegevi dila dhinvirenyu wila ole onkwettenkwa ahittabwe mbwenyi avulumuwe.
14 Mutamelege okaana murenddele na attu otene vina okala okoddela, vowi ole ohili wokoddela kanawodhe omona Nabuya.
15 Mukale txenjewa wila mwakele mahala a Mulugu, vina vari venyu vahimele mutxitxi wa venenu enatotele makattamiho attu, agamala attu enji adhá orava venenuyá;
16 vina mukale txenjewa wila vari venyu vahikale muttu onira dhá ogonihana wonyakuwa * nne muttu ohinriha dha Mulugu dhahene ninga Ezaú opwazile ofwanyeleliwa waye wokala mwana-muttaji sabwa ya yoja.
17 Nyuwo munoziwa wi vasogorhova vafuniliye ohalana maruriho, okoddiwa, sabwani masiki vadideliye onlaga wila babe asaddule yoganayá, kawodhile.
18 Sabwani nyuwo kamwaddamelile mwango onwodha ottiddiwa, wattidda motto, wanna mirabo dhoriba, eddima yawi goo na pevo enddimuwa;
19 nne oruma wa parhaza, nne vina lizu na ole waloga. Nlogo mmalelani wiwa, amuttidda myeddo Mizé wila ahiwe vina.
20 Sabwani awene kawodha ovilela nikokomezo ntti naloga: “Akala enama ji enama enoddiginya mwango obu, evokeliwe malugu mpaka okwa.”
21 Vano dhilobodhá dhahittabwa wopiha ofiyedha Mizé ologa dhahi: “Ddinowova, vina ddinogurumela.”
22 Mbwenyi nyuwo mwaddamelile va Mwangoni Sioni vina sidadi ya Mulugu oliwo, oli Jeruzalemi wa wirimu, vina anju ohikontareya,
23 ali otugumanene vina nikuru na attaji abuwene alebiwe mazina awa wirimu. Nimwaddamela Mulugu oli Namattonga wa otene vina nihawaddamela aligani aneddihiwa na muya wokoddela, akalihiwe owakwana,
24 vina mumwaddamela Yezu mulogeli wa nipagano niswa vina muhisusela nikami na Yezu nikuttuleliwe iyo, ninna ttima enddimuwa opitta nikami na Abeli.
25 Porhe-porhe, kamukodde omwiwa ole onloga, sabwani akala attu abale akoddile omwiwa ole waloga magano a Mulugu velaboni ya vati kavuneyile, iyo vina kaninavuneye nigakodda omwiwa ole onloga ovenyana wirimu!
26 Nsaka nttile lizu naye nihittekenya elabo, mbwenyi ovano iyene ohipikirhela: “Miyo kaddineyelele ottekenya elabovi, ddinele ottekenya vina erimu.”
27 Mazu aba “kaddineyelele” anoniha wi dhinele oburutxiwavo esile dhikosiwe, dhinattekenyiwe, wi dhihale esile dhihinattekenyiwe.
28 Vano, vowi ninele wakela Omwene ohinwodheya ottekenyeya, nidhowegevi nakelaga mahala abuwene anniwodhiha omulabela Mulugu n’ekalelo yorumeleya, nawova* vina na nriho.
29 Sabwani Mulugu wehu oli ninga motto ontototxa.
Manota
^ Kang’ana Mazu Atapuleliwe.
^ Obe, “onimusaddeya.”
^ Na egregu, porneya. Kang’ana Mazu Atapuleliwe.
^ Obe, “n’omova Mulugu.”