Ahebreu 13:1-25
13 Mudhowegenavi okwelana wenyu w’obali.
2 Kamudduwale ekalelo ya wawakela aleddo, sabwani ena ahiziwaga ahawakela anju.
3 Mwawubuwelege abale afugeliwe mukambura, ninga mufugeliwe vamodha na awene; vina mwawubuwelege abale antabutxiwa, vowi nyuwo vina muli attu a maningo.
4 Matelo arihiwege na attu otene, atelani aroromelegena muttu na mukwaye,* sabwani Mulugu, onele wattonga abale anira dha ogonihana wonyakuwa* vina anlupa matelo.
5 Muhikwelege kobiri vano muziveliwegena esile dhinenyuna, sabwani Mulugu ohiloga dhahi: “Miyo txipo kaddinauttiye vina txipo kaddinaunyanyale.”
6 Dhahene ninowodha ologa na oliba murima, dhahi: “Yehova ddi mukamihedhi waga, kaddinove elo. Txini enawodhe muttu oddikosana?”
7 Mwawubuwele abale anusogorhelani vari venyu, aulaleyeleni nzu na Mulugu, vina monaga yodhelavo ya mweddelo wawa mutagihe nroromelo nawa.
8 Yezu Kristu ddwakakene wa nzilo, wa ddabuno vina wa okala n’okala-wene.
9 Kamukwekwettiwe na masunziho ottiyana-ttiyana vina ohiziweya, sabwani ottiya olibiha murima na dhoja* dhihinapurihamo abale anzuzumela, japama olibiha murima na mahala a Mulugu.
10 Abale anttidda mabasa a Mulugu mmusasani kanrumelihiwa oja* dhilobo dhili vebuwani enna iyo.
11 Vano maningo a dhinama dhimperhekiwa, anddumeyiwa otakulu wa sidadi, vano nikamina namakutta munddimuwa onottukulela mburo wokoddela ninga mukutto omperhekeliwa dhottega dha attu.
12 Nona Yezu vina otabuwa otakulu wa sidadi wila akoddelihe nlogo na nikami naye.
13 Dhahene nidhoweni oliye, otakulu wa sidadi wila ninyimuliwe dhahene ninga munyimuleliwe iyene,
14 vowi iyo kaninna sidadi ehinagome, mbwenyi ninotamela na murima wotene sidadi enadhe.
15 Mwaha wa Yezu ninomperhekela Mulugu mudhidhi wotene mukutto onimuzivela, kuloga milima dha mulomo wehu,* ninkosa ejoyá mwa olaleya nzina na Mulugu vari va attu otene.
16 Ottiya ejivi, kamudduwale wakosela dhapama attu ena, vina mugawelegena na ena esile dhinnenyuna, sabwani mikutto dhinimuzivela Mulugu sisuwene.
17 Mwawiwelelege abale ansogorhela vari venyu, vina mwarumelege muhipambihaga, sabwani awene anouwang’anelani vina anele wakulela vamentoni va Mulugu, wila attidde mabasa awa n’ohagalala ottiya n’oribiwa murima, sabwani agakosa n’oribiwa murima munoputtuleya.
18 Munilobelelegevi sabwani ninokuluvela wi nikaana mubuwelo* wapama, vowi ninfuna nikale ororomeleya mwa dhilobo dhotedhene.
19 Ddinoukokomezani na ntidi wila muddilobelelege miyo wi ddiyihedhiwe wa nyuwo momaguva.
20 Mulugu wa murenddele onvenyihile mukwani mukumbuzi munddimuwa wa mabila Nabuya wehu Yezu Kristu na nikami na nipagano nihingoma,
21 auvaheni dhilobo dhotedhene dhapama wila mukosena ofuna waye mwaha wa Yezu Kristu onittukulela okosa esile dhinimuzivela. Mulugu oddo avahiwe nttittimiho okala n’okala-wene. Amen.
22 Ddinoukokomezani abali, wila muvuruwane n’ofwaseya mazu aba awulibihanina vowi ddulebeleni karta yogwaddela.
23 Ddinfuna muziwe wila mbalihu Timóteo ofuruliwa. Akala iyene onodha momaguva, ninele odha vamodha ouwonaniwo.
24 Mwaperhekele malejelo aga otene ansogorhela vari venyu, vamodha na aroromeliya* otene, abali a w’Itália anouperhekelani malejelo.
25 Mahala a Mulugu akale na nyuwo motene.
Manota
^ Obe, “mulobwana na muyana.”
^ Kang’ana Mazu Atapuleliwe anloga: “Ogonihana wonyakuwa.”
^ Obe, “na magano mwaha wa dhoja.”
^ Na egregu, “kanna owodha wa.”
^ Kuloga, mazu ambudduwa mwano mwehu.
^ Kang’ana Mazu Atapuleliwe.
^ Na egregu, “akoddeli.”
